Al‑gabaayil al‑sabaah le bahar al‑Urdun
32
1 Wa gabiilat Raʼuubiin wa gabiilat Gaad induhum bahaayim katiiriin marra waahid.
Wa wakit chaafo ard Yaʼziir wa ard Gilʼaad,
humman irfo kadar al‑ard di tiwaafig maʼa l‑bahaayim.
2 Wa khalaas jo le Muusa wa le raajil al‑diin Aliʼaazar wa le chuyuukh al‑mujtamaʼ wa gaalo :
3 « Al‑hillaal hana Ataruut wa Diibuun wa Yaʼziir wa Nimra wa Hachbuun wa Aliʼaala wa Sabaam wa Nabu wa Baʼuun dool hillaal
4 hana l‑balad al‑Allah galaʼaaha wa antaaha le mujtamaʼ Bani Israaʼiil.
Wa l‑ard di muwaafge le l‑bahaayim.
Wa daahu aniina abiidak kula indina bahaayim. »
5 Wa gaalo battaan :
« Kan tarda leena,
antiina aniina abiidak al‑ard di misil warasa.
Ma tajburna nagtaʼo bahar al‑Urdun. »
6 Wa Muusa gaal le gabiilat Gaad wa gabiilat Raʼuubiin :
« Maala tikhallu akhwaanku yamchu al‑harib wa intu tagoodu hini ?
7 Maala tifachchulu Bani Israaʼiil achaan ma yamchu fi l‑balad al‑Allah antaaha leehum ?
8 Wa da misil al‑cheyy al‑abbahaatku sawwooh wakit ana rassaltuhum min Khaadich Barniiʼa yuruukhu al‑balad.
9 Humman macho lahaddi waadi Achkuul wa baʼad irfo al‑balad,
gammo yikallumu le yifachchulu Bani Israaʼiil achaan ma yadkhulu fi l‑balad al‑Allah antaaha leehum.
10 « Wa fi l‑wakit daak,
Allah khidib khadab chadiid wa halaf wa gaal :
11 ‹ Abadan al‑naas al‑umurhum min 20 sana wa foog al‑marago min balad Masir dool,
ma yadkhulu fi l‑balad al‑ana waaʼadt beeha Ibraahiim wa Ishaakh wa Yaakhuub achaan al‑naas dool abo ma yasmaʼo kalaami.
12 Illa Kaalib wileed Yafuuna al‑Khinaazi wa Yachuuʼ wileed Nuun humman dool bas yadkhulu balad Kanʼaan achaan humman taabaʼo kalaami ana Allah. ›
13 « Wa khalaas,
Allah khidib khadab chadiid le Bani Israaʼiil wa khallaahum aayriin fi l‑sahara le muddit 40 sana lahaddi kulla l‑zurriiye al‑sawwo al‑fasaala giddaam Allah maato.
14 Wa daahu intu kula tidooru tichiilu derib abbahaatku al‑muznibiin wa battaan tijiibu khadab Allah al‑muhrig fi Bani Israaʼiil.
15 Achaan kan abeetu ma titiiʼu Allah,
hu battaan yikhalliiku fi l‑sahara le mudda tawiile wa be da,
tisabbubu moot hana kulla l‑chaʼab da. »
16 Wa khalaas,
humman garrabo le Muusa wa gaalo leyah :
« Aniina nisawwu zaraayib le khanamna wa bahaayimna wa nabnu mudun le iyaalna hini.
17 Wa baʼad da,
nichiilu silaahna wa namchu giddaam Bani Israaʼiil wa niwadduuhum lahaddi fi l‑bakaan al‑Allah antaahum.
Wa laakin iyaalna yagoodu hini fi l‑mudun al‑gawiyiin min sukkaan al‑balad di.
18 Wa aniina ma nigabbulu fi buyuutna lahaddi ayyi naadum min Bani Israaʼiil yalga warasatah.
19 Wa aniina ma nalgo maʼaahum warasa khaadi le bahar al‑Urdun achaan warasatna aniina gaaʼide be jaayi le bahar al‑Urdun fi nussah al‑sabhaani. »
20 Wa Muusa gaal :
« Tabbugu kalaamku wa assallaho wa haarubu fi chaan Allah.
21 Wa khalli kulla rujaalku yissallaho wa yagtaʼo bahar al‑Urdun fi chaan Allah wa yichiilu ard udwaanah.
22 Wa khalli rujaalku ma yigabbulu lahaddi al‑ard tabga tihit masʼuuliiyit Allah.
Wa misil da,
wa la Allah wa la Bani Israaʼiil kula yajʼalooku bariyiin wa khalaas al‑ard al‑intu gaaʼidiin foogha,
Allah yarda hi tabga misil warasatku.
23 Wa laakin kan waʼadku da ma tabbagtuuh,
intu sawweetu zanib didd Allah wa be da,
taʼarfu kadar zanibku da yalhagku.
24 Wa hassaʼ da,
abnu mudun le iyaalku wa zaraayib le khanamku wa laakin al‑waʼad al‑gultuuh timmuuh. »
25 Wa gabiilat Gaad wa gabiilat Raʼuubiin gaalo le Muusa :
« Abiidak yitabbugu amrak,
ya siidna.
26 Hassaʼ da,
iyaalna wa awiinna wa bahaayimna wa kulla maalna yagoodu hini fi mudun Gilʼaad.
27 Wa aniina abiidak kamaan nissallaho wa namchu al‑harib tihit amur Allah misil inta gultah ya siidna. »
28 Wa fi sababhum,
Muusa anta amur le raajil al‑diin Aliʼaazar wa le Yachuuʼ wileed Nuun wa le kubaaraat al‑aayilaat hana gabaayil Bani Israaʼiil.
29 Wa gaal :
« Kan gabiilat Gaad wa gabiilat Raʼuubiin yissallaho wa yagtaʼo bahar al‑Urdun maʼaaku wa yihaarubu fi chaan Allah lahaddi al‑balad tabga tihit masʼuuliiyitku,
intu kula tantuuhum balad Gilʼaad misil warasa.
30 Wa laakin kan abo ma yissallaho wa yagtaʼo maʼaaku,
humman yalgo warasathum maʼaaku fi balad Kanʼaan. »
31 Wa gabiilat Gaad wa gabiilat Raʼuubiin raddo leyah wa gaalo :
« Aniina nitabbugu kalaam Allah al‑gaalah leena aniina abiidak.
32 Wa nichiilu al‑silaah wa namchu le balad Kanʼaan misil Allah amaraana wa laakin warasatna min al‑ard tukuun be hini jaay le bahar al‑Urdun. »
33 Wa le gabiilat Gaad wa gabiilat Raʼuubiin wa nuss min gabiilat Manassa wileed Yuusuf,
Muusa antaahum mamlakat Siihuun malik al‑Amuuriyiin wa mamlakat Oog malik Baachaan yaʼni kulla l‑balad wa mudunha wa l‑hillaal al‑muhawwigiinhum.
34 Wa gabiilat Gaad bano hillaal Diibuun wa Ataruut wa Aruuʼir
35 wa Ataruut Chuufan wa Yaʼziir wa Yugbaha
36 wa Beet Nimra wa Beet Haaraan.
Wa humman bano al‑mudun al‑gawiyiin dool wa sawwo zaraayib le khanamhum.
37 Wa gabiilat Raʼuubiin bano Hachbuun wa Aliʼaala wa Khiryataayim
38 wa Nabu wa Baʼal Maaʼoon wa Sibma.
Wa humman khayyaro asaame hana hillaal waahidiin wa anto asaame jadiidiin le l‑hillaal al‑humman banoohum.
39 Wa khachum beet Makiir wileed Manassa macho balad Gilʼaad wa tarado al‑Amuuriyiin minha wa chaalooha.
40 Wa khalaas,
Muusa anta balad Gilʼaad le khachum beet Makiir wileed Manassa le yaskunu foogha.
41 Wa zurriiyit Yayiir wileed Manassa macho chaalo furgaan al‑Amuuriyiin wa sammaahum furgaan Yayiir.
42 Wa Nuubah macha chaal Khanaat wa l‑hillaal al‑taabʼiin leeha wa sammaaha be usmah Nuubah.