Al‑harib didd al‑Midyaaniyiin
31
1 Wa Allah hajja le Muusa wa gaal :
2 « Chiil le Bani Israaʼiil taarhum fi l‑Midyaaniyiin wa baʼad da,
tumuut wa talhag abbahaatak. »
3 Wa Muusa gaal le l‑chaʼab :
« Khalli rujaal waahidiin minku yichiilu silaahhum le yihaarubu al‑Midyaaniyiin wa yichiilu fiihum taar be usum Allah.
4 Wa chiilu 1 000 raajil min ayyi gabiila min gabaayil Bani Israaʼiil wa rassuluuhum le l‑harib da. »
5 Wa min aalaaf Bani Israaʼiil chaalo min ayyi gabiila 1 000 raajil wa adadhum bigi 12 000 rujaal musallahiin le l‑harib.
6 Wa Muusa chaal min ayyi gabiila 1 000 raajil wa rassalaahum le l‑harib.
Wa raajil al‑diin Fiinhaas wileed Aliʼaazar kula macha maʼaahum.
Wa hu indah kulla l‑muʼiddaat al‑mukhassasiin wa l‑burunji al‑yantu beyah ichaaraat fi l‑harib.
7 Wa humman macho wa haarabo balad Midyaan misil Allah amar beyah Muusa wa katalo kulla l‑rujaal.
8 Wa maʼa l‑rujaal dool humman katalo muluuk Midyaan al‑khamsa,
Awiya wa Raakhim wa Suur wa Huur wa Raabiʼ.
Wa Balʼaam wileed Baʼuur kula katalooh maʼaahum.
9 Bani Israaʼiil karabo awiin al‑Midyaaniyiin wa iyaalhum masaajiin wa nahabo kulla bahaayimhum wa khumaamhum wa maalhum.
10 Wa harrago kulla l‑mudun wa l‑furgaan hana l‑Midyaaniyiin.
11 Wa humman jaabo maʼaahum kulla l‑khaniime hana l‑khumaam al‑nahabooh wa l‑bahaayim wa l‑kasiibe hana l‑naas al‑karaboohum.
12 Wa jaabo al‑masaajiin wa l‑khumaam al‑nahabooh fi l‑harib wa l‑khaniime le Muusa wa le raajil al‑diin Aliʼaazar wa le mujtamaʼ Bani Israaʼiil al‑gaaʼidiin fi l‑fariig fi kadaadit Muwaab fi khachum bahar al‑Urdun mugaabil Ariiha.
13 Wa khalaas Muusa wa raajil al‑diin Aliʼaazar wa kulla chuyuukh al‑mujtamaʼ marago le yilaaguuhum barra min al‑fariig.
14 Wa Muusa ziʼil fi khuyyaad al‑deech wakit gabbalo min al‑harib.
Wa humman khuyyaad al‑aalaaf wa khuyyaad al‑miyaat min al‑askar.
15 Wa gaal :
« Maala intu khalleetu al‑awiin dool hayyiin ?
16 Dool bas ma al‑awiin al‑awwal Balʼaam gaal leehum khalli yilizzu Bani Israaʼiil yaʼaso Allah ?
Wa hinna bas ma jaaban muchkilat Faʼuur lahaddi l‑waba nazal fi chaʼab Allah ?
17 Wa hassaʼ da,
aktulu kulla l‑dukuur min al‑iyaal wa kulli mara al‑daakhle beet.
18 Wa laakin al‑banaat al‑udriiyaat al‑yoom waahid ma chaafan raajil,
ma taktuluuhin,
khalluuhin leeku.
19 « Wa kan leeku intu,
agoodu barra min al‑fariig lahaddi sabʼa yoom.
Wa ayyi naadum minku al‑katal naadum aw limis janaaza kula,
waajib yitahhir nafsah fi l‑yoom al‑taalit wa l‑yoom al‑saabiʼ.
Attahharo intu zaatku wa kulla masjuunaatku.
20 Tahhuru kulla cheyy al‑min gumaach wa kulla cheyy al‑min farwa wa kulla cheyy al‑min suuf al‑inze wa kulla cheyy al‑min hatab. »
21 Wa raajil al‑diin Aliʼaazar gaal le l‑askar al‑jo min al‑harib :
« Daahu churuut al‑Tawraat al‑Allah amar beehum Muusa.
22 Al‑dahab wa l‑fudda wa l‑nahaas wa l‑hadiid wa l‑tuuta wa l‑hadiid al‑azrag
23 wa ayyi cheyy al‑yahmal al‑naar,
dissuuh fi l‑naar le yabga taahir.
Wa baʼad da,
titahhuruuh be almi al‑tathiir kula.
Wa ayyi cheyy al‑ma yahmal al‑naar,
dissuuh fi almi al‑tathiir da.
24 Wa tikhassulu khulgaanku fi l‑yoom al‑saabiʼ wa khalaas tabgo taahiriin.
Wa baʼad da,
tadkhulu fi l‑fariig. »
Gassimiin al‑khaniime
25 Wa Allah gaal le Muusa :
26 « Inta wa raajil al‑diin Aliʼaazar wa kubaaraat al‑aayilaat hana mujtamaʼ Bani Israaʼiil ahsubu kulla l‑khaniime al‑nahabooha fi l‑harib wa l‑naas wa l‑bahaayim al‑karaboohum.
27 Wa gassim al‑khumaam al‑nahabooh da ambeen al‑askar al‑macho fi l‑harib wa kulla mujtamaʼ Bani Israaʼiil.
28 Wa chiil zakaat Allah min gisim hana l‑askar al‑macho fi l‑harib.
Waahid fi l‑khumsumiya min al‑naas wa waahid fi l‑khumsumiya min al‑bagar wa l‑hamiir wa l‑khanam.
29 Wa chiil al‑zaka di min gisim al‑askar wa antiiha le raajil al‑diin Aliʼaazar hadiiye le Allah.
30 Wa min gisim chaʼab Bani Israaʼiil kamaan,
chiil waahid fi l‑khamsiin min al‑naas wa l‑bagar wa l‑hamiir wa l‑khanam wa kulla l‑bahaayim.
Wa antiih le l‑Laawiyiin al‑gaaʼidiin yahfado kheemat Allah. »
31 Wa Muusa wa raajil al‑diin Aliʼaazar sawwo kulla cheyy misil Allah amar beyah Muusa.
32 Wa min al‑kasiibe wa l‑khaniime al‑nahabooha al‑askar faddal 675 000 khanam
33 wa 72 000 bagar
34 wa 61 000 hamiir.
35 Wa l‑banaat al‑udriiyaat al‑yoom waahid ma chaafan raajil kamaan adadhin 32 000.
36 Wa l‑gisim al‑antooh le l‑askar al‑macho fi l‑harib,
hu 337 500 khanam
37 wa minhum 675 khanam zaka le Allah.
38 Wa l‑bagar adadhum 36 000 wa minhum 72 dool zaka le Allah.
39 Wa l‑hamiir kamaan adadhum 30 500 wa minhum 61 dool zaka le Allah.
40 Wa l‑banaat al‑udriiyaat adadhin 16 000 wa minhin 32 dool zaka le Allah.
41 Wa Muusa anta al‑zaka al‑yigaddumuuha hadiiye le Allah le raajil al‑diin Aliʼaazar wa da misil Allah amarah beyah.
42 Wa kan le gisim mujtamaʼ Bani Israaʼiil al‑Muusa chaalah min al‑askar al‑macho fi l‑harib da,
43 daahu gisim Bani Israaʼiil wa kulla ke indah 337 500 khanam
44 wa 36 000 bagar
45 wa 30 500 hamiir
46 wa 16 000 banaat udriiyaat.
47 Wa min gisim Bani Israaʼiil,
Muusa chaal waahid fi l‑khamsiin min al‑naas wa l‑bahaayim wa antaah le l‑Laawiyiin al‑gaaʼidiin yahfado kheemat Allah.
Wa da misil Allah amar beyah Muusa.
Al‑khuyyaad yigaddumu hadiiye
48 Wa khuyyaad al‑deech al‑macho fi l‑harib jo le Muusa wa humman khuyyaad al‑aalaaf wa khuyyaad al‑miyaat min al‑askar.
49 Wa gaalo leyah :
« Aniina abiidak hasabna askarna wa naadum waahid kula minnina ma fagadnaah.
50 Wa achaan da,
ayyi waahid minnina yigaddim hadiiye le Allah min al‑achya hana l‑dahab al‑ligiinaahum misil al‑salaasil wa l‑suure wa l‑khatam wa l‑khuruus wa l‑hafaayid le yabgo leena kaffaara giddaam Allah. »
51 Wa Muusa wa raajil al‑diin Aliʼaazar chaalo minhum al‑achya hana l‑dahab al‑madguug.
52 Wa kulla l‑dahab al‑jaabooh khuyyaad al‑aalaaf wa khuyyaad al‑miyaat hadiiye le Allah da,
adadah 193 kiilo.
53 Wa l‑askar kamaan ayyi waahid karab al‑khumaam al‑nahabah le nafsah.
54 Wa Muusa wa raajil al‑diin Aliʼaazar ligo al‑dahab min khuyyaad al‑aalaaf wa khuyyaad al‑miyaat wa waddooh fi kheemat al‑ijtimaaʼ wa be da,
Allah yifakkir fi Bani Israaʼiil.