Allah allam Bani Israaʼiil fi l‑sahara
8
1 Wa Muusa gaal :
Hassaʼ da,
kulla l‑wasaaya al‑naamurku beehum al‑yoom,
ahfadoohum wa tabbuguuhum.
Wa da achaan tahyo wa tabgo katiiriin wa Allah yiwaddiiku wa tichiilu warasa al‑balad al‑hu halaf yantiiha le juduudku.
2 Wa fakkuru fi l‑derib al‑waddaaku foogah Allah Ilaahku fi muddit 40 sana fi l‑sahara le yidaʼʼifku.
Wa da le yijarribku wa yaʼarif al‑fi guluubku wa yichiif kan tahfado wasiiyaatah walla la.
3 Wa Allah daʼʼafku be l‑juuʼ wa baʼad da,
akkalaaku al‑manna* wa la intu wa la juduudku ma taʼarfuuha min awwal.
Wa da achaan yiʼarrifku kadar al‑insaan ma yiʼiich be l‑akil wiheedah laakin yiʼiich be kulli kilme al‑yuguulha Allah.
4 Wa fi muddit al‑arbaʼiin sana dool,
khulgaanku ma gidmo leeku fi jilidku wa rijleeku kula ma wirmo.
5 Wa aʼarfu tamaam wa khuttu fi guluubku kadar Allah Ilaahku yiʼaddibku misil naadum yiʼaddib wileedah.
Al‑ard al‑waaʼad beeha Allah
6 Wa ahfado wasaaya Allah Ilaahku achaan tamchu fi derbah wa takhaafo minnah.
7 Wa be da,
Allah Ilaahku yiwaddiiku fi balad adiile al‑indaha wudyaan wa uyuun almi wa almi al‑yamrug min tihit al‑ard wa yisiil fi l‑kadaade wa l‑jibaal.
8 Wa di l‑balad al‑indaha gameh abyad wa gameh ahmar wa inab wa tiin wa rummaan wa dihin zaytuun wa asal.
9 Wa fi l‑balad di,
taakulu khubza bala taʼab wa cheyy yigassir leeku kula ma fiih.
Wa hujaar al‑balad di induhum hadiid wa min jibaalha,
tamurgu nahaas.
10 Wa wakit taakulu wa tachbaʼo,
tahmudu Allah Ilaahku fi chaan al‑balad al‑adiile al‑antaaha leeku.
11 Ahfado nufuusku wa ma tanso Allah Ilaahku lahaddi ma titabbugu al‑wasaaya wa l‑gawaaniin wa l‑churuut al‑ana Muusa nantiihum leeku al‑yoom.
12 Wa da wakit taakulu wa tachbaʼo wa wakit tabnu buyuut adiiliin wa taskunu fooghum.
13 Wa da wakit yikattir leeku bagarku wa khanamku wa dahabku wa fudditku wa kulla cheyy al‑hanaaku.
14 Fi l‑wakit da,
angarʼu !
Khalli guluubku ma yistakbaro wa tanso Allah Ilaahku al‑maragaaku min Masir balad al‑ubuudiiye.
15 Wa hu al‑waddaaku fi l‑sahara al‑wasiiʼe wa l‑mukhiife,
al‑indaha dabiib niiraani wa agaarib.
Wa di balad al‑atach al‑ma yalgo foogha almi.
Wa laakin hu marag leeku almi min al‑hajar al‑gawi.*
16 Wa hu akkalaaku al‑manna fi l‑sahara al‑abadan juduudku ma irfooha wa battaan jaab leeku al‑duʼuf wa jarrabaaku wa fi l‑akhiir,
sawwa leeku al‑kheer.
17 Angarʼu,
ma tuguulu fi guluubku :
« Be juhudna wa gudrat duraaʼna aniina ligiina al‑khuna di. »
18 Fakkuru fi Allah Ilaahku achaan hu bas al‑antaaku al‑gudra al‑beeha ligiitu al‑khuna di.
Wa be da,
lahaddi l‑yoom hu akkad al‑muʼaahada al‑sawwaaha maʼa abbahaatku.