Gawaaniin al‑damm
17
1 Wa Allah hajja le Muusa wa gaal :
2 Hajji le Haaruun wa awlaadah wa kulla Bani Israaʼiil wa guul leehum :
« Daahu kalaam Allah al‑amaraaku beyah.
3 Kan ayyi naadum min Bani Israaʼiil yadbah toor aw kabich aw anzaay fi daakhal al‑fariig aw barra minnah,
4 waajib yijiib al‑bahiime di fi madkhal kheemat al‑ijtimaaʼ.
Wa yigaddimha dahiiye giddaam kheemat Allah.
Laakin kan ma sawwa misil da,
al‑naadum da yatulbu minnah damm achaan hu daffag damm.
Wa waajib yafsuluuh min chaʼabah.
5 Wa be da,
Bani Israaʼiil battaan ma yadbaho dahaayaahum fi l‑kadaade wa laakin yijiibuuhum le raajil al‑diin fi madkhal kheemat al‑ijtimaaʼ giddaam Allah.
Wa yigaddumuuhum le Allah dahaaya salaama.
6 Wa raajil al‑diin yuruchch al‑damm fi madbah Allah fi madkhal kheemat al‑ijtimaaʼ.
Wa yiharrig al‑chaham wa Allah yarda be riihtah.
7 Wa ma waajib yadbaho dahaayaahum le ilaahaathum al‑yimassuluuhum be tuyuus wa yichcharmato waraahum.
Wa da yabga leehum chart daayim min zurriiye le zurriiye. »
8 Wa guul leehum battaan :
« Akuun naadum min Bani Israaʼiil aw min al‑ajaanib al‑jo gaʼado maʼaahum yigaddim dahiiye muharraga aw ayyi dahiiye.
9 Waajib yijiibha fi madkhal kheemat al‑ijtimaaʼ le yigaddimha le Allah.
Laakin kan ma jaabha,
al‑naadum da waajib yafsuluuh min chaʼabah.
10 « Wa kan naadum min Bani Israaʼiil aw min al‑ajaanib al‑saakniin maʼaahum yaakul ayyi damm,
ana ninlafit didd al‑naadum al‑yaakul al‑damm da.
Wa nafsulah min chaʼabah.
11 Achaan hayaat al‑makhluug gaaʼide fi l‑damm.
Wa ana anteetku al‑damm da le tisawwu beyah kaffaara le hayaatku fi l‑madbah.
Achaan al‑damm yabga kaffaara le l‑haya.
12 Wa be sabab da,
ana gult le Bani Israaʼiil :
‹ Ma waajib ayyi naadum minku yaakul damm.
Wa l‑ajnabi al‑saakin maʼaaku kula ma yaakulah. ›
13 « Wa kan naadum min Bani Israaʼiil aw min al‑ajaanib al‑saakniin maʼaahum macha al‑ganiis wa katal haywaan aw teer al‑binʼakil,
waajib yadbahah wa yadfin dammah be turaab.
14 Achaan hayaat ayyi makhluug gaaʼide fi dammah wakit hu hayy.
Wa ana gult le Bani Israaʼiil :
‹ Ma taakulu damm hana ayyi makhluug hayy achaan al‑ruuh hana ayyi makhluug hayy gaaʼide fi dammah.
Wa ayyi naadum al‑yaakul damm,
waajib yafsuluuh min al‑chaʼab. ›