17
1 Ma tadbaho dahiiye le Allah Ilaahku toor aw kharuuf al‑indah eeb aw mukhalgan achaan al‑cheyy da Allah Ilaahku harramah.
2 Akuun fi mara aw raajil gaaʼid maʼaaku fi waahide min mudunku al‑antaahum leeku Allah Ilaahku wa l‑naadum da yisawwi al‑fasaala giddaam Allah wa ma yikarrim muʼaahadatah.
3 Wa yamchi yaʼabud ilaahaat aakhariin wa yasjud leehum wa yasjud le l‑harraay aw le l‑gamar aw le khuwwaat al‑sama al‑da mukhaalif le awaamiri.
4 Wa kan oorooku aw simiʼtu be cheyy misil da,
fattuchu adiil wa akkudu.
Wa kan akkadtu al‑cheyy al‑haraam da saabit wa sahiih bigi fi Israaʼiil,
5 khalaas fi l‑bakaan da,
jiibu al‑raajil aw al‑mara al‑sawwa al‑fasaala di fi khachum baab al‑madiina wa arjumuuh lahaddi yumuut.
6 Wa l‑naadum al‑waajib leyah al‑moot,
yaktuluuh be chahaadat naas itneen aw talaata.
Wa laakin ma yaktuluuh be chahaadat naadum waahid.
7 Wa l‑chuhuud dool,
humman bas yazurguuh be l‑hujaar awwal le yaktuluuh wa kulla l‑chaʼab min baʼadhum.
Wa be da,
tamurgu al‑charr min usutku.
Beet Allah bakaan al‑chariiʼa
8 Wa kan ma tagdaro tisawwu al‑chariiʼa hana l‑katil wa l‑khilaaf wa l‑jiraah wa l‑naas ma mukhassidiin be chariiʼat madiinitku,
khalaas gummu amchu fi l‑bakaan al‑yaʼazilah Allah Ilaahku.
9 Wa amchu le rujaal al‑diin al‑Laawiyiin wa l‑gaadi al‑gaaʼid yakhdim fi l‑wakit daak.
Wa humman yiʼooruuku kikkeef tisawwu al‑chariiʼa di.
10 Wa sawwu sawa sawa misil humman yiʼooruuku fi l‑bakaan al‑yaʼazilah Allah.
Wa ahfado kalaamhum wa tabbuguuh misil humman yiwassufuuku.
11 Wa sawwu hasab al‑churuut al‑yiwassufuuhum leeku wa hasab al‑wasaaya al‑yaamuruuku beehum.
Wa abadan ma tibaaru min kalaamhum al‑yiʼooruuku beyah wa la isra wa la zeene.
12 Wa laakin al‑naadum al‑yisawwi ayyi cheyy be istikbaar wa ma yasmaʼ kalaam rujaal al‑diin al‑gaaʼidiin yakhdumu le Allah Ilaahku wa la yasmaʼ kalaam al‑gudiya,
al‑naadum da waajib yumuut.
Wa be da,
tamurgu al‑charr min usut Bani Israaʼiil.
13 Wa kulla l‑chaʼab yasmaʼo be l‑cheyy al‑bigi wa yakhaafo wa battaan ma yistakbaro.
Gaanuun bukhuss al‑malik
14 Wa wakit tadkhulu fi l‑balad al‑yantiiha leeku Allah Ilaahku wa tichiiluuha warasa wa tagoodu foogha,
akuun tuguulu :
« Khalli nukhuttu leena malik misil al‑umam al‑aakhariin al‑muhawwigiinna. »
15 Wa waajib tukhuttu malik al‑yaʼazilah leeku Allah Ilaahku.
Wa l‑malik da yukuun waahid minku wa abadan ma tagdaro tukhuttu naadum ajnabi al‑ma minku.
16 Wa khalli al‑malik da ma yikattir al‑kheel wa la yigabbil al‑chaʼab fi Masir le yijiibu kheel achaan Allah gaal leeku :
« Abadan battaan ma tigabbulu be l‑derib da. »
17 Wa ma yaakhud awiin katiiraat achaan galbah ma yibaʼʼid.
Wa ma yilimm fudda katiire wa la dahab katiir.
18 Wa wakit al‑malik yagood fi kursi al‑muluk,
hu yaktib le nafsah kitaab min nafs al‑kitaab al‑wasaaya al‑yantuuhum leyah rujaal al‑diin al‑Laawiyiin.
19 Wa hu waajib yukhuttah maʼaayah wa yagriih fi kulla ayyaam hayaatah.
Wa be da,
yilʼallam al‑khoof min Allah Ilaahah wa yahfad kulla l‑wasaaya wa l‑churuut wa yitabbighum.
20 Wa hu ma yistakbar fi akhwaanah wa ma yibaari min al‑wasaaya wa la isra wa la zeene.
Wa be da,
hu wa iyaalah mulukhum yabga tawiil fi usut Bani Israaʼiil.