Allah amar yidammuru al‑umam
7
1 Wa Muusa gaal battaan :
Wakit Allah Ilaahku yiwaddiiku fi l‑balad al‑tadkhulu foogha wa tichiiluuha warasa,
hu yatrud giddaamku sabʼa umam katiiriin wa chudaad minku wa humman al‑Hittiyiin wa l‑Girgaachiyiin wa l‑Amuuriyiin wa l‑Kanʼaaniyiin wa l‑Firizziyiin wa l‑Hiwwiyiin wa l‑Yabuusiyiin.
2 Wa wakit Allah Ilaahku yansurku fooghum wa yisallimhum leeku fi iideeku,
waajib tidammuruuhum marra waahid wa abadan ma tisawwu maʼaahum alaakha wa la tarhamoohum.
3 Al‑umam dool ma taakhudu minhum wa la tantu banaatku le awlaadhum wa la taakhudu le awlaadku min banaathum.
4 Achaan da,
yibaʼʼid iyaalku min Allah wa yaʼabudu ilaahaat aakhariin wa Allah yakhdab aleeku khadab chadiid wa yidammirku bala taʼkhiir.
5 Wa laakin daahu al‑cheyy al‑tisawwuuh le l‑umam dool.
Haddumu madaabihhum wa armu hujaarhum al‑khazzoohum le l‑ibaada wa kassuru iidaanhum al‑khazzoohum le ibaadat Achiira wa harrugu asnaamhum.
6 Achaan intu chaʼab mukhassasiin le Allah Ilaahku wa Allah Ilaahku azalaaku min kulla l‑chuʼuub al‑gaaʼidiin fi l‑ard le tabgo chaʼabah halaalah.
7 Wa Allah habbaaku wa azalaaku ma achaan intu katiiriin min kulla l‑chuʼuub al‑aakhariin.
La !
Intu bas al‑chiyya.
8 Achaan Allah yihibbuku bas,
hu hafad al‑haliife al‑halaf beeha le juduudku.
Wa fi chaan da bas,
hu maragaaku be iid chadiide wa fadaaku min iid Firʼoon malik Masir balad al‑ubuudiiye.
9 Wa be da,
taʼarfu tamaam kadar Allah Ilaahku,
hu bas al‑Rabb.
Wa hu saadikh wa yahfad muʼaahadatah wa kheerah le alif zurriiye.
Wa da,
le l‑naas al‑yihibbuuh wa yitabbugu wasiiyaatah.
10 Wa laakin yijaazi al‑yakrahooh wa yidammirhum wa bala taʼkhiir al‑yakrahooh hu yijaaziihum.
11 Wa ahfado al‑wasaaya wa l‑churuut wa l‑gawaaniin al‑naamurku beehum al‑yoom wa tabbuguuhum.
12 Kan intu simiʼtu al‑churuut dool wa hafadtuuhum wa tabbagtuuhum,
Allah Ilaahku kula yahfad leeku al‑muʼaahada wa l‑kheer al‑halaf beyah le juduudku.
13 Wa yihibbuku wa yibaarikku wa yikattirku wa yibaarik zurriiyitku wa intaaj arduku wa gamehku wa khamarku al‑jadiid wa dihinku wa waaluudit bagarku wa khanamku fi l‑ard al‑halaf le juduudku wa gaal yantiiha leeku.
14 Wa intu tabgo mubaarakiin ziyaada min kulla l‑chuʼuub al‑aakhariin wa fi lubbuku,
ma fi raajil wa la mara aagre wa ma fi bahiime aagre fi lubb bahaayimku.
15 Wa Allah yibaʼʼid minku ayyi marad.
Wa ma yirassil leeku al‑amraad al‑fasliin al‑chiftuuhum fi Masir wa laakin yirassilhum le kulla l‑naas al‑yakrahooku.
16 Wa tidammuru kulla l‑chuʼuub al‑yisallimhum leeku Allah Ilaahku wa ma tihinnu fooghum.
Wa ma taʼabudu ilaahaathum achaan ma yabgo leeku charak.
17 Wa akuun tuguulu fi guluubku :
« Al‑umam dool katiiriin minnina wa kikkeef nagdaro naglaʼo arduhum ? »
18 Wa laakin ma takhaafo minhum.
Fakkuru fi l‑cheyy al‑sawwaah Allah Ilaahku fi l‑malik Firʼoon wa kulla balad Masir.
19 Wa intu chiftu be uyuunku al‑alaamaat wa l‑ajaayib wa l‑iid al‑chadiide wa l‑duraaʼ al‑gawi al‑maragaaku beehum Allah Ilaahku.
Wa be misil da,
Allah Ilaahku yisawwi fi kulla l‑chuʼuub al‑intu gaaʼidiin takhaafo minhum.
20 Wa Allah Ilaahku yirassil leehum nahale tidammir al‑faddalo minhum wa l‑mullabbidiin minku.
21 Ma tinbahtu minhum achaan Allah Ilaahku gaaʼid fi usutku wa hu al‑Ilaah al‑aziim wa l‑mukhiif.
22 Wa Allah Ilaahku yatrud al‑umam dool baʼiid minku be chiyya chiyya.
Intu ma tagdaro tikammuluuhum tawwaali ke achaan haywaanaat al‑kadaade yabgo katiiriin didduku.
23 Wa Allah Ilaahku yisallim leeku al‑chaʼab da fi iidku wa yibarjilhum marra waahid lahaddi yiddammaro.
24 Wa yisallim leeku muluukhum wa intu tuguchchuuhum min tihit al‑sama wa waahid minhum ma yagdar yagiif giddaamku lahaddi tikammuluuhum kulluhum.
25 Wa harrugu asnaam ilaahaathum be naar wa ma tatmaʼo wa tichiilu min al‑fudda wa l‑dahab al‑fooghum le nufuusku achaan da yabga leeku charak yakrubku wa Allah Ilaahku kula harramah.
26 Wa ma tijiibu al‑haraam fi buyuutku achaan beyah tahlako misilhum.
Wa harrumu al‑haraam achaan hu yijiib al‑halaak.