Al‑Laawiyiin ma yawrusu
18
1 Wa rujaal al‑diin al‑Laawiyiin wa kulla gabiilat al‑Laawiyiin ma induhum gisim wa la warasa maʼa Bani Israaʼiil.
Wa gisim Allah da bas,
warasathum wa dool al‑hadaaya al‑muharragiin al‑yigaddumuuhum le Allah.
2 Wa humman ma induhum warasa maʼa akhwaanhum.
Wa misil Allah gaalah leehum,
hu bas yabga warasathum.
3 Wa daahu hagg hana rujaal al‑diin fi l‑chaʼab wa fi l‑dahaaya al‑yigaddumuuhum Bani Israaʼiil min al‑tiiraan wa l‑khurfaan.
Humman yalgo al‑gaayme al‑giddaamiiye wa l‑chuduug wa l‑butuun.
4 Wa antuuhum awwal intaaj min gamehku wa khamarku al‑jadiid wa dihinku wa suuf khanamku
5 achaan Allah Ilaahku azalaahum humman bas min kulla l‑gabaayil le yisawwu khidimtah,
humman wa iyaalhum ila l‑abad.
6 Wa kan waahid min gabiilat Laawi yugumm min waahide min hillaalku al‑hu saakin foogha fi balad Israaʼiil,
hu yagdar yamchi hasab niiytah fi l‑bakaan al‑yaʼazilah Allah.
7 Wa hu yakhdim le Allah Ilaahah misil kulla akhwaanah al‑Laawiyiin al‑yagiifu giddaam Allah hinaak.
8 Hu yalga gisim misil hanaahum le yiʼiich beyah hatta kan indah warasa min khumaam abbahaatah baʼad baaʼooh kula.
Al‑anbiya wa l‑ma anbiya
9 Wa wakit tadkhulu fi l‑balad al‑yantiiha leeku Allah Ilaahku,
ma tilʼallamo nafs al‑muharramaat al‑sawwoohum al‑umam dool.
10 Wa khalli ma yinlagi fi usutku naadum al‑yiharrig bittah aw waladah fi l‑naar le l‑asnaam wa la chawwaafi wa la l‑yihajji be ilim al‑kheeb wa la munajjim wa la sahhaari
11 wa la chaddaari wa la jannaani wa la l‑yikallim maʼa l‑maytiin.
12 Wa ayyi naadum al‑yisawwi al‑achya dool makruuh giddaam Allah.
Wa be sabab al‑afʼaal al‑muharramiin dool bas,
Allah Ilaahku yaglaʼ al‑balad min al‑umam dool gubbaal ma taju.
13 Wa intu abgo kaamiliin giddaam Allah Ilaahku.
14 Achaan al‑umam al‑intu taglaʼo minhum baladhum dool humman gaaʼidiin yasmaʼo kalaam al‑naas al‑yihajju be ilim al‑kheeb wa l‑chawwaafiin.
Wa laakin leeku intu Allah Ilaahku ma yidoor tisawwu cheyy misil da.
15 Wa Allah Ilaahku yamrug leeku min akhwaanku nabi misli ana wa intu tasmaʼo kalaamah.
16 Wa da bas al‑cheyy al‑intu saʼaltuuh min Allah Ilaahku fi jabal Huuriib fi yoom al‑ijtimaaʼ wakit gultu :
« Battaan ma nidooru nasmaʼo hiss Allah Ilaahna* wa la nidooru nichiifu al‑naar al‑kabiire di.
Wa da,
achaan ma numuutu. »
17 Wa Allah gaal leyi ana Muusa :
« Kalaamhum adiil.
18 Ana namrug leehum fi usuthum nabi mislak wa ana nantiih kulla kalaami wa hu yihajji leehum be kulla cheyy al‑naamurah beyah.
19 Wa kan naadum ma yasmaʼ kalaami al‑yuguulah al‑nabi be usmi,
khalaas al‑naadum da ana bas nihaasibah.
20 Wa laakin kan nabi astakbar wa be usmi yuguul kalaam al‑ana ma amartah beyah aw yihajji be usum hana ilaahaat aakhariin,
khalaas al‑nabi da waajib yumuut. »