Al‑ma yilimmu maʼa jamaaʼat Allah
23
1 Al‑naadum al‑khasi aw al‑dakarah magtuuʼ ma yilimm maʼa jamaaʼat Allah.
2 Al‑farikh ma yilimm maʼa jamaaʼat Allah.
Lahaddi zurriiytah al‑aachre kula,
ma yagdaro yilimmu maʼa jamaaʼat Allah.
3 Wa Bani Ammuun wa l‑Muwaabiyiin ma yilimmu abadan maʼa jamaaʼat Allah hatta zurriiyithum al‑aachre.
4 Achaan zamaan,
humman abo ma yigaddumu leeku al‑khubza wa l‑almi fi l‑derib wakit maragtu min balad Masir.
Wa achaan ajjaro didduku Balʼaam wileed Baʼuur* al‑min hillit Fatuur fi Araam been al‑Nahreen le yalʼanku.
5 Wa laakin Allah Ilaahku aba ma simiʼ kalaam Balʼaam wa baddal leeku al‑laʼana be baraka achaan Allah Ilaahku yihibbuku.
6 Wa abadan ma tifattuchu leehum al‑salaam wa la l‑kheer fi muddit kulla hayaatku.
7 Ma takraho al‑Adoomiyiin achaan humman akhwaanku wa ma takraho al‑Masriyiin achaan intu gaʼadtu misil ajaanib fi baladhum.
8 Wa iyaalhum al‑yaldoohum fi mujtamaʼku,
fi l‑zurriiye al‑taalta yagdaro yilimmu maʼa jamaaʼat Allah.
Tihaarat al‑muʼaskar
9 Wakit tamurgu wa tukhuttu muʼaskarku didd udwaanku,
ahfado nufuusku min kulla cheyy fasil.
10 Wa kan fi lubbuku fi raajil ma taahir be sabab hu astahlam fi l‑leel,
al‑naadum da khalli yamrug barra min al‑muʼaskar wa battaan ma yadkhul foogah.
11 Wa fi l‑achiiye,
hu yilbarrad be almi wa wakit al‑harraay tagaʼ,
hu yadkhul fi lubb al‑muʼaskar.
12 Wa sawwu leeku bakaan barra min al‑muʼaskar wa foogah amchu agdu haajitku.
13 Wa maʼa khumaamku,
waajib induku haffaar.
Wa wakit tamchu le tagdu haajitku,
abhato nugra wa agoodu foogha wa kan khalaas,
adfunu khalaaku.
14 Achaan Allah Ilaahku gaaʼid maʼaaku fi lubb muʼaskarku le yinajjiiku wa yisallim leeku udwaanku.
Wa fi chaan da,
waajib al‑muʼaskar yukuun mukhassas le Allah.
Wa be da,
khalli Allah ma yichiif cheyy afin fi l‑muʼaskar wa yikhalliiku.
Al‑abid al‑jara min siidah
15 Wa kan abid jara min siidah wa ja laajiʼ fi baladku,
ma tigabbuluuh.
16 Khalluuh yaskun maʼaaku fi lubbuku fi l‑bakaan al‑yaʼazilah,
fi ayyi waahide min mudunku al‑taʼajibah.
Wa hu yalga al‑kheer wa ma titaʼʼubuuh.
Ibaadat al‑ilaahaat wa l‑charmata
17 Wa ma waajib ayyi mara aw raajil min Bani Israaʼiil yaʼabud al‑ilaahaat al‑ajnabiyiin wa yichcharmat waraahum.
18 Wa le tikaffu ayyi nazir,
abadan ma tijiibu min maal al‑charmata hana mara aw raajil le beet Allah Ilaahku achaan humman al‑itneen dool,
Allah Ilaahku harramaahum.
Al‑deen be riba
19 Ma tatlub min akhuuk riba fi l‑gurus aw fi l‑maʼaach aw fi ayyi cheyy aakhar al‑tidayyinah leyah.
20 Wa tagdaro tichiilu riba min al‑ajaanib wa laakin ma tichiiluuh min akhwaanku.
Wa da achaan Allah Ilaahku yibaarikku fi kulla cheyy al‑tisawwuuh fi l‑balad al‑tamchu tichiiluuha warasa.
Haggugu al‑nazir
21 Wa kan sawweetu nazir le Allah Ilaahku,
ma tiʼakhkhuru fi haggigiinah achaan kan ma haggagtuuh,
Allah Ilaahku yasʼalku minnah.
Wa da zanib intu sawweetuuh.
22 Wa kan abeetu ma sawweetu nazir kamaan,
da ma zanib.
23 Wa laakin ahfado wa tabbugu al‑kalaam al‑gultuuh be khuchuumku hasab al‑nazir al‑sawweetuuh be niiyitku le Allah Ilaahku hasab kalaamku.
Zereʼ akhuuk wa aklah