Mudun al‑luju
19
1 Allah Ilaahku yidammir al‑umam wa yantiiku baladhum wa intu tichiiluuha wa taskunu fi mudunhum wa buyuuthum.
2 Wa baʼad da,
taʼazulu leeku talaata mudun fi ust al‑balad al‑Allah Ilaahku yantiiha leeku warasa.
3 Wa tiʼaddulu duruub le l‑balad al‑Allah Ilaahku yantiiha leeku warasa wa tigassumuuha ale talaata manaatig.
Wa da,
achaan ayyi kaatil yagdar yajri yagood fi waahide minhum.
4 Wa di hi al‑haala al‑yagdar yajri foogha al‑kaatil le yinajji nafsah wakit yaktul akhuuh.
Wa da kan yaktulah bala raayah,
hu awwal ma indah leyah ayyi karaahiiye.
5 Wa da misil naadum macha le l‑hatab maʼa akhuuh wa wakit gaaʼid yagtaʼ,
faasah nasalat wa katalah.
Al‑naadum da yagdar yajri le waahide min al‑mudun dool le yinajji nafsah.
6 Wa akuun siid al‑taar yichiil derib al‑kaatil wa fi l‑derib al‑tawiil,
hu yalhagah wa yaktulah wa laakin al‑kaatil ma waajib leyah al‑moot achaan min awwal,
hu ma indah ayyi karaahiiye le l‑mayyit.
7 Wa fi chaan da,
ana amartuku wa gult :
« Aʼazulu leeku talaata mudun. »
8 Wa kan Allah Ilaahku yiwassiʼ huduud baladku misil hu halaf le juduudku wa yantiiku kulla l‑balad misil hu gaal yantiiha le juduudku,
9 khalaas tiziidu battaan talaata mudun fi l‑mudun al‑talaata al‑awwal.
Wa wassiʼiin al‑huduud da yabga kan hafadtu wa tabbagtu kulla l‑wasaaya al‑nantiihum leeku al‑yoom wa habbeetu Allah Ilaahku wa daayman chiltu derbah.
10 Wa be da,
damm al‑bari ma yidaffig fi baladku al‑Allah Ilaahku yantiiha leeku warasa.
Wa ma tabgo masʼuuliin min mootah.
11 Wa laakin kan naadum indah karaahiiye le akhuuh wa yakrus leyah wa yaktulah wa baʼad da,
yajri le waahide min al‑mudun al‑luju dool,
12 khalaas kubaaraat hillitah yirassulu naadum le yijiibah wa yantuuh le siid al‑taar wa hu yaktulah.
13 Ma tihinnu foogah wa da achaan daffigiin damm al‑bari ke yabga ma fiih fi balad Israaʼiil.
Wa da yabga leeku akheer.
Gaanuun bukhuss al‑chuhuud
14 Wakit tadkhulu fi l‑balad al‑Allah Ilaahku yantiiha leeku warasa,
ma tihawwulu alaamaat al‑huduud al‑beenku wa been jiiraanku al‑khattoohum al‑naas al‑jo awwal.
15 Wa naadum wiheedah ma yagdar yachhad fi naadum wa yisabbit foogah al‑khata aw al‑zanib aw ayyi zanib aakhar al‑hu sawwaah.
Wa l‑tuhma ma tasbit illa be chahaada hana naas itneen aw talaata.
16 Wa kan naadum yachhad fi akhuuh be kidib le yisabbit foogah tuhma hana jariime,
17 al‑naaseen dool waajib yaju giddaam Allah wa yagiifu giddaam rujaal al‑diin wa l‑gudiya al‑gaaʼidiin yakhdumu fi l‑wakit da.
18 Wa l‑gudiya yifattuchu al‑kalaam da adiil.
Wa kan irfo al‑chaahid da kaddaab wa hu chahad fi akhuuh be kidib,
19 khalaas al‑naadum da aakhubuuh be nafs al‑ikhaab al‑hu dawwarah le akhuuh.
Wa be da,
tamurgu al‑charr min usutku.
20 Wa be da,
al‑yasmaʼo beyah yakhaafo wa battaan ma yisawwu amal cheen misil da fi usutku.
21 Ma tihinnu foogah wa tabbugu al‑nafis be l‑nafis wa l‑een be l‑een wa l‑sinn be l‑sinn wa l‑iid be l‑iid wa l‑rijil be l‑rijil.