Antu min awwal intaaj al‑ard
26
1 Wa wakit tadkhulu fi l‑balad al‑Allah Ilaahku yantiiha leeku warasa wa wakit tichiiluuha wa taskunu foogha,
2 ayyi waahid minku yichiil min awwal intaaj ardah al‑Allah Ilaahku yantiiha leyah.
Wa yusubbah fi soosal wa yiwaddiih fi l‑bakaan al‑yaʼazilah Allah Ilaahku le yukhutt foogah usmah.
3 Wa yamchi le raajil al‑diin al‑gaaʼid yakhdim fi l‑wakit da wa yuguul leyah :
« Daahu al‑yoom ana nachhad giddaam Allah Ilaahak kadar ana jiit fi l‑balad al‑hu halaf le juduudna wa gaal yantiiha leena. »
4 Wa raajil al‑diin yichiil al‑soosal min iideenah wa yukhuttah giddaam al‑madbah hana Allah Ilaahku.
5 Wa battaan yuguul al‑kalaam da giddaam Allah Ilaahku :
« Zamaan jiddi Araami sayyaari.
Wa nazal fi balad Masir maʼa naas chiyya wa sakan foogha wa baʼad da,
hu bigi umma kabiire wa chadiide wa katiire.
6 Wa laakin al‑Masriyiin sawwo foogna al‑fasaala wa taʼʼaboona wa khaddamoona khidme gaasiye.
7 Wa aniina kamaan saʼalna Allah Rabb juduudna wa hu simiʼ hissina wa chaaf murrina wa taʼabna wa diigitna.
8 Wa Allah maragaana min balad Masir be iid chadiide wa duraaʼ gawi wa be khoof chadiid wa alaamaat wa ajaayib.
9 Wa hu jaabaana fi l‑bakaan da wa antaana al‑balad di wa hi al‑balad al‑malaane be l‑laban wa l‑asal.
10 Ya Allah !
Daahu ana jibt al‑intaaj al‑awwal hana l‑ard al‑anteetha leyi. »
Wa hu yukhuttah giddaam Allah Ilaahku wa yasjud giddaamah.
11 Wa khalaas,
tafraho maʼa l‑Laawiyiin wa l‑ajaanib al‑gaaʼidiin fi usutku.
Wa da,
fi chaan kulla l‑kheer al‑antaah leeku Allah Ilaahku wa le aayilaatku.
Al‑uchuur fi l‑sana al‑taalta
12 Wa l‑sana al‑taalta,
hi sanit al‑uchur wa wakit tamurgu al‑uchur min kulla intaajku,
tantuuh le l‑Laawiyiin wa l‑ajnabi wa l‑atiim wa l‑armala.
Wa humman yaakulu wa yachbaʼo fi mudunku.
13 Wa tuguulu giddaam Allah Ilaahak :
« Ana maragt min beeti al‑cheyy al‑mukhassas le Allah wa anteetah le l‑Laawiyiin wa l‑ajnabi wa l‑atiim wa l‑armala wa da hasab kulla l‑wasaaya al‑inta amartini beehum.
Wa waahide min wasiiyaatak kula,
ana ma khalleetha wa la nisiitha.
14 Wa l‑achya dool,
ana ma akalt minhum fi wakt al‑hizin wa la maragt cheyy wakit ana ma taahir wa la anteet minhum cheyy le l‑mayyit.
Wa simiʼt kalaamak inta Allah Ilaahi wa sawweet hasab wasiiyaatak al‑amartini beehum.
15 Chiif min maskanak al‑mukhaddas fi l‑sama wa baarik chaʼabak Bani Israaʼiil wa l‑ard al‑anteetha leena misil inta halaft le juduudna wa di l‑balad al‑malaane be l‑laban wa l‑asal. »
Bani Israaʼiil chaʼab Allah
16 Al‑yoom,
Allah Ilaahku yaamurku le titabbugu al‑churuut wa l‑gawaaniin dool wa tahfadoohum wa titabbuguuhum be kulla guluubku wa kulla fikirku.
17 Wa l‑yoom,
intu chahadtu kadar Allah yabga Ilaahku wa intu kula tichiilu derbah wa tahfado churuutah wa wasiiyaatah wa gawaaniinah wa tasmaʼo kalaamah.