Muusa amar yitabbugu al‑gaanuun
27
1 Wakit Muusa gaaʼid maʼa kulla chuyuukh Bani Israaʼiil,
anta al‑amur da le l‑chaʼab wa gaal :
« Ahfado al‑wasaaya al‑naamurku beehum al‑yoom.
2 Wa fi l‑yoom al‑tagtaʼo foogah bahar al‑Urdun le tadkhulu fi l‑balad al‑yantiiha leeku Allah Ilaahku,
khuzzu hujaar kubaar wa amsahoohum be buhya beeda.
3 Wa wakit tagtaʼo le tadkhulu fi l‑balad al‑malaane be l‑laban wa l‑asal al‑yantiiha leeku Allah Ilaahku,
aktubu fi l‑hujaar dool kulla l‑wasaaya misil gaalah leeku Allah Rabb juduudku.
4 Wa wakit tagtaʼo bahar al‑Urdun khuzzu al‑hujaar dool fi jabal Ibaal hasab al‑amur al‑nantiih leeku al‑yoom wa amsahoohum be buhya beeda.
5 « Wa fi l‑bakaan da,
abnu madbah le Allah Ilaahku be hajar wa ma tagtaʼooh be hadiid.
6 Wa abnu madbah le Allah Ilaahku be hujaar kaamiliin.
Wa fi l‑madbah da,
gaddumu dahaaya muharragiin le Allah Ilaahku.
7 Wa gaddumu dahaaya al‑salaama wa aakulu fi l‑bakaan da wa afraho giddaam Allah Ilaahku.
8 Wa aktubu fi l‑hujaar dool kulla kalaam al‑wasaaya be katib waadih. »
9 Wa Muusa wa rujaal al‑diin al‑Laawiyiin kallamo le kulla Bani Israaʼiil wa gaalo :
« Askutu wa asmaʼo ya Bani Israaʼiil !
Al‑yoom intu bigiitu chaʼab Allah Ilaahku.
10 Wa asmaʼo kalaam Allah Ilaahku wa tabbugu wasiiyaatah wa churuutah al‑naamurku beehum al‑yoom. »
11 Wa fi l‑yoom da,
Muusa anta al‑amur da le l‑chaʼab wa gaal :
12 « Wa wakit tagtaʼo bahar al‑Urdun,
gabiilat Chimʼuun wa gabiilat Laawi wa gabiilat Yahuuza wa gabiilat Yassaakar wa gabiilat Yuusuf wa gabiilat Banyaamiin yagiifu fi jabal Gariziim le yibaaruku al‑chaʼab.
13 Wa laakin gabiilat Raʼuubiin wa gabiilat Gaad wa gabiilat Achiir wa gabiilat Zabuluun wa gabiilat Daan wa gabiilat Naftaali yagiifu fi jabal Ibaal le yalʼano al‑chaʼab. »
Al‑atnaachar laʼana
14 Wa l‑Laawiyiin yichiilu al‑kalaam wa be hiss aali,
yuguulu le kulla Bani Israaʼiil :
15 « Malʼuun al‑yisawwi sanam hana hadiid aw suura wa yilabbidha fi bakaan sirri.
Wa Allah harram al‑sanam khidmit iid al‑sinaaʼi. »
Wa kulla l‑chaʼab yuguulu :
« Aamiin ! »
16 « Wa malʼuun al‑ma yikarrim ammah wa abuuh. »
Wa kulla l‑chaʼab yuguulu :
« Aamiin ! »
17 « Wa malʼuun al‑yihawwil hajar hana l‑huduud maʼa jaarah. »
Wa kulla l‑chaʼab yuguulu :
« Aamiin ! »
18 « Wa malʼuun al‑yiwaddir al‑amyaan min al‑derib. »
Wa kulla l‑chaʼab yuguulu :
« Aamiin ! »
19 « Wa malʼuun al‑yidangis al‑chariiʼa le yazlum al‑ajnabi wa l‑atiim wa l‑armala. »
Wa kulla l‑chaʼab yuguulu :
« Aamiin ! »
20 « Wa malʼuun al‑yargud maʼa marit abuuh achaan hu kachaf oorit abuuh. »
Wa kulla l‑chaʼab yuguulu :
« Aamiin ! »
21 « Wa malʼuun al‑yargud maʼa l‑bahiime. »
Wa kulla l‑chaʼab yuguulu :
« Aamiin ! »
22 « Wa malʼuun al‑yargud maʼa akhtah bitt ammah aw bitt abuuh. »
Wa kulla l‑chaʼab yuguulu :
« Aamiin ! »
23 « Wa malʼuun al‑yargud maʼa nasiibtah amm martah. »
Wa kulla l‑chaʼab yuguulu :
« Aamiin ! »
24 « Wa malʼuun al‑yaktul akhuuh be sirr. »
Wa kulla l‑chaʼab yuguulu :
« Aamiin ! »
25 « Wa malʼuun al‑yichiil ujra le yidaffig damm al‑bari. »
Wa kulla l‑chaʼab yuguulu :
« Aamiin ! »
26 « Wa malʼuun al‑ma yichiil kalaam al‑wasaaya dool wa yitabbighum. »
Wa kulla l‑chaʼab yuguulu :
« Aamiin ! »