Al‑mamnuuʼ le l‑chaʼab fi wakt al‑hizin
14
1 Wa intu iyaal Allah Ilaahku.
Wakit tahzano le l‑mayyit ma tijarruhu jisimku wa la tizayyunu ruuseeku min giddaam.
2 Achaan intu chaʼab mukhassasiin le Allah Ilaahku wa Allah azalaaku min kulla l‑chuʼuub al‑gaaʼidiin fi l‑ard le tabgo chaʼabah halaalah.
Al‑laham al‑halaal wa l‑haraam
3 Ma taakulu al‑haraam.
4 Wa daahu al‑bahaayim al‑tagdaro taakuluuhum.
Tagdaro taakulu al‑toor wa l‑kharuuf wa l‑sakhal
5 wa l‑aryal wa l‑khazaal wa l‑wahach wa l‑agas wa l‑amtigdim wa l‑jaamuus wa l‑teetal.
6 Wa tagdaro taakulu kulla l‑bahaayim al‑induhum duluf wa yagsaʼo jurra.
7 Wa min al‑induhum duluf aw yagsaʼo jurra,
ma taakulu al‑jamal wa l‑arnab wa tees al‑hajar.
Humman dool yagsaʼo jurra wa laakin ma induhum duluf wa humman dool haraam leeku.
8 Wa l‑khinziir hu indah duluf wa laakin ma yagsaʼ jurra.
Wa achaan da,
hu haraam leeku wa la taakulu lahamah wa la tilammusu rimmitah.
9 Wa min haywaanaat al‑bahar,
tagdaro taakulu kulla l‑induhum awwaamaat wa gichir.
10 Wa laakin al‑ma induhum awwaamaat wa la gichir,
ma taakuluuhum achaan humman dool haraam leeku.
11 Wa tagdaro taakulu kulla l‑tuyuur al‑halaaliin.
12 Wa laakin min al‑tuyuur,
ma taakulu al‑nisir wa jaga wa sagur al‑bahar
13 wa sagur al‑jidaad wa kulla nafar al‑suguura
14 wa l‑khurbaat wa kulla nafarhum
15 wa l‑naʼaam wa amguggum wa tuyuur al‑bahar wa kulla nafar al‑suguura
16 wa l‑buuma wa l‑kurki wa l‑buuma al‑beeda
17 wa amʼakk wa l‑dagal wa l‑wizziin
18 wa abunkhanam wa kulla nafar al‑riheew wa l‑hudhud wa abunrigeeʼ.
19 Wa kulla l‑hacharaat al‑induhum janaahe muharramiin leeku,
ma taakuluuhum.
20 Wa tagdaro taakulu kulla l‑tuyuur al‑halaaliin.
21 Ma taakulu laham al‑bahiime al‑mayte.
Antuuha le l‑ajnabi al‑gaaʼid maʼaaku yaakulha aw biiʼuuha le l‑khariib.
Achaan intu chaʼab mukhassasiin le Allah Ilaahku.
Wa ma tirakkubu al‑sakhal fi laban ammah.
Amurgu al‑uchur
22 Wa kulli sana,
amurgu al‑uchur hana kulla cheyy al‑teerabtuuh wa gamma fi ziraaʼitku.
23 Wa giddaam Allah Ilaahku fi l‑bakaan al‑hu yaʼazilah le yukhutt foogah usmah,
intu taakulu al‑uchur hana gamehku wa khamarku al‑jadiid wa dihinku wa awlaad al‑bikir hana bagarku wa khanamku.
Wa be da,
tilʼallamo al‑khoof min Allah Ilaahku kulla yoom.
24 Wa kan al‑derib yabga leeku tawiil le tiwaddu al‑uchuur wa kan al‑bakaan al‑yaʼazilah Allah Ilaahku le yukhutt foogah usmah bigi minku baʼiid wa kan Allah Ilaahku kattar foogku al‑baraka,
25 khalaas baddulu al‑uchuur dool be fudda wa wadduuha le l‑bakaan al‑yaʼazilah Allah Ilaahku.
26 Wa hinaak battaan baddulu al‑fudda di be ayyi cheyy al‑tidooruuh misil al‑bagar wa l‑khanam wa l‑khamar wa l‑charaab al‑mukhammar wa kulla chahwaat nufuusku.
Wa aakulu giddaam Allah Ilaahku wa afraho intu wa aayilaatku.
27 Wa ma tanso al‑Laawiyiin al‑saakniin fi hillaalku achaan humman ma induhum gisim wa la warasa maʼaaku.
28 Wa fi kulli talaata sana,
amurgu kulla l‑uchuur hana intaaj ziraaʼitku hana l‑sana di wa dummuuh fi lubb al‑hille al‑intu gaaʼidiin foogha.
29 Wa khalaas,
khalli yaju al‑Laawiyiin al‑ma induhum gisim wa la warasa maʼaaku wa l‑ajaanib wa l‑ataama wa l‑araamil al‑gaaʼidiin maʼaaku,
khalluuhum kulluhum yaju yaakulu wa yacharbo.
Wa be da,
Allah Ilaahku yibaarikku fi kulla cheyy al‑tisawwuuh.