Al‑tihaara min marad al‑jisim
14
1 Wa Allah hajja le Muusa wa gaal :
2 Daahu al‑gaanuun al‑yitabbigah al‑naadum al‑indah marad al‑jisim fi yoom tihaartah.
Wakit yiwadduuh le raajil al‑diin,
3 raajil al‑diin yamrug barra min al‑fariig wa yichiif al‑mardaan.
Kan hu ligi al‑aafe min marad al‑jisim da,
4 raajil al‑diin yaamur le l‑naadum al‑yittahhar yijiib itneen tuyuur hayyiin wa taahiriin wa uud min hatab al‑arz wa kheet ahmar wa warchaal zuufa.
5 Wa raajil al‑diin yanti amur yadbaho waahid min al‑tuyuur dool fi maaʼuun hana tiine malaan almi nadiif.
6 Wa yichiil al‑teeraay al‑hayye wa uud min hatab al‑arz wa l‑kheet al‑ahmar wa warchaal al‑zuufa.
Wa yidissuhum fi l‑damm hana l‑teeraay al‑dabahooha fi l‑almi al‑nadiif.
7 Wa raajil al‑diin yuruchch sabʼa marraat al‑naadum al‑yittahhar min marad al‑jisim.
Wa hu yiballikhah taahir wa yatlig al‑teeraay al‑hayye titiir fi l‑kadaade.
8 Wa l‑naadum al‑yittahhar yikhassil khulgaanah wa yizayyin kulla suufah wa yilbarrad wa khalaas,
hu yabga taahir.
Wa baʼad da,
hu yagdar yadkhul fi l‑fariig.
Wa laakin waajib yagood sabʼa yoom barra min kheemtah.
9 Wa fi l‑yoom al‑saabiʼ,
hu yizayyin kulla suuf raasah wa dignah wa hadagah wa yizayyin kulla suuf jildah.
Wa yikhassil khulgaanah wa yilbarrad wa hu yabga taahir.
10 Wa fi l‑yoom al‑taamin,
hu yichiil itneen kharuuf al‑ma induhum ayyi eeb wa khanamaay bitt sana al‑ma indaha ayyi eeb wa hadiiye hana dagiig talaata kooro mukhalbat be dihin wa tilit liitir hana dihin.
11 Wa raajil al‑diin al‑yisawwi al‑tihaara yukhutt al‑naadum al‑yittahhar wa l‑hadaaya giddaam Allah fi madkhal kheemat al‑ijtimaaʼ.
12 Wa raajil al‑diin yichiil waahid min al‑khurfaan dool wa tilit al‑liitir hana l‑dihin wa yigaddimhum dahiiye le kaffaarat al‑khata wa hadiiye marfuuʼa le Allah.
13 Wa hu yadbah al‑kharuuf fi l‑bakaan al‑yadbaho foogah al‑dahiiye le kaffaarat al‑zanib wa l‑dahiiye al‑muharraga,
fi bakaan mukhaddas.
Achaan al‑dahiiye le kaffaarat al‑khata,
hi le raajil al‑diin misil dahiiyat kaffaarat al‑zanib.
Humman mukhaddasiin marra waahid.
14 Wa raajil al‑diin yichiil min damm al‑dahiiye le kaffaarat al‑khata wa yukhuttah fi halamat al‑adaan al‑zeene hana l‑naadum al‑yittahhar wa fi usbaʼah al‑kabiir hana iidah wa rijlah al‑zeene.
15 Wa raajil al‑diin yichiil tilit al‑liitir hana l‑dihin wa yusubb minnah fi kaffah al‑israay.
16 Wa yidiss usbaʼah hana iidah al‑zeene fi l‑dihin al‑fi kaffah al‑israay wa yuruchch be usbaʼah al‑dihin sabʼa marraat giddaam Allah.
17 Wa raajil al‑diin yukhutt min al‑dihin al‑faddal fi halamat al‑adaan al‑zeene hana l‑naadum al‑yittahhar wa fi usbaʼah al‑kabiir hana iidah wa rijlah al‑zeene,
min foog le damm hana l‑dahiiye le kaffaarat al‑khata.
18 Wa l‑faddal min al‑dihin al‑fi iid raajil al‑diin,
yusubbah fi raas al‑naadum al‑yittahhar.
Wa khalaas,
yisawwi leyah kaffaara giddaam Allah.
19 Wa raajil al‑diin yigaddim dahiiyat kaffaarat al‑zanib wa be misil da,
yisawwi kaffaara le l‑naadum al‑yittahhar min najaastah.
Wa baʼad da,
raajil al‑diin yadbah al‑dahiiye al‑muharraga.
20 Wa raajil al‑diin yigaddim fi l‑madbah al‑dahiiye al‑muharraga wa l‑hadiiye hana l‑dagiig wa yisawwi kaffaara le l‑naadum da.
Wa khalaas,
hu yabga taahir.
Tihaarat al‑naadum al‑fagri
21 Wa kan al‑naadum da fagri,
ma yagdar yalga kulla l‑achya dool,
khalli yichiil kharuuf waahid bas le dahiiyat kaffaarat al‑khata wa da yigaddumuuh hadiiye marfuuʼa le yisawwu leyah kaffaara.
Wa yichiil kooro hana dagiig mukhalbat be dihin le l‑hadiiye hana l‑dagiig wa tilit liitir hana dihin.
22 Wa gimri itneen aw hamaam itneen wa da hasab gudurtah,
waahide le l‑dahiiye hana kaffaarat al‑zanib wa l‑aakhara le l‑dahiiye al‑muharraga.
23 Wa fi l‑yoom al‑taamin,
hu yijiib kulla l‑hadaaya hana tihaartah le raajil al‑diin fi madkhal kheemat al‑ijtimaaʼ giddaam Allah.
24 Wa raajil al‑diin yichiil al‑kharuuf hana dahiiyat kaffaarat al‑khata wa tilit liitir hana dihin wa yigaddimhum hadiiye marfuuʼa giddaam Allah.
25 Wa raajil al‑diin yadbah al‑kharuuf hana dahiiyat kaffaarat al‑khata.
Wa hu yichiil min damm al‑dahiiye hana kaffaarat al‑khata wa yukhuttah fi halamat al‑adaan al‑zeene hana l‑naadum al‑yittahhar wa fi usbaʼah al‑kabiir hana iidah wa rijlah al‑zeene.
26 Wa raajil al‑diin yusubb dihin chiyya fi kaffah al‑israay.
27 Wa yichiil min al‑dihin al‑fi kaffah be usbaʼah hana iidah al‑zeene wa yuruchchah sabʼa marraat giddaam Allah.
28 Wa raajil al‑diin yukhutt dihin fi halamat al‑adaan al‑zeene hana l‑naadum al‑yittahhar wa fi usbaʼah al‑kabiir hana iidah wa rijlah al‑zeene,
min foog le damm hana dahiiyat kaffaarat al‑khata.
29 Wa l‑faddal min al‑dihin al‑fi iid raajil al‑diin yusubbah fi raas al‑naadum al‑yittahhar wa yisawwi leyah kaffaara giddaam Allah.
30 Wa hu yigaddim waahide min al‑gimri aw waahide min al‑hamaam hasab gudurtah.
31 Wa min al‑cheyy al‑gidir ligiih,
hu yigaddimah,
waahide le l‑dahiiye le kaffaarat al‑zanib wa l‑aakhara le l‑dahiiye al‑muharraga wa maʼaahum al‑hadiiye hana l‑dagiig.
Wa raajil al‑diin yisawwi le l‑naadum al‑yittahhar kaffaara giddaam Allah.
32 Wa dool al‑gawaaniin al‑bukhussu tihaarat al‑naadum al‑indah marad al‑jisim wa fagri ma indah gudra le yittahhar.
Al‑barnuug al‑fi l‑buyuut
33 Wa Allah hajja le Muusa wa Haaruun wa gaal :
34 Wakit tiwassulu fi balad Kanʼaan al‑nantiiha leeku warasa,
kan ana nukhutt barnuug fi waahid min al‑buyuut hana l‑balad al‑tabga hintuku,
35 waajib siid al‑beet da yamchi yiʼoori raajil al‑diin.
Wa yuguul leyah :
« Ana chift cheyy bichaabih bugʼa fi lubb beeti. »
36 Wa raajil al‑diin yanti amur yifaddu al‑beet gabul hu ma yaji yichiif al‑bugʼa achaan kulla cheyy fi lubb al‑beet,
hu ma yiballikhha nijis.
Wa baʼad da,
raajil al‑diin yadkhul yichiif al‑beet.
37 Wa hu yichiif al‑bugʼa.
Wa kan hu yichiif kadar al‑bugʼa fi l‑durdur hana l‑beet indaha nugaar mukhaddiriin aw muhammiriin wa kan sawwo nugaar fi l‑durdur,
38 khalaas raajil al‑diin yamrug min al‑beet.
Wa wakit lihig al‑baab,
hu yisidd al‑beet le muddit sabʼa yoom.
39 Wa fi l‑yoom al‑saabiʼ,
raajil al‑diin yigabbil.
Wa kan hu yichiif al‑bugʼa gaaʼide tilwassaʼ fi l‑durdur hana l‑beet,
40 hu yaamur yamurgu al‑hujaar al‑gaaʼide fooghum al‑bugʼa wa yazguluuhum barra min al‑madiina fi bakaan nijis.
41 Wa yuhukku kulla l‑beet min daakhal wa yidaffugu turaabah al‑hakkooh barra min al‑madiina fi bakaan nijis.
42 Wa yichiilu hujaar aakhariin wa yukhuttuuhum fi gadd al‑hujaar al‑maragoohum.
Wa yichiilu turaab aakhar le yitallusu al‑beet min daakhal.
43 Wa kan battaan al‑bugʼa gammat baʼad marago al‑hujaar wa baʼad hakko al‑beet min daakhal wa tallasooh,
44 waajib raajil al‑diin yigabbil.
Wa kan yichiif al‑bugʼa zaadat fi l‑beet,
khalaas da barnuug muʼdi.
Wa l‑beet da nijis.
45 Wa yikassuru al‑beet.
Wa kulla hujaarah wa hatabah wa kulla turaabah yamurguuh wa yidaffuguuh barra min al‑madiina fi bakaan nijis.
46 Wa kan naadum yadkhul fi l‑beet wakit hu masduud,
al‑naadum da yabga nijis lahaddi l‑achiiye.
47 Wa kan naadum yargud fi l‑beet da,
waajib yikhassil khulgaanah.
Wa kan yaakul foogah kula,
waajib yikhassil khulgaanah.
48 Wa laakin kan raajil al‑diin ja wa yichiif kadar baʼad tallaso al‑beet al‑bugʼa ma al‑wassaʼat fi l‑beet,
khalaas raajil al‑diin yiballikh al‑beet da taahir achaan al‑bugʼa alʼaalajat.
49 Wa le yitahhir al‑beet min al‑bugʼa,
hu yichiil itneen tuyuur wa hatab al‑arz wa kheet ahmar wa warchaal zuufa.
50 Wa raajil al‑diin yadbah waahid min al‑tuyuur dool fi maaʼuun hana tiine malaan almi nadiif.
51 Wa yichiil uud min hatab al‑arz wa warchaal al‑zuufa wa l‑kheet al‑ahmar wa l‑teeraay al‑hayye wa yidissuhum fi l‑damm hana l‑teeraay al‑dabahooha fi l‑almi al‑nadiif.
Wa yuruchch beyah al‑beet sabʼa marraat.
52 Wa hu yitahhir al‑beet be damm al‑teeraay wa l‑almi al‑nadiif wa l‑teeraay al‑hayye wa hatab al‑arz wa warchaal al‑zuufa wa l‑kheet al‑ahmar.
53 Wa yatlig al‑teeraay al‑hayye titiir barra min al‑madiina fi l‑kadaade.
Wa be misil da,
hu yisawwi kaffaara le l‑beet wa khalaas,
al‑beet yabga taahir.
54 Wa khalaas,
dool al‑gawaaniin al‑bukhussu ayyi marad al‑jisim wa l‑guub
55 wa l‑barnuug hana l‑khulgaan wa l‑buyuut
56 wa l‑kharaariij wa l‑bahag wa l‑bugaʼ al‑yiraaru.
57 Wa l‑gawaaniin dool yantu taʼliim fi haalat al‑najaasa wa fi haalat al‑tihaara.
Wa dool gawaaniin al‑bukhussu ayyi marad hana l‑jisim.