Ma tasnaʼo ilaahaat
26
1 « Ma tasnaʼo leeku ilaahaat wa la tukhuttu asnaam wa la tukhuzzu hujaar le l‑ibaada wa la tamaasiil hana hujaar.
Ma tukhuttuhum fi baladku wa tasjudu giddaamhum.
Achaan ana bas Allah Ilaahku.
2 Ahfado yoomi hana l‑sabt wa ahtarumu beeti al‑mukhaddas.
Wa ana bas Allah.
Al‑baraka
3 « Wa kan taabaʼtu churuuti wa hafadtu wasiiyaati wa tabbagtuuhum,
4 ana ninazzil leeku al‑matar fi waktah wa l‑ard tanti intaajha wa chadar al‑kadaade kula yanti fawaakihha.
5 Wa fi bakaanku,
wakt al‑daggiin yamchi lahaddi l‑gatiʼ wa l‑gatiʼ lahaddi l‑teeraab.
Wa taakulu min maʼaachku lahaddi tachbaʼo wa taskunu fi baladku be amaan.
6 « Wa nijiib al‑salaam fi l‑balad wa tunuumu wa ma fi cheyy yibarjil noomku.
Wa niwaddir min al‑balad al‑haywaanaat al‑fasliin wa l‑seef ma yuchugg baladku.
7 Wa intu titaarudu udwaanku wa humman yumuutu be l‑seef giddaamku.
8 Wa minku intu,
5 yaturdu 100 naas wa 100 yaturdu 10 000 naas.
Wa udwaanku yumuutu be l‑seef giddaamku.
9 « Wa ana niwajjih aleeku wa nisawwiiku taldo wa tiziidu wa nisabbit maʼaaku muʼaahadaati.
10 Wa taakulu min intaajku al‑gadiim wakit tawiil lahaddi tamurgu intaajku al‑gadiim le tudummu al‑jadiid.
11 Wa ana nukhutt maskani fi usutku wa ma nakrahku.
12 Wa nuruukh fi usutku wa nabga Ilaahku wa intu tabgo chaʼabi.
13 Wa ana Allah Ilaahku al‑maragtuku min balad al‑Masriyiin le ma tabgo abiidhum wa ana bas al‑kassart al‑daami al‑fi rigaabku wa khalleetku maachiin raasku marfuuʼ.
Al‑laʼana
14 « Wa kan intu ma tasmaʼooni wa ma titabbugu wasiiyaati
15 wa kan taabo churuuti wa takraho gawaaniini wa ma tihtarumu wasiiyaati wa tagtaʼo muʼaahadati,
16 khalaas daahu al‑nisawwi leeku.
Nigawwim didduku al‑sull wa l‑wirde le nikhawwifku.
Wa humman dool yidaʼʼufu choofku wa yaakulu hayaatku.
Wa kan harattu kula,
udwaanku bas yaakulu intaajku.
17 Wa ana nugumm didduku wa udwaanku yinnasru foogku wa l‑yakrahooku yahkumu foogku wa tajru kan ma yitaaruduuku kula.
18 « Wa kan be da kula ma simiʼtuuni,
ana niʼaakhibku sabʼa marraat be sabab zunuubku.
19 Wa ana nikassir istikbaar gudritku wa nisawwi samaaku gawi misil hadiid wa arduku misil nahaas.
20 Wa intu tiʼayyu nufuusku bala faayde.
Al‑ard ma tigawwim cheyy wa chadar al‑balad kula ma yalda iyaal.
21 « Wa kan be da kula tugummu diddi wa ma tasmaʼooni,
ana nadrubku sabʼa marraat ziyaada be sabab zunuubku.
22 Wa nigawwim didduku haywaanaat al‑kadaade al‑yaakulu iyaalku wa yikammulu bahaayimku wa yisawwuuku chiyya wa duruubku yabgo faadiyiin.
23 « Wa kan be da kula ma tardo be ikhaabi wa tugummu diddi,
24 ana kula nugumm didduku wa ana kula nadrubku sabʼa marraat be sabab zunuubku.
25 Wa ana nijiib leeku al‑harib be sabab intu nagadtu muʼaahadati wa intu tilimmu fi mudunku.
Wa ana nirassil leeku waba wa nisallimku le udwaanku.
26 Wa ana niwaggif minku al‑maʼaach wa achara awiin yisawwan leeku akil fi furun waahid.
Hinna yijiibannah leeku chiyya.
Intu taakulu wa ma tachbaʼo.
27 « Wa kan be da kula ma simiʼtuuni wa gammeetu diddi,
28 ana kula nugumm didduku be khadab chadiid wa ana zaati niʼaakhibku sabʼa marraat be sabab zunuubku.
29 Wa taakulu laham awlaadku wa banaatku.
30 Wa ana nidammir bakaanaatku al‑aaliyiin wa nikassir makhaabirku hana l‑bakhuur.
Wa nuruss janaazaatku maʼa janaazaat asnaamku wa nakrahku.
31 Wa nisawwi mudunku kharaab wa bakaanaat al‑mukhaddasiin faadiyiin wa ma nuchumm al‑riihe al‑tiharruguuha le ridaayi.
32 Wa ana zaati nijiib al‑hizin fi l‑balad wa udwaanku al‑yaskunuuha yinbahtu.
33 Wa kan leeku intu,
nijiib leeku al‑harib wa nichattitku fi lubb al‑umam.
Wa baladku tabga kharaab wa mudunku yilhaddamo.
34 « Wa kulla l‑wakit al‑intu gaaʼidiin foogah fi balad udwaanku,
baladku al‑kharbaane tinjamma.
Wa da yibaddil ayyaam al‑sabt al‑intu ma ahtaramtuuhum.
35 Wa fi muddit kulla ayyaam kharaabha,
hi tinjamma wa tilkaffa ayyaam al‑sabt al‑hi ma anjammat fooghum wakit intu saakniin foogha.
36 « Wa kan le l‑yifaddulu minku fi balad udwaanku,
ana nagtaʼ achamhum.
Wa haraka hana warchaalaay al‑chaayleeha al‑riih kula tatrudhum wa humman yiʼarrudu misil al‑muʼarrid min al‑harib wa yagaʼo kan ma yitaaruduuhum kula.
37 Wa humman yittartaʼo al‑waahid fi l‑aakhar misil fi l‑harib,
kan ma yitaaruduuhum kula.
Wa intu ma tagdaro tigabbulu udwaanku
38 wa tumuutu fi lubb al‑umam wa balad udwaanku tazrutku.
39 Wa l‑yifaddulu minku yumuutu be sabab khataahum fi buldaan udwaanku.
Wa battaan be sabab khata abbahaathum al‑zaad fi khataahum,
humman yumuutu.
Allah jaddad muʼaahadatah
40 « Wa laakin yiʼtarufu be khataahum wa khata abbahaathum wa yuguulu humman sawwo khiyaana lahaddi gammo diddi.
41 Wa ana kula nugumm didduhum wa niwaddiihum fi balad udwaanhum.
Wa be da,
guluubhum al‑ma taahiriin yiʼayyubuuhum wa ikhaabhum yilhaggag.
42 Wa ana nisawwi hasab muʼaahadati maʼa Yaakhuub wa hasab muʼaahadati maʼa Ishaakh wa hasab muʼaahadati maʼa Ibraahiim wa nifakkir fi l‑balad.
43 Wa be da wakit al‑balad tabga kharbaane wa faadiye minhum,
hi tinjamma misil fi yoom al‑sabt.
Wa khalaas,
yiʼtarufu be ikhaabhum achaan humman abo gawaaniini wa kirho churuuti.
44 « Wa fi chaan da wakit yukuunu fi balad udwaanhum,
ana ma naabaahum wa la nakrahhum lahaddi nikammilhum wa nagtaʼ muʼaahadati maʼaahum achaan ana Allah Ilaahhum.
45 Wa fi chaanhum,
ana nitimm al‑muʼaahada al‑awwal sawweetha maʼa juduudhum al‑maragtuhum min balad Masir giddaam kulla l‑umam achaan nabga Ilaahhum.
Wa ana bas Allah. »
46 Wa dool al‑wasaaya wa l‑gawaaniin wa l‑churuut al‑khataahum Allah beenah hu wa been Bani Israaʼiil fi jabal Siinaaʼ be waasitat Muusa.