Gaanuun al‑harib
20
1 Wa wakit tamurgu le l‑harib didd udwaanku wa tichiifu al‑kheel wa arabaat al‑harib wa naas katiiriin minku,
ma takhaafo minhum achaan Allah Ilaahku al‑maragaaku min balad Masir gaaʼid maʼaaku.
2 Wa wakit al‑harib yigarrib,
raajil al‑diin yagiif giddaam al‑chaʼab wa yikallim leehum
3 wa yuguul :
« Asmaʼo,
ya Bani Israaʼiil !
Daahu al‑yoom garrabtu le l‑harib maʼa udwaanku wa fi chaan da,
khalli guluubku ma yingatʼu wa ma takhaafo wa la tibarjulu wa la tarjufu minhum.
4 Achaan Allah Ilaahku maachi maʼaaku wa yihaarib leeku udwaanku le yinajjiiku. »
5 Wa l‑muraakhibiin yihajju le l‑chaʼab wa yuguulu :
« Yaatu al‑bana beet jadiid wa lissaaʼ ma fatahah ?
Al‑naadum da,
khalli yigabbil beetah achaan akuun hu yumuut fi l‑harib wa naadum aakhar yamchi yaftahah.
6 Wa yaatu al‑maggan jineenit inab wa lissaaʼ ma gataʼ awwal inabha ?
Al‑naadum da,
khalli yigabbil beetah achaan akuun hu yumuut fi l‑harib wa naadum aakhar yagtaʼ awwal inabha.
7 Wa yaatu al‑karab raas bineeye wa lissaaʼ ma chaalha ?
Al‑naadum da,
khalli yigabbil beetah achaan akuun hu yumuut fi l‑harib wa naadum aakhar yichiilha. »
8 Wa l‑muraakhibiin yihajju le l‑chaʼab wa yuguulu :
« Yaatu al‑khaaf wa galbah angataʼ ?
Al‑naadum da,
khalli yigabbil beetah achaan ma yijiib al‑khoof le akhwaanah wa yabgo mislah. »
9 Wa wakit al‑muraakhibiin yikammulu min kalaamhum le l‑chaʼab,
yikallufu khuyyaad fi raas al‑chaʼab.
10 Wa kan tigarrubu le ayyi madiina le tahjumuuha,
awwalan ke waajib tigaddumu leehum al‑salaam.
11 Wa kan naas al‑madiina di khiblo be l‑salaam al‑gaddamtuuh wa fataho leeku biibaanhum,
khalaas kulla chaʼab al‑madiina di yabgo leeku abiid wa yakhdumu leeku.
12 Wa laakin kan abo al‑salaam wa dawwaro al‑harib,
khalaas haasuru al‑madiina.
13 Wakit Allah Ilaahku yisallim leeku al‑madiina fi iideeku,
aktulu kulla l‑dukuura be l‑seef.
14 Wa laakin al‑awiin wa l‑iyaal wa l‑bahaayim wa ayyi cheyy al‑fi l‑madiina,
aksabooh.
Wa aakulu min al‑khaniime al‑tichiiluuha min udwaanku al‑sallamaahum leeku Allah Ilaahku.
15 Wa sawwu misil da fi kulla l‑mudun al‑baʼiidiin ziyaada minku al‑ma min mudun al‑umam al‑intu taskunu fi baladhum.
16 Wa laakin fi l‑mudun hana l‑chuʼuub al‑Allah Ilaahku yantiihum leeku warasa,
dool abadan ma tikhallu fooghum makhluug hayy.
17 Wa dammuru al‑Hittiyiin wa l‑Amuuriyiin wa l‑Kanʼaaniyiin wa l‑Firizziyiin wa l‑Hiwwiyiin wa l‑Yabuusiyiin misil Allah Ilaahku amaraaku beyah.
18 Wa tisawwu misil da achaan ma yiʼallumuuku kulla l‑muharramaat al‑gaaʼidiin yisawwuuhum fi ibaadat asnaamhum wa la yilizzuuku le taznubu didd Allah Ilaahku.
19 Wa kan tihaasuru madiina le mudda tawiile le tichiiluuha,
ma tidammuru al‑chadar be l‑faas achaan be iyaal al‑chadar dool bas,
intu tiʼiichu.
Wa fi chaan da,
ma tagtaʼooh.
Wa l‑chadar hana l‑kadaade da,
hu insaani achaan tihaasuruuh walla ?
20 Wa laakin tagdaro tagtaʼo wa tichaggugu al‑chadar al‑intu taʼarfuuh hu ma indah iyaal.
Wa be l‑chadar da,
tagdaro tihaasuru al‑madiina al‑tihaaribku lahaddi tagaʼ.