Gawaaniin Allah wa tabbigiinhum
12
1 Allah Rabb juduudku antaaku al‑balad le tichiiluuha warasa.
Wa daahu al‑churuut wa l‑gawaaniin al‑tahfadoohum wa titabbuguuhum fi kulla muddit hayaatku al‑tiʼiichuuha fi l‑ard.
2 Dammuru be l‑kaamil kulla l‑bakaanaat al‑tichiiluuhum al‑fooghum al‑umam abado ilaahaathum fi ruuse al‑jibaal wa fi l‑hujaar wa fi tihit ayyi chadara khadra.
3 Wa haddumu madaabihhum wa armu hujaarhum al‑khazzoohum le l‑ibaada wa harrugu iidaanhum al‑khazzoohum le ibaadat Achiira.
Wa kassuru asnaam ilaahaathum wa guchchuuhum marra waahid min al‑bakaan da.
4 Wa ma taʼabudu Allah Ilaahku misil da.
5 Wa laakin taʼabudu Allah Ilaahku fi l‑bakaan al‑hu yaʼazilah min usut kulla gabaayilku.
Wa yukhutt usmah foogah wa yaskun foogah wa fi l‑bakaan da bas,
intu taju.
6 Wa fi l‑bakaan da bas,
intu tigaddumu dahaayaaku al‑muharragiin wa dahaayaaku al‑aakhariin wa uchuurku wa zakaatku.
Wa tigaddumu nazirku wa l‑hadiiye al‑tantuuha be niiyitku wa awlaad al‑bikir hana bagarku wa khanamku.
7 Wa fi l‑bakaan da,
taakulu giddaam Allah Ilaahku.
Intu wa aayilaatku tafraho be kulla cheyy al‑sawweetuuh wa beyah Allah Ilaahku baarakaaku.
8 Wa ma tisawwu misil aniina gaaʼidiin nisawwuuh al‑yoom achaan hini ayyi naadum gaaʼid yisawwi al‑yaʼajibah.
9 Achaan intu lissaaʼ ma jiitu fi bakaan al‑jumma wa da l‑bakaan al‑Allah Ilaahku antaah leeku warasa.
10 Wa laakin tagtaʼo bahar al‑Urdun wa taskunu fi l‑balad al‑Allah Ilaahku antaaha leeku warasa.
Wa hu yantiiku jumma min kulla udwaanku al‑muhawwigiinku wa taskunu be amaan.
11 Wa Allah Ilaahku yaʼazil bakaan le yukhutt foogah usmah.
Wa fi l‑bakaan da bas,
tigaddumu kulla cheyy al‑naamurku beyah misil dahaayaaku al‑muharragiin wa dahaayaaku al‑aakhariin wa uchuurku wa zakaatku.
Wa tigaddumu kulla l‑hadaaya al‑azaltuuhum le nazirku al‑sawweetuuh le Allah.
12 Wa intu tafraho giddaam Allah Ilaahku intu wa iyaalku wa banaatku wa abiidku wa khadiimku wa l‑Laawiyiin al‑saakniin fi hillaalku.
Achaan hu ma indah gisim wa la warasa maʼaaku.
13 Angarʼu ma tigaddumu dahaayaaku al‑muharragiin fi ayyi bakaan al‑yaʼajibku.
14 Wa laakin tigaddumu dahaayaaku al‑muharragiin fi l‑bakaan al‑yaʼazilah Allah min ard hana gabiila waahide min gabaayilku.
Wa da l‑bakaan al‑tisawwu foogah kulla cheyy al‑naamurku beyah.
15 Wa be da kula,
wakit tagramo tagdaro tadbaho wa taakulu laham fi ayyi bakaan al‑taskunu foogah.
Wa da hasab al‑baraka al‑yantiiha leeku Allah Ilaahku.
Wa l‑taahir wa l‑nijis kula yagdar yaakul minnah misil yaakulu al‑khazaal aw ayyi seed aakhar.
16 Bas ma taakulu al‑damm wa laakin daffuguuh fi l‑turaab misil tidaffugu almi.
17 Wa laakin ma tagdaro taakulu fi l‑bakaan al‑intu saakniin foogah uchuur gamehku wa khamarku al‑jadiid wa dihinku.
Wa ma tagdaro taakulu hinaak wa la awlaad al‑bikir hana bagarku wa khanamku wa la ayyi hadiiye min al‑hadaaya al‑tisawwuuhum le nazirku wa la hadaayaaku al‑tantuuhum be niiyitku wa la zakaatku.
18 Wa laakin taakuluuhum giddaam Allah Ilaahku fi l‑bakaan al‑hu yaʼazilah bas.
Wa taakuluuhum intu wa awlaadku wa banaatku wa abiidku wa khadiimku wa l‑Laawiyiin al‑saakniin fi hillaalku.
Wa tafraho giddaam Allah Ilaahku be kulla cheyy al‑sawwatah iidku.
19 Wa fi kulla muddit hayaatku fi l‑ard,
ahtammo be l‑Laawiyiin ma tikhalluuhum.
20 Wa wakit Allah Ilaahku yiwassiʼ arduku misil hu gaalah leeku,
kan tidooru laham,
aakuluuh misil tidooruuh.
21 Wa kan al‑bakaan al‑yaʼazilah Allah Ilaahku le yukhutt foogah usmah bigi leeku baʼiid,
intu tagdaro tadbaho bagarku wa khanamku al‑antaahum leeku Allah.
Wa sawwu misil ana amartuku wa intu tagdaro taakulu misil tidooruuh fi l‑bakaan al‑saakniin foogah.
22 Wa intu taakulu misil yaakulu al‑khazaal aw ayyi seed aakhar.
Wa kulluku al‑taahir wa l‑nijis kula taakulu sawa.
23 Bas angarʼu marra waahid,
ma taakulu al‑damm achaan al‑damm hu al‑haya wa intu ma taakulu al‑haya maʼa l‑laham.
24 Wa abadan ma taakuluuh.
Daffuguuh fi l‑turaab misil almi.
25 Ma taakuluuh wa misil da,
talgo al‑kheer intu wa iyaalku min baʼadku achaan intu sawweetu al‑adiil giddaam Allah.
26 Wa l‑achya al‑tichiiluuhum wa tiwadduuhum fi l‑bakaan al‑yaʼazilah Allah,
humman al‑achya al‑intu khassastuuhum le Allah wa nazirku.
27 Wa tigaddumu dahaayaaku al‑muharragiin wa l‑laham wa l‑damm fi madbah Allah Ilaahku.
Wa damm dahaayaaku daffuguuh,
fi madbah Allah Ilaahku.
Wa l‑laham kamaan,
aakuluuh.
28 Asmaʼo wa ahfado kulla l‑kalaam al‑naamurku beyah da achaan talgo al‑kheer intu wa awlaadku ila l‑abad.
Wa intu tisawwu al‑zeen wa l‑adiil giddaam Allah Ilaahku.
Ma taʼabudu ilaahaat al‑Kanʼaaniyiin
29 Wa wakit Allah Ilaahku yatrud al‑umam al‑tamchu leehum,
khalaas intu tichiilu arduhum wa taskunu fi baladhum.
30 Wa baʼad yiddammaro giddaamku,
angarʼu wa ahfado nufuusku ma tinkarbu fi l‑charak misilhum.
Wa da achaan ma tifattuchu derib ilaahaathum wa tuguulu :
« Chiifu kikkeef al‑umam dool abado ilaahaathum !
Khalli aniina kula nisawwu misilhum. »
31 Wa intu ma tisawwu misil da le Allah Ilaahku,
achaan al‑umam dool yisawwu le ilaahaathum kulla cheyy haraam al‑yakrahah Allah lahaddi humman yiharrugu awlaadhum wa banaathum fi l‑naar le ilaahaathum.
32 *Wa intu kamaan ahfado wa tabbugu kulla l‑awaamir al‑ana anteethum leeku.
Ma tiziidu fooghum cheyy wa la tangusu minhum cheyy.