Al‑nazir wa l‑uchuur
27
1 Wa Allah hajja le Muusa wa gaal :
2 Hajji le Bani Israaʼiil wa guul leehum :
« Kan naadum yisawwi nazir wa yuguul yikhassis insaan le Allah,
waajib yigaddim le Allah al‑taman al‑haddadooh le l‑insaan da.
3 Wa daahu al‑taman.
« Le l‑raajil al‑umrah min 20 lahaddi 60 sana,
al‑taman al‑haddadooh leyah hu 50 hajar fudda wa da hasab al‑wazin al‑rasmi hana l‑bakaan al‑mukhaddas.
4 « Wa le l‑mara kamaan tamanha 30 hajar fudda.
5 « Wa le l‑naadum al‑umrah min 5 lahaddi 20 sana,
kan wileed tamanah 20 hajar fudda wa kan bineeye tamanha 10 hajar fudda.
6 « Wa le l‑naadum al‑umrah min chahar lahaddi 5 sana,
kan wileed tamanah 5 hajar fudda wa kan bineeye tamanha 3 hajar fudda.
7 « Wa le l‑naadum al‑umrah min 60 sana wa foog,
kan raajil tamanah 15 hajar fudda wa kan mara tamanha 10 hajar fudda.
8 « Wa kan al‑raajil al‑sawwa al‑nazir da fagri ma yagdar yikaffi al‑taman,
yiwaddi al‑naadum al‑mukhassas bakaan raajil al‑diin.
Wa raajil al‑diin yagtaʼ leyah al‑taman hasab gudurtah.
9 « Wa kan bahiime chaalooha min al‑bahaayim al‑yagdaro yigaddumuuhum le Allah,
ajʼalo ayyi bahiime al‑yigaddumuuha le Allah mukhassasa.
10 Ma yikhayyuruuha wa la yibadduluuha wa la yichiilu al‑adiile fi badal al‑ma adiile wa la l‑ma adiile fi badal al‑adiile.
Wa kan yibaddulu bahiime be bahiime aakhara,
al‑bahaayim al‑itneen dool yabgo mukhassasiin.
11 « Wa kan al‑bahiime di nijse al‑ma yagdaro yigaddumuuha le Allah,
waajib yijiibuuha le raajil al‑diin.
12 Wa raajil al‑diin yichiifha kan adiile wa la ma adiile wa humman yitabbugu hasab kalaam raajil al‑diin.
13 Wa kan yidooru yafdooha kamaan,
yiziidu foogha khumusha.
14 « Wa kan naadum khassas beetah le Allah,
raajil al‑diin yichiifah kan adiil wa la ma adiil.
Wa siid al‑beet yarda be l‑taman al‑gataʼah leyah raajil al‑diin.
15 Wa kan al‑raajil al‑khassas beetah dawwar yafdaah hu yiziid foogah khumus tamanah wa khalaas yabga hanaayah.
16 « Wa kan naadum khassas bakaan le Allah min ard warasatah,
tamanah yabga hasab al‑cheyy al‑titeerubuuh wa da 50 hajar fudda le chuwaaleen wa nuss hana gameh abyad.
17 Wa kan naadum yikhassis ardah min sanit al‑Hurriiye,
hu yarda be l‑taman da.
18 Wa kan naadum yikhassis ardah baʼad sanit al‑Hurriiye,
raajil al‑diin yahsib al‑taman hasab al‑siniin al‑faddalo le sanit al‑Hurriiye al‑jaayi wa yangusah min al‑taman al‑magtuuʼ.
19 Wa kan al‑naadum al‑khassas ardah yidoor yafdaaha,
hu yiziid foogha khumus tamanha wa hi tabga hintah.
20 Wa kan hu ma fadaaha bas baaʼha le naadum aakhar,
khalaas hagg al‑fadayaan yabga ma fiih.
21 Wa l‑ard di wakit yikhalliiha fi sanit al‑Hurriiye,
hi tabga khaass le Allah misil muharrama wa tabga ard warasa hint rujaal al‑diin.
22 « Wa kan naadum chara ard wa khassasha le Allah wa l‑ard di ma min ard warasatah,
23 khalaas raajil al‑diin yahsib tamanha lahaddi sanit al‑Hurriiye wa hu yikaffi tamanha fi nafs al‑yoom wa da cheyy mukhassas le Allah.
24 Wa fi sanit al‑Hurriiye,
al‑ard di tigabbil le siidha al‑awwal charooha minnah wa hi tabga ard warasatah.
25 « Wa ayyi taman yabga hasab al‑wazin al‑rasmi hana l‑bakaan al‑mukhaddas wa hajar fudda yawzin 12 giraam.
26 « Wa abadan naadum ma yagdar yikhassis wileed al‑bikir min bahaaymah achaan wileed al‑bikir da hu min wildooh bas hana Allah.
Kan min al‑khanam wa la min al‑bagar kula,
hu min wildooh bas hana Allah.
27 Wa kan le l‑bahiime al‑nijse,
yagdaro yafdooha wa yiziidu fi tamanha khumusha.
Wa kan ma fadooha kamaan,
yibiiʼuuha hasab al‑taman al‑magtuuʼ leeha.
28 « Wa kulla cheyy al‑yikhassisah al‑insaan le Allah min kulla cheyy haggah halaalah misil al‑naadum wa l‑bahiime wa l‑zereʼ min ard warasatah,
dool ma yibiiʼuuhum wa la yafdoohum.
Wa kulla cheyy al‑tantuuh le Allah yabga mukhassas marra waahid.
29 Wa ayyi naadum kan khassasooh le l‑damaar,
ma yafdooh laakin yumuut.
30 « Wa ayyi uchur al‑tichiiluuh min intaaj al‑ard wa min al‑fawaakih yabga hana Allah wa da cheyy mukhassas le Allah.
31 Wa kan naadum yidoor yafda cheyy min al‑uchur al‑hu yantiih,
waajib yikaffi tamanah wa yiziid foogah khumsah.
32 Wa kulla l‑uchur hana l‑bagar wa l‑khanam wa da ayyi bahiime al‑aachre al‑tufuut tihit al‑dugul,
hi tabga mukhassasa le Allah.
33 Wa ma yimayyuzu al‑bahiime kan adiile walla ma adiile wa la yibadduluuha be bahiime aakhara.
Wa kan baddalooha,
humman al‑itneen yabgo mukhassasiin le Allah wa ma yagdaro yafdoohum. »
34 Wa dool al‑wasaaya al‑antaahum Allah be waasitat Muusa le Bani Israaʼiil fi jabal Siinaaʼ.