Maraahil al‑masaar hana Bani Israaʼiil
33
1 Wa dool maraahil al‑masaar hana Bani Israaʼiil wakit marago min balad Masir hasab majmuuʼaathum al‑askariiye tihit khiyaadit Muusa wa Haaruun.
2 Wa Muusa yaktib al‑bakaanaat al‑yisiiru minhum wa l‑yanzulu fooghum hasab amur Allah wa daahu maraahilhum hasab masaarhum.
3 Wa humman gammo min Raʼamsiis yoom 15 hana l‑chahar al‑awwal wa da fi l‑yoom al‑taani hana iid al‑Fisha al‑awwal.
Wa fi l‑yoom da,
Bani Israaʼiil gammo macho be kulla hurriiye giddaam kulla l‑Masriyiin.
4 Wa l‑Masriyiin gaaʼidiin yadfunu janaazaat iyaalhum awlaad al‑bikir al‑Allah katalaahum.
Wa katalaahum achaan yiʼaakhib ilaahaathum kula.
5 Wa Bani Israaʼiil saaro min Raʼamsiis wa nazalo fi Sukkuut.
6 Wa saaro min Sukkuut wa nazalo fi Itaam fi taraf al‑sahara.
7 Wa saaro min Itaam wa gabbalo jo fi Khachum al‑Hiruut mugaabil Baʼal Safuun wa nazalo giddaam Migduul.
8 Wa saaro min Khachum al‑Hiruut wa gataʼo al‑bahar wa wassalo fi l‑sahara.
Wa baʼad talaata yoom hana ruwaakha fi lubb saharat Itaam,
humman nazalo fi Murra.
9 Wa gammo min Murra wa wassalo fi Iliim.
Wa da l‑bakaan al‑indah 12 een hana almi wa 70 chadara hana tamur wa fi l‑bakaan da bas,
humman nazalo.
10 Wa saaro min Iliim wa nazalo jamb al‑bahar al‑Ahmar.
11 Wa saaro min al‑bahar al‑Ahmar wa nazalo fi saharat Siin.
12 Wa saaro min saharat Siin wa nazalo fi Dufga.
13 Wa saaro min Dufga wa nazalo fi Aluuch.
14 Wa saaro min Aluuch wa nazalo fi Rafidiim wa fi l‑bakaan da,
al‑chaʼab ma ligo almi hana charaab.
15 Wa saaro min Rafidiim wa nazalo fi saharat Siinaaʼ.
16 Wa saaro min saharat Siinaaʼ wa nazalo fi Khibruut Hattaawa.
17 Wa saaro min Khibruut Hattaawa wa nazalo fi Hasiruut.
18 Wa saaro min Hasiruut wa nazalo fi Ritma.
19 Wa saaro min Ritma wa nazalo fi Rimmuun Faaris.
20 Wa saaro min Rimmuun Faaris wa nazalo fi Libna.
21 Wa saaro min Libna wa nazalo fi Rissa.
22 Wa saaro min Rissa wa nazalo fi Khahilaata.
23 Wa saaro min Khahilaata wa nazalo fi jabal Chafar.
24 Wa saaro min jabal Chafar wa nazalo fi Haraada.
25 Wa saaro min Haraada wa nazalo fi Maghiluut.
26 Wa saaro min Maghiluut wa nazalo fi Tahat.
27 Wa saaro min Tahat wa nazalo fi Taarah.
28 Wa saaro min Taarah wa nazalo fi Mitkha.
29 Wa saaro min Mitkha wa nazalo fi Hachmuuna.
30 Wa saaro min Hachmuuna wa nazalo fi Muusiruut.
31 Wa saaro min Muusiruut wa nazalo fi Bani Yaʼkhaan.
32 Wa saaro min Bani Yaʼkhaan wa nazalo fi Huur al‑Gidgaad.
33 Wa saaro min Huur al‑Gidgaad wa nazalo fi Yutbaata.
34 Wa saaro min Yutbaata wa nazalo fi Abruuna.
35 Wa saaro min Abruuna wa nazalo fi Asyuun Giibar.
36 Wa saaro min Asyuun Giibar wa nazalo fi saharat Siin wa da fi turaab Khaadich.
37 Wa saaro min Khaadich wa nazalo fi jabal Hoor fi huduud balad Adoom.
38 Wa be amur Allah,
Haaruun raajil al‑diin talaʼ fi jabal Hoor wa maat fi l‑yoom al‑awwal hana l‑chahar al‑khaamis.
Wa da,
be 40 sana baʼad marigiin Bani Israaʼiil min balad Masir.
39 Wa Haaruun indah 123 sana wakit maat fi jabal Hoor.
40 Wa fi l‑wakit da,
malik Araad al‑Kanʼaani gaaʼid yaskun fi saharat Nagab fi balad Kanʼaan simiʼ kadar Bani Israaʼiil jaayiin ale baladah.
41 Wa Bani Israaʼiil saaro min jabal Hoor wa nazalo fi Salmuuna.
42 Wa saaro min Salmuuna wa nazalo fi Funuun.
43 Wa saaro min Funuun wa nazalo fi Ubuut.
44 Wa saaro min Ubuut wa nazalo fi Iyy Abaariim fi huduud Muwaab.
45 Wa saaro min Iyy Abaariim wa nazalo fi Diibuun Gaad.
46 Wa saaro min Diibuun Gaad wa nazalo fi Almuun Diblataayim.
47 Wa saaro min Almuun Diblataayim wa nazalo fi jibaal Abaariim mugaabiliin Nabu.
48 Wa saaro min jibaal Abaariim wa nazalo fi kadaadit Muwaab fi khachum bahar al‑Urdun mugaabiliin hillit Ariiha.
49 Wa humman nazalo fi khachum bahar al‑Urdun fi kadaadit Muwaab min Beet Yachiimut lahaddi Abil Chittiim.
Gassimiin al‑balad be amʼiyeedaat
50 Wa fi kadaadit Muwaab fi khachum bahar al‑Urdun mugaabil hillit Ariiha,
Allah hajja le Muusa wa gaal :
51 « Hajji le Bani Israaʼiil wa guul leehum :
‹ Wakit tagtaʼo bahar al‑Urdun le tadkhulu fi balad Kanʼaan,
52 chiilu ard kulla sukkaan al‑balad wa dammuru kulla tamaasiilhum al‑sawwoohum min hajar wa kassuru asnaamhum al‑daggoohum min hadiid wa haddumu bakaanaathum al‑aaliyiin hana l‑ibaada.
53 Chiilu al‑balad di wa askunu foogha achaan ana anteetku al‑balad di le tabga hintuku.
54 Wa gassumu al‑balad di ambeenaat khuchuum buyuutku be amʼiyeedaat.
Ayyi khachum beet kabiir yalga ard kabiire wa ayyi khachum beet sakhayyar yalga ard sakhayre wa ayyi waahid yalga warasatah fi l‑bakaan al‑yagaʼ leyah be amʼiyeedaat.
Wa l‑gisim da yabga ambeenaat gabaayilku.
55 Wa laakin kan ma chiltu al‑ard min kulla sukkaan al‑balad di,
al‑yifaddulu minhum yabgo leeku misil wagaʼaay fi l‑een aw misil chookaay fi l‑dahar.
Wa yahjumuuku fi l‑bakaan al‑taskunu foogah.
56 Wa ana nisawwi foogku intu al‑cheyy al‑gult nisawwiih fooghum humman.
› »