Angarʼu min ibaadat al‑asnaam
13
1 Wa akuun yamrug fi usutku nabi aw siid al‑ruʼya wa yihajji leeku be alaamaat wa ajaayib.
2 Wa akuun al‑alaama aw al‑ajab al‑hu hajja leeku beyah da yilhaggag wa hu yuguul leeku :
« Yalla nitaabuʼu ilaahaat aakhariin wa naʼabuduuhum.
» Wa dool ilaahaat al‑awwal intu ma taʼarfuuhum.
3 Ma tasmaʼo kalaam al‑nabi aw siid al‑ruʼya achaan Allah Ilaahku gaaʼid yijarribku le yichiif kan intu tihibbu Allah Ilaahku be kulla guluubku wa kulla fikirku.
4 Wa intu amchu wara Allah Ilaahku wa akhaafo minnah wa ahfado wasiiyaatah wa asmaʼo kalaamah wa aʼabuduuh wa atmassako beyah.
5 Wa l‑nabi aw siid al‑ruʼya da,
yahkumu leyah be l‑moot achaan be kalaamah,
hu muʼaarid Allah Ilaahku al‑maragaaku wa fadaaku min Masir balad al‑ubuudiiye.
Wa l‑naadum da yidoor yamrugku min al‑derib al‑amaraaku beyah Allah Ilaahku le tichiiluuh.
Wa intu amurgu al‑charr min usutku.
6 Wa akuun akhuuk wald ammak aw waladak aw bittak aw martak al‑tahdinha fi sadrak aw rafiigak al‑tihibbah misil nafsak yaji be achiir yuguul leek :
« Yalla namchu naʼabudu ilaahaat aakhariin.
» Wa l‑ilaahaat dool wa la inta wa la abbahaatak awwal ma taʼarfuuhum
7 wa laakin humman fi usut ilaahaat al‑chuʼuub al‑muhawwigiinku min gariib aw min baʼiid aw min taraf al‑ard le tarafha.
8 Al‑naadum da,
aaba ma tasmaʼ kalaamah.
Wa tichiifah be een al‑rahma wa la tihinn foogah wa la tahmiih.
9 Wa laakin inta bas waajib tarfaʼ iidak awwal le taktulah wa kulla l‑chaʼab al‑aakhariin min baʼadak.
10 Wa arjumuuh be hujaar lahaddi yumuut achaan hu dawwar yibaʼʼidku min Allah Ilaahku al‑maragaaku min Masir balad al‑ubuudiiye.
11 Wa be da,
kulla Bani Israaʼiil yasmaʼo wa yakhaafo wa abadan ma yisawwu fasaala misil di fi usutku.
12 Wa akuun simiʼtu fi waahide min al‑hillaal al‑antaahum leeku Allah Ilaahku le taskunu fooghum
13 kadar naas waahidiin ma naafʼiin lazzo sukkaan hillaalhum be l‑kalaam al‑buguul :
« Yalla namchu naʼabudu ilaahaat aakhariin.
» Wa dool ilaahaat al‑awwal ma taʼarfuuhum.
14 Fi l‑haala di,
gummu fattuchu wa haggugu wa asʼalo adiil kan al‑kalaam da sahiih.
Wa akkudu tamaam kadar al‑haraam da bigi fi usutku.
15 Wa khalaas fi l‑bakaan da,
dammuru marra waahid kulla sukkaan al‑hille di wa kulla cheyy al‑fiiha hatta al‑bahaayim kula,
aktuluuhum be l‑seef.
16 Wa limmu kulla l‑khaniime al‑ligiituuha fi nagaʼat al‑hille wa harrugu al‑hille wa kulla l‑khaniime giddaam Allah Ilaahku.
Wa l‑bakaan da yagood misil dungus achaan al‑hille di abadan ma taʼamir battaan.
17 Wa ma tichiilu le nufuusku ayyi cheyy haraam al‑khassasooh le l‑damaar.
Wa kan ma chiltuuh,
Allah yikhalli khadabah al‑chadiid wa yarhamku wa yisawwiiku katiiriin misil hu halaf le juduudku.
18 Wa da achaan tasmaʼo kalaam Allah Ilaahku wa tahfado kulla l‑wasaaya al‑ana nantiihum leeku al‑yoom.
Wa tisawwu al‑adiil giddaam Allah Ilaahku.