Al‑akhiide
24
1 Wa akuun raajil yaakhud mara wa yichiilha wa baʼad da,
ma yarda beeha achaan ligi foogha eeb,
khalaas yaktib leeha maktuub hana talaag.
Wa baʼad hu yantiiha al‑maktuub hana l‑talaag fi iidha,
khalaas yatrudha min beetah
2 wa hi tamrug min beetah wa tamchi taakhud raajil aakhar.
3 Wa akuun al‑raajil al‑aakhar da kula yaabaaha wa yaktib leeha maktuub hana talaag wa yantiiha fi iidha wa yatrudha min beetah.
Walla akuun al‑raajil al‑aakhar al‑akhadaaha da yumuut.
4 Kan al‑raajil al‑aakhar tallagha walla maat kula,
raajilha al‑awwal tallagha da,
battaan ma yigabbilha baʼad hi annajjasat.
Achaan da cheyy Allah harramah wa be da,
intu ma tijiibu zanib fi l‑balad al‑Allah Ilaahku yantiiha leeku warasa.
5 Wa kan raajil akhad dahaabah jadiid,
ma waajib yirassuluuh fi l‑askariiye wa la yukhuttu foogah ayyi himil.
Humman yaʼafooh min kulla cheyy le muddit sana achaan yifarrih al‑mara al‑akhadha wa yikawwin aayila.
Al‑damaan wa l‑khidme
6 Wa ma takurbu damaana min naadum misil murhaaktah wa bittaha achaan da misil karabtu hayaatah fi l‑damaana.
7 Wa kan naadum min Bani Israaʼiil karab waahid min akhwaanah Bani Israaʼiil wa sawwaah abid wa baaʼah al‑naadum da,
waajib yaktuluuh.
Wa be da,
tamurgu al‑charr min usutku.
8 Ahfado nufuusku min marad al‑jisim achaan tahfado wa titabbugu adiil kulla l‑yiʼallumuuku leyah rujaal al‑diin al‑Laawiyiin.
Wa l‑ana amartuhum beyah da,
ahfadooh wa tabbuguuh.
9 Wa fakkuru fi l‑cheyy al‑sawwaah Allah Ilaahku le Mariyam* fi l‑derib wakit maragtu min balad Masir.
10 Wa kan dayyant cheyy le akhuuk,
ma tadkhul fi beetah wa tichiil minnah damaana.
11 Laakin agood barra wa hu al‑dayyantah yijiib leek al‑cheyy al‑takurbah fi l‑damaana.
12 Wa kan al‑naadum da,
miskiin ma takrub khalagah fi l‑damaana wa tiraggidah fi beetak.
13 Wa waajib tigabbil leyah al‑damaana fi waguuʼ al‑harraay wa hu yunuum be khalagah wa yibaarikak.
Wa be l‑cheyy al‑inta sawweetah tukuun aadil giddaam Allah Ilaahak.
14 Ma tazulmu al‑khaddaam al‑taʼbaan wa miskiin kan min akhwaanku aw min al‑ajaanib al‑gaaʼidiin maʼaaku fi baladku.
15 Wa antuuh ujurtah gabul al‑harraay ma tagaʼ achaan hu taʼbaan wa mussaʼjil le yalgaaha.
Wa kan ma ke da,
hu yarfaʼ iideenah le Allah diddak wa Allah yiʼaakhibak be sabab zanbak.
Al‑masʼuuliiye al‑chakhsiiye
16 Al‑abbahaat ma yaktuluuhum be sabab zanib al‑iyaal wa l‑iyaal ma yaktuluuhum be sabab zanib al‑abbahaat.
Ayyi waahid yumuut be sabab zanbah bas.
17 Wa ma tidangusu al‑chariiʼa le l‑ajnabi wa l‑atiim wa ma takurbu fi l‑damaana farde hana mara armala.
18 Wa fakkuru kadar intu bigiitu abiid fi balad Masir wa Allah Ilaahku fadaaku.
Wa fi chaan da,
ana naamurku titabbugu al‑kalaam da.
19 Wa wakit tagtaʼo ziraaʼitku,
ma tigabbulu le l‑ganaadiil al‑nisiituuhum.
Khalluuhum le l‑ajnabi wa l‑atiim wa l‑armala achaan Allah Ilaahku yibaarik kulla khidmit iideeku.
20 Wa wakit tihittu zaytuunku,
ma tigabbulu le l‑kichcheeb al‑faddal fi l‑furuuʼ wa tagtaʼooh.
Khalluuh le l‑ajnabi wa l‑atiim wa l‑armala.
21 Wa wakit tagtaʼo jineenit inabku,
ma tigabbulu le l‑kichcheeb al‑faddal.
Khalluuh le l‑ajnabi wa l‑atiim wa l‑armala.
22 Wa fakkuru kadar intu bigiitu abiid fi balad Masir.
Wa fi chaan da,
ana naamurku titabbugu al‑kalaam da.