Al‑sanduug wa liihaan al‑muʼaahada
10
1 Wa fi l‑wakit daak,
Allah gaal leyi ana Muusa :
« Sawwi liihaan itneen hana hajar misil al‑liihaan al‑awwal wa atlaʼ leyi fi l‑jabal.
Wa sawwi sanduug hana hatab kula.
2 Wa ana naktib fooghum al‑wasaaya al‑awwal katabtuhum fi l‑liihaan al‑inta kassartuhum.
Wa tidiss al‑liihaan dool fi lubb al‑sanduug. »
3 Wa khalaas,
ana sawweet sanduug hana hatab al‑sunt wa sawweet liihaan itneen hana hajar misil al‑liihaan al‑awwal* wa talaʼt fi l‑jabal wa l‑liihaan dool fi iidi.
4 Wa Allah katab fi l‑liihaan nafs al‑kalaam al‑maktuub fi l‑liihaan al‑awwal.
Wa dool al‑wasaaya al‑achara al‑kallamaaku beehum fi l‑jabal min ust al‑naar fi yoom al‑ijtimaaʼ.
Wa Allah antaahum leyi.
5 Wa khalaas,
ana gabbalt wa nazalt min al‑jabal wa dasseet al‑liihaan dool fi l‑sanduug al‑ana sawweetah wa humman gaaʼidiin foogah misil Allah amaraani beyah.
6 Wa Bani Israaʼiil gammo min biyaar Bani Yaʼkhaan wa macho le Muusira wa da bakaan al‑maat foogah Haaruun wa dafanooh.
Wa wileedah Aliʼaazar bigi raajil diin fi badalah.
7 Wa min al‑bakaan da,
macho le Gudguuda wa min Gudguuda,
macho le Yutbaata wa di l‑balad al‑foogha wudyaan almi.
8 Wa fi l‑wakit daak,
Allah azal gabiilat al‑Laawiyiin le yichiilu sanduug muʼaahadat Allah wa le yagiifu giddaamah wa yakhdumu leyah wa yibaaruku al‑chaʼab be usmah.
Wa da misil humman gaaʼidiin yisawwuuh lahaddi l‑yoom.
9 Wa achaan da,
al‑Laawiyiin ma induhum gisim wa la warasa maʼa akhwaanhum.
Wa Allah hu warasathum wa da misil Allah Ilaahku gaalah leehum.
10 Wa ana Muusa gaʼadt fi raas al‑jabal misil awwal,
40 yoom wa 40 leele.
Wa fi l‑marra di kula,
Allah simiʼni wa ma dawwar yidammirku.
11 Wa Allah gaal leyi :
« Gumm wa amchi giddaam al‑chaʼab da wa khalli yamchu yichiilu al‑balad al‑ana halaft nantiiha le juduudhum. »
Gaanuun al‑hubb wa l‑khoof min Allah
12 Wa Muusa gaal battaan :
Hassaʼ,
ya Bani Israaʼiil,
Allah Ilaahku yidoor minku chunu ?
Hu yidoor bas intu takhaafo minnah hu Allah Ilaahku wa tamchu fi kulla duruubah wa tihibbuuh wa taʼabuduuh be kulla guluubku wa kulla fikirku.
13 Wa tabbugu wasaaya Allah wa l‑gawaaniin al‑nantiihum leeku al‑yoom.
Wa da,
le kheerku.
14 Aywa,
Allah Ilaahku siid al‑samaawaat wa l‑ard wa kulla cheyy al‑fiihum.
15 Wa le abbahaatku bas,
Allah azalaahum le yihibbuhum.
Wa baʼadhum,
habbaaku intu zurriiyithum wa azalaaku min usut kulla l‑chuʼuub misil intu gaaʼidiin tichiifuuh al‑yoom.
16 Tahhuru guluubku wa ma tigawwu ruuseeku wa taʼaso Allah battaan.
17 Achaan Allah Ilaahku,
hu Ilaah al‑ilaahaat wa Rabb al‑arbaab.
Wa hu al‑Ilaah al‑Aziim wa l‑Gaadir wa l‑Mukhiif.
Wa hu aadil wa ma yarda be l‑rachwa.
18 Wa hu yahmi huguug al‑atiim wa l‑armala wa yihibb al‑ajnabi wa yantiih akil wa lubaas.
19 Wa intu kula hibbu al‑ajnabi achaan intu kula bigiitu ajaanib fi balad Masir.
20 Wa akhaafo min Allah Ilaahku wa aʼabuduuh wa atmassako beyah wa ahalfu be usmah hu bas.
21 Wa leyah hu bas achkuruuh,
hu Ilaahku al‑sawwa fi usutku al‑ajaayib al‑kubaar al‑bikhawwufu wa intu chiftuuhum be uyuunku.
22 Wa wakit abbahaatku wassalo fi Masir,
adadhum 70 raajil bas wa hassaʼ Allah Ilaahku sawwaaku katiiriin misil nujuum al‑sama.