Bani Israaʼiil ma akheer min al‑umam
9
1 Wa Muusa gaal :
Asmaʼo,
ya Bani Israaʼiil,
al‑yoom tagtaʼo bahar al‑Urdun le tamchu tichiilu al‑balad min al‑umam al‑kubaar wa chudaad minku.
Wa tichiilu mudunhum kubaar wa gawiyiin wa muhawwagiin be daraadir tuwaal lahaddi l‑sama.
2 Wa sukkaanhum Bani Anakh al‑humman kubaar wa tuwaal wa intu taʼarfuuhum wa simiʼtu al‑naas bihajju beehum wa buguulu :
« Yaatu yagdar yagiif giddaam Bani Anakh wa yihaaribhum ? »
3 Wa laakin aʼarfu tamaam kadar al‑yoom,
Allah Ilaahku hu bas maachi giddaamku misil naar al‑tahrig wa hu bas yidammirhum wa yiʼayyibhum giddaamku.
Wa be da,
intu tichiilu khumaamhum wa tidammuruuhum tawwaali misil Allah gaalah leeku.
4 Wa wakit Allah Ilaahku yatrudhum giddaamku,
ma tuguulu fi guluubku :
« Be sabab adaalitna Allah antaana al‑balad di.
» La !
Allah yaglaʼ al‑balad min al‑umam wa yantiiha leeku be sabab al‑fasaala al‑humman gaaʼidiin yisawwuuha.
5 Wa ma be sabab adaalitku wa la be sabab takhwa guluubku,
intu tichiilu al‑balad di.
Wa laakin be sabab fasaalit al‑umam dool,
Allah Ilaahak yaglaʼ minhum al‑balad wa yantiiha leeku.
Wa da,
le yiʼakkid al‑kalaam al‑hu waaʼad beyah juduudku Ibraahiim wa Ishaakh wa Yaakhuub.
6 Wa aʼarfu kadar Allah Ilaahku yikhalliiku tichiilu al‑balad al‑adiile di,
ma achaan intu saalihiin.
Laakin intu chaʼab raasku gawi.
Al‑chaʼab tallafo
7 Wa fakkuru ma tanso wakit khaddabtu Allah Ilaahku fi l‑sahara.
Wa min maragtu min balad Masir lahaddi jiitu hini,
intu aasiyiin Allah.
8 Wa fi Huuriib,
intu khaddabtu Allah wa hu khidib aleeku lahaddi dawwar yidammirku.
9 Wa wakit ana talaʼt fi l‑jabal le nichiil al‑liihaan hana l‑hajar al‑fooghum al‑muʼaahada al‑sawwaaha Allah maʼaaku,
ana gaʼadt 40 yoom wa 40 leele* wa la akalt wa la chiribt.
10 Wa Allah antaani al‑liihaan al‑itneen hana l‑hajar al‑hu katab fooghum.
Hu katab fooghum kulla l‑kalaam al‑hu gaalah leeku fi raas al‑hajar min ust al‑naar.
Wa da fi yoom al‑ijtimaaʼ.
11 Wa baʼad 40 yoom wa 40 leele,
Allah antaani al‑liihaan al‑itneen hana l‑hajar wa humman liihaan al‑muʼaahada.
12 Wa Allah gaal leyi :
« Gumm wa anzil ajala min hini achaan chaʼabak al‑inta maragtuhum min balad Masir tallafo.
Wa ajala ke humman kasso baʼiid min al‑derib al‑ana amartuhum yichiiluuh wa daggo leehum asnaam. »
13 Wa Allah gaal leyi :
« Ana chift al‑chaʼab da.
Wa daahu humman chaʼab raashum gawi.
14 Ma tiddakhkhal !
Ana nidammirhum wa nuguchchuhum min tihit al‑sama.
Wa minnak inta,
namrug umma gawiiye wa katiire min al‑chaʼab da. »
15 Wa khalaas,
ana gabbalt wa nazalt min al‑jabal.
Wa kulla l‑jabal da mugabbid naar wa l‑liihaan al‑itneen fi iideeni.
16 Wa ana chiftuku wa daahu aznabtu didd Allah Ilaahku wa sanaʼtu leeku sanam hana ijil.*
Wa ajala ke kasseetu baʼiid min al‑derib al‑amaraaku beyah Allah le tichiiluuh.
17 Wa khalaas,
ana chilt al‑liihaan al‑itneen wa zagaltuhum wa kassartuhum giddaamku.
Muusa sajad le Allah
18 Wa ana wagaʼt wa sajad giddaam Allah misil awwal le muddit 40 yoom wa 40 leele wa la akalt wa la chiribt.
Wa da be sabab kulla zunuubku wakit sawweetu al‑fasaala giddaam Allah le tikhaddubuuh.
19 Achaan ana khuft min al‑khadab wa l‑zaʼal hana Allah didduku lahaddi hu dawwar yidammirku.
Wa laakin Allah battaan khibil suʼaali.
20 Wa Allah khidib khadab chadiid le Haaruun wa dawwar yaktulah.
Wa laakin fi l‑wakit da,
ana chahadt Allah fi chaan Haaruun kula.
21 Wa ana chilt al‑sanam hana l‑ijil wa hu al‑zanib al‑intu sawweetuuh.
Wa harragtah fi l‑naar wa gattaʼtah wa rihiktah lahaddi bigi dagiig wa sabbeet al‑dagiig da fi l‑waadi al‑naazil min al‑jabal.
22 Wa intu khaddabtu Allah fi Tabʼiira* wa fi Massa* wa fi Khibruut Hattaawa.*
23 Wa wakit Allah rassalaaku min Khaadich Barniiʼa* wa gaal :
« Amchu wa chiilu al‑balad al‑anteetha leeku »,
intu isiitu amur Allah Ilaahku wa ma aamantu beyah wa ma simiʼtu kalaamah.
24 Wa intu aasiyiin Allah wa da min ana iriftuku.
25 Wa da l‑sabab al‑khallaani wagaʼt wa sajadt giddaam Allah le muddit 40 yoom wa 40 leele achaan Allah gaal hu yidoor yidammirku.*
26 Wa ana saʼalt Allah wa gult :
« Ya Allah al‑Rabb !
Ma tidammir chaʼabak achaan humman warasatak halaalak al‑inta fadeethum be azamatak wa maragtuhum min balad Masir be iid chadiide.
27 Ya Rabb !
Fakkir fi abiidak Ibraahiim wa Ishaakh wa Yaakhuub wa ma tichiif gu al‑raas hana l‑chaʼab da wa la fasaalithum wa la zunuubhum.
28 Wa be da,
naas al‑balad al‑maragtina minha ma yuguulu :
‹ Allah ma indah gudra le yidissuhum fi l‑balad al‑waaʼadaahum beeha wa yakrahhum.
Wa fi chaan da,
hu maragaahum le yikhalliihum yumuutu fi l‑sahara. ›
29 Wa laakin chaʼabak,
humman misil warasatak wa inta maragtuhum be gudurtak al‑kabiire wa duraaʼak al‑gawi. »