Al‑chariiʼa wa l‑huguug
25
1 Wa kan rujaal induhum muchkila ambeenaathum,
khalli yamchu le l‑chariiʼa achaan yahkumu leehum wa yibarru al‑bari wa yikhattu al‑khaati.
2 Wa kan al‑khaati da waajib leyah al‑jalid,
al‑gaadi yiraggidah fi l‑turaab giddaamah wa yajluduuh adad al‑jaldaat al‑muwaafig le jariimtah.
3 Wa laakin kan tajluduuh,
ma tajluduuh ziyaada min 40 jalda achaan akhuuku ma yiwaddir charafah giddaamku.
4 Wakit al‑toor gaaʼid yifajjikh leek al‑khalla fi l‑madagg,
ma tarbut khachmah.
Khalli yaakul.
5 Wa kan akhwaan itneen gaaʼidiin sawa wa l‑waahid maat ma khalla iyaal,
al‑mara al‑armala di ma taakhud barra min ahal raajilha.
Wa hamaaha yugumm be waajbah hana l‑hama wa yaʼagilha.
6 Wa awwal wileed al‑yaldaah min al‑mara di yisammiih be usum akhuuh al‑mayyit achaan usmah ma yiwaddir min Bani Israaʼiil.
7 Wa kan al‑raajil da aba ma yaakhud hamaatah marit akhuuh,
hi tamchi fi khachum baab al‑madiina wa tuguul le l‑chuyuukh :
« Hamaayi aba ma yiʼalli usum akhuuh fi Israaʼiil.
Wa aba ma yugumm be waajbah hana l‑hama. »
8 Wa chuyuukh al‑madiina yinaaduuh wa yihajju leyah.
Wa laakin kan aba wa gaal ma yaʼagilha,
9 khalaas hamaatah tigarrib leyah giddaam al‑chuyuukh wa tisill naʼaalah min rijlah wa tabzukh leyah fi wijhah.
Wa tuguul :
« Da bas al‑yukuun le ayyi raajil al‑yaaba ma yijiib zurriiye le akhuuh. »
10 Wa khalaas,
fi Israaʼiil yinaadu aayiltah be l‑usum Aayilat al‑Salla Naʼaalah.
11 Wa kan rujaal itneen addaawaso wa marit al‑waahid garrabat le tikhallis raajilha min iid al‑aakhar wa wakit garrabat,
hi karabat al‑raajil da min giddaamah,
12 al‑mara di waajib tagtaʼo iidha wa ma tihinnu foogha.
13 Wa fi mukhlaatak,
ma waajib yinlagi wazin itneen,
al‑waahid tagiil wa l‑aakhar khafiif.
14 Wa fi beetak,
ma waajib yinlagi mikyaal itneen,
al‑waahid kabiir wa l‑aakhar sakhayyar.
15 Waajib indak wazin sawa sawa wa aadil wa mikyaal kula sawa sawa wa aadil achaan umrak yabga tawiil fi l‑ard al‑yantiiha leek Allah Ilaahak.
16 Achaan Allah Ilaahak yakrah ayyi naadum al‑yisawwi misil da wa ayyi naadum zaalim.
Al‑Amaalikh mahkuumiin
17 Wa fakkuru fi l‑cheyy al‑sawwooh leeku al‑Amaalikh* fi l‑derib wakit maragtu min balad Masir.
18 Wa l‑Amaalikh ma khaayfiin min Allah wakit gammo gataʼo leeku al‑derib wa katalo al‑mutaʼakhkhiriin minku wakit intu ayyaaniin wa ma induku gudra.
19 Wa wakit Allah Ilaahku yantiiku al‑jumma min kulla udwaanku al‑muhawwigiinku fi l‑balad al‑yantiiha leeku warasa le tichiiluuha,
dammuru al‑Amaalikh.
Wa guchchu zikirhum min tihit al‑sama.
Wa da ma tansooh.