Yoom al‑kaffaara
16
1 Wa Allah hajja le Muusa baʼad moot awlaad Haaruun al‑itneen al‑maato wakit jo giddaam Allah.
2 Wa Allah gaal le Muusa :
Guul le akhuuk Haaruun ma yadkhul fi ayyi wakit fi l‑bakaan al‑mukhaddas marra waahid.
Wa da,
khaadi le l‑sitaar giddaam sidaadit al‑sanduug.
Achaan ma yumuut wakit nibiin fi sahaabaay min foog le sidaadit al‑sanduug.
3 Wa daahu al‑waajib le Haaruun wakit yadkhul fi l‑bakaan al‑mukhaddas marra waahid.
Hu yichiil toor dahiiye le kaffaarat al‑zanib wa kabich le l‑dahiiye al‑muharraga.
4 Wa hu yalbas khalag khaass wa surwaal gisayyir wa yarbut sulbah be hizaam wa yukujj kadmuul,
kulluhum min gumaach hana kattaan.
Wa da kulla l‑lubaas al‑khaass.
Wa hu yilbarrad wa yalbasah.
5 Wa hu yalga min mujtamaʼ Bani Israaʼiil itneen tuyuus dahiiye le kaffaarat al‑zanib wa waahid kabich le l‑dahiiye al‑muharraga.
6 Wa khalaas,
Haaruun yigaddim al‑toor le l‑dahiiye le kaffaarat zanbah wa yisawwi kaffaara leyah hu wa le aayiltah.
7 Wa hu yichiil al‑tuyuus al‑itneen wa yukhuttuhum giddaam Allah fi madkhal kheemat al‑ijtimaaʼ.
8 Wa Haaruun yisawwi amʼiyeedaat le yaʼarif al‑tees al‑weenu yabga le Allah wa l‑weenu yabga matruud le l‑jinn Azaazeel.
9 Wa Haaruun yichiil al‑tees al‑bigi le Allah wa yigaddimah dahiiye le kaffaarat al‑zanib.
10 Wa l‑tees al‑yabga matruud le l‑jinn Azaazeel yukhuttuuh hayy giddaam Allah.
Wa yabga kaffaara wakit yaturduuh fi l‑khala.
11 Wa Haaruun yigaddim al‑toor le dahiiyat kaffaarat al‑zanib wa yisawwi kaffaara leyah hu wa le aayiltah.
Wa baʼad da,
yadbah al‑toor hana dahiiyat kaffaarat zanbah.
12 Wa hu yichiil mukhbar malaan jamur min al‑madbah al‑giddaam Allah wa malyit iid itneen hana bakhuur muʼattar marhuuk.
Wa yiwaddiihum kulla ke khaadi le l‑sitaar.
13 Wa hu yusubb al‑bakhuur da fi l‑naar giddaam Allah achaan al‑dukhkhaan hana l‑bakhuur da yikhatti sidaadit sanduug al‑muʼaahada.
Wa be misil da,
hu ma yumuut.
14 Wa hu yichiil min damm al‑toor be usbaʼah al‑zeenaay wa yuruchch beyah sidaadit al‑sanduug be nuss al‑sabaah wa giddaam al‑sanduug.
Wa be usbaʼah,
hu yuruchch al‑damm sabʼa marraat fi l‑sidaade min giddaam.
15 Wa yadbah al‑tees dahiiye le kaffaarat zanib al‑chaʼab wa yiwaddi al‑damm khaadi le l‑sitaar.
Wa be l‑damm da,
hu yisawwi nafs al‑cheyy al‑sawwaah be damm al‑toor,
hu yuruchch al‑sidaade wa giddaam al‑sanduug.
16 Wa be misil da,
hu yisawwi fi l‑bakaan al‑mukhaddas marra waahid kaffaara le najaasit Bani Israaʼiil wa isyaanhum wa kulla zunuubhum.
Wa yisawwi nafs al‑cheyy le kheemat al‑ijtimaaʼ al‑gaaʼide maʼaahum fi usut najaasithum.
17 Wa naadum waahid kula ma yukuun fi kheemat al‑ijtimaaʼ wakit Haaruun yadkhul fi l‑bakaan al‑mukhaddas marra waahid le yisawwi kaffaara wa lahaddi yamrug.
Wa hu yisawwi kaffaara leyah hu wa le aayiltah wa le kulla mujtamaʼ Bani Israaʼiil.
18 Wa yamrug ale l‑madbah al‑gaaʼid giddaam Allah wa yisawwi foogah al‑kaffaara.
Wa yichiil min damm al‑toor wa damm al‑tees wa yukhuttah fi guruun al‑madbah min kulli jiihe.
19 Wa hu yichiil be usbaʼah min al‑damm wa yuruchch al‑madbah sabʼa marraat.
Wa yitahhirah wa yikhassisah min najaasit Bani Israaʼiil.
20 Wa wakit yikammil khalaas min al‑kaffaara hana l‑bakaan al‑mukhaddas marra waahid wa kheemat al‑ijtimaaʼ wa l‑madbah,
hu yigaddim al‑tees al‑hayy.
21 Wa Haaruun yukhutt iideenah fi raas al‑tees al‑hayy wa yiʼtarif be kulla l‑khata wa kulla l‑isyaan wa kulla l‑zunuub hana Bani Israaʼiil wa yukhuttuhum fi raas al‑tees da.
Wa raajil waahid jaahiz yiwaddiih fi l‑khala.
22 Wa l‑tees yichiil kulla khataayaahum fi raasah wa yiwaddiihum fi l‑sahara.
Wa be misil da bas,
yaturdu al‑tees fi l‑khala.
23 Wa baʼad da,
Haaruun yadkhul fi kheemat al‑ijtimaaʼ wa yisill khulgaanah hana l‑kattaan al‑libishum wakit dakhal fi l‑bakaan al‑mukhaddas marra waahid.
Wa yukhuttuhum fi l‑bakaan da.
24 Wa hu yilbarrad fi bakaan mukhaddas wa yalbas khulgaanah.
Wa khalaas,
yamrug wa yigaddim dahiiytah al‑muharraga wa l‑dahiiye al‑muharraga hana l‑chaʼab wa hu yisawwi kaffaara leyah hu wa le l‑chaʼab.
25 Wa hu yiharrig al‑chaham hana l‑dahiiye le kaffaarat al‑zanib fi l‑madbah.
26 Wa l‑raajil al‑wadda al‑tees al‑matruud le l‑jinn Azaazeel yikhassil khulgaanah wa yilbarrad wa baʼad da,
yadkhul fi l‑fariig.
27 Wa yichiilu toor al‑dahiiye hana kaffaarat al‑zanib wa tees al‑dahiiye hana kaffaarat al‑zanib,
al‑waddo dammuhum fi l‑bakaan al‑mukhaddas marra waahid le l‑kaffaara.
Wa yichiilu al‑faddal min al‑dahaaya dool wa yiwadduuh barra min al‑fariig wa yiharrugu firaawhum wa lahamhum wa baʼarhum.
28 Wa l‑naadum al‑yiharrighum,
waajib yikhassil khulgaanah wa yilbarrad.
Wa baʼad da,
yadkhul fi l‑fariig.
29 Wa daahu al‑yabga leeku chart daayim.
Wa fi l‑yoom al‑aachir hana l‑chahar al‑saabiʼ,
suumu wa ma tisawwu ayyi khidme wa la intu wa la l‑ajnabi al‑saakin maʼaaku.
30 Wa fi l‑yoom da,
yisawwu leeku kaffaara le yitahhuruuku min kulla zunuubku wa tabgo taahiriin giddaam Allah.
31 Wa l‑yoom da yabga leeku yoom hana sabt,
yoom hana jumma wa siyaam.
Wa da yabga leeku chart daayim.
32 Wa l‑kaffaara di yisawwiiha raajil al‑diin al‑masahooh wa darrajooh le yichiil bakaan abuuh raajil al‑diin.
Wa yalbas khulgaan al‑kattaan al‑khaassiin.
33 Wa hu yisawwi kaffaara le l‑bakaan al‑mukhaddas marra waahid wa le kheemat al‑ijtimaaʼ wa le l‑madbah.
Wa yisawwi kaffaara le rujaal al‑diin wa le kulla mujtamaʼ al‑chaʼab.
34 Wa da yabga leeku chart daayim fi ayyi sana wakit tisawwu kaffaara le kulla zunuub Bani Israaʼiil.
Wa sawwo kulla cheyy misil Allah amar beyah Muusa.