Muusa yiʼarrif al‑chaʼab be amal Allah
11
1 Hibbu Allah Ilaahku wa daayman ahfado wasiiyaatah wa churuutah wa gawaaniinah.
2 Intu al‑yoom ma misil iyaalku al‑ma chaafo cheyy wa la simʼo cheyy.
Wa laakin intu taʼarfuuh.
Allah Ilaahku darrasaaku wa iriftu azamatah wa iidah al‑chadiide wa duraaʼah al‑gawi.
3 Wa iriftu ajaaybah wa aʼmaalah al‑sawwaahum fi lubb Masir didd Firʼoon malik Masir wa didd kulla baladah.
4 Wa intu chiftu al‑sawwaah fi deech Masir wakit gaaʼidiin yitaaruduuku.
Hu galab almi al‑bahar al‑Ahmar fi kheelhum wa arabaathum.*
Wa Allah dammaraahum damaar kaamil lahaddi l‑yoom humman ma fiihum.
5 Wa intu chiftu al‑sawwaah leeku min al‑sahara lahaddi jiitu hini.
6 Wa intu chiftu al‑sawwaah fi Dataan wa Abiraam* iyaal Aliyaab min gabiilat Raʼuubiin giddaam kulla Bani Israaʼiil,
wakit al‑ard fatahat khachumha wa zaratathum,
humman wa aayilaathum wa khiyamhum wa kulla l‑naas al‑taabʼiin leehum.
7 Aywa,
be uyuunku chiftu kulla l‑amal al‑kabiir al‑sawwaah Allah.
8 Wa be da,
tabbugu kulla l‑wasaaya al‑nantiihum leeku al‑yoom achaan tabgo chudaad wa tadkhulu fi l‑balad wa tichiiluuha warasa.
9 Wa be da,
taskunu mudda tawiile fi l‑balad al‑Allah halaf yantiiha le juduudku wa le zurriiyithum.
Wa di l‑balad al‑malaane be l‑laban wa l‑asal.
Mustakhbal al‑chaʼab
10 Achaan al‑balad al‑tamchu leeha wa tichiiluuha warasa,
di ma misil balad Masir al‑intu maragtu minha.
Fi balad Masir intu titeerubu ziraaʼitku wa tazguuha be nagiliin almi misil jineene hana khudrawaat.
11 Wa laakin al‑balad al‑tamchu foogha wa tichiiluuha warasa di,
hi balad al‑indaha jibaal wa wudyaan mazgiiye be matar al‑sama.
12 Wa l‑balad di,
Allah Ilaahku gaaʼid yarʼaaha wa yiraakhibha min bidaayit al‑sana lahaddi aakhirha.
13 Wa kan tasmaʼo wasiiyaati al‑nantiihum leeku al‑yoom wa tihibbu Allah Ilaahku wa takhdumu leyah be kulla guluubku wa kulla fikirku,
14 khalaas hu yinazzil matar fi l‑wakit al‑muwaafig fi bidaayit al‑khariif wa l‑richaach.
Wa baʼadah,
yaji al‑darat al‑foogah tilimmu gamehku wa khamarku wa dihinku.
15 Wa hu yigawwim gechch fi ziraaʼitku le bahaayimku wa intu taakulu wa tachbaʼo.
16 Angarʼu ma tikhallu guluubku yinkhachcho wa taʼabudu ilaahaat aakhariin wa tasjudu giddaamhum.
17 Wa da achaan,
Allah yakhdab leeku wa khalaas yadhar al‑sama ma tinazzil matar wa l‑ard ma tigawwim maʼaach.
Wa khalaas,
tingachcho tawwaali min al‑balad al‑adiile al‑hu antaaha leeku.
18 Wa Allah gaal :
« Kalaami da ahfadooh fi guluubku wa khuttuuh fi fikirku wa sawwuuh misil alaama al‑tarbutuuha fi iideeku wa misil hilaal al‑tiʼalluguuh fi jabhaatku ambeenaat uyuunku.
19 Wa allumuuh le iyaalku wa kallumu beyah fi l‑beet wa fi l‑safar wa wakit raagdiin wa gaaymiin.
20 Wa aktubuuh fi iidaan biibaan buyuutku wa fi madkhal hillaalku.
21 Wa be da,
ayyaam umurku wa umur iyaalku yabgo tuwaal fi l‑balad al‑ana Allah halaft wa gult nantiiha le juduudku.
Wa da misil umur al‑sama min foog le l‑ard. »
22 Achaan kan tahfado kulla l‑wasaaya al‑naamurku beehum wa titabbuguuhum wa tihibbu Allah Ilaahku wa tichiilu derbah wa titmassako beyah,
23 khalaas Allah yatrud giddaamku al‑umam al‑kubaar wa chudaad minku.
Wa intu tichiilu arduhum.
24 Wa ayyi bakaan al‑rijilku tafjakhah yabga hanaaku.
Wa huduudku yabgo min al‑sahara fi l‑wati lahaddi Lubnaan fi l‑munchaakh wa min bahar al‑Furaat fi l‑sabaah lahaddi l‑bahar al‑Abyad fi l‑kharib.
25 Wa ma fi ayyi naadum yagdar yagiif giddaamku.
Wa misil Allah Ilaahku gaalah fi ayyi balad al‑tamchu foogha hu yidiss al‑ruʼub wa l‑khoof fi chaʼabha wa humman yakhaafo minku.
Al‑baraka wa l‑laʼana
26 Wa chiifu daahu al‑yoom ana nukhutt giddaamku al‑baraka wa l‑laʼana.
27 Wa talgo al‑baraka kan simiʼtu wasaaya Allah Ilaahku al‑naamurku beehum al‑yoom.
28 Wa talgo al‑laʼana kan ma tasmaʼo wasaaya Allah Ilaahku wa tikissu baʼiid min al‑derib al‑naamurku beyah al‑yoom wa titaabuʼu leeku ilaahaat aakhariin al‑awwal ma taʼarfuuhum.
29 Wa wakit Allah Ilaahku yiwaddiiku fi l‑balad al‑tamchu leeha wa tichiiluuha warasa,
atlaʼo fi raas jabal Gariziim wa ballukhu be l‑baraka wa atlaʼo fi raas jabal Ibaal wa ballukhu be l‑laʼana.
30 Wa l‑jibaal dool gaaʼidiin khaadi le bahar al‑Urdun ale jiihat al‑kharib fi balad al‑Kanʼaaniyiin al‑saakniin fi l‑Araba mugaabiliin Gilgaal jamb chadar al‑kubaar hana Muura.