Marad al‑jisim
13
1 Wa Allah hajja le Muusa wa Haaruun wa gaal :
2 Wakit naadum gammat leyah khurraaja fi jismah aw bahag aw bugʼa al‑baʼadeen tabga uwaara hana marad al‑jisim,
al‑naadum da wadduuh le raajil al‑diin Haaruun aw le waahid min rujaal al‑diin al‑humman min zurriiytah
3 wa raajil al‑diin yichiif al‑uwaara di.
Kan al‑suuf al‑fi bakaan al‑uwaara di bigi abyad wa l‑uwaara di indaha nugra fi daakhal al‑laham,
khalaas da marad al‑jisim.
Fi l‑bakaan da,
raajil al‑diin yichiif al‑marad wa yiballikh kadar al‑naadum da nijis.
4 Wa kan fi l‑jisim fi bugʼa beeda wa tiraari wa ma indaha nugra fi daakhal al‑laham wa suufha kula ma bigi abyad,
khalaas raajil al‑diin yukhutt al‑mardaan da taraf le muddit sabʼa yoom.
5 Wa raajil al‑diin yichiifah fi l‑yoom al‑saabiʼ.
Wa kan al‑uwaara di ma zaadat fi l‑jisim,
raajil al‑diin yukhuttah taraf le taani marra le muddit sabʼa yoom.
6 Wa raajil al‑diin yichiifah battaan fi l‑yoom al‑saabiʼ.
Wa kan al‑uwaara di ma tiraari wa ma zaadat fi l‑jisim,
khalaas raajil al‑diin yiballikh kadar al‑mardaan da taahir.
Al‑cheyy da bahag bas wa waajib yikhassil khulgaanah wa khalaas,
hu yabga taahir.
7 Wa laakin kan al‑bahag da zaad fi l‑jisim baʼad raajil al‑diin ballakh kadar al‑mardaan da taahir,
fi l‑haala di al‑mardaan waajib yigabbil le raajil al‑diin le yichiifah taani marra.
8 Wa raajil al‑diin yichiifah wa kan al‑bahag da zaad fi l‑jisim,
raajil al‑diin yiballikh kadar al‑mardaan da nijis wa l‑cheyy da marad al‑jisim.
9 Wa wakit marad al‑jisim karab naadum waahid,
waajib yiwaddu al‑naadum da le raajil al‑diin
10 wa raajil al‑diin yichiifah.
Wa kan fi jismah fi khurraaja beeda wa bayyadat al‑suuf wa l‑laham kula binchaaf minnaak le l‑farwa,
11 khalaas da marad al‑jisim al‑yitawwil fi l‑jisim wa raajil al‑diin yiballikh kadar al‑mardaan da nijis wa laakin ma yukhuttah taraf le mudda achaan da waadih kadar hu nijis.
12 Akuun marad al‑jisim da alwassaʼ wa khatta kulla jisim al‑naadum al‑mardaan,
min raasah lahaddi rijileenah,
hasab al‑chaafah raajil al‑diin.
13 Wa kan misil da,
raajil al‑diin yichiifah adiil.
Wa kan sahiih marad al‑jisim da khatta kulla jismah,
khalaas raajil al‑diin yiballikh kadar al‑mardaan da taahir.
Hu taahir achaan kulla jismah bigi abyad.
14 Wa laakin yoom jismah bigi ahmar,
hu nijis.
15 Wa wakit raajil al‑diin yichiif al‑jisim al‑ahmar da,
hu yiballikh kadar al‑mardaan da nijis wa lahamah al‑binchaaf minnaak le l‑farwa kula nijis.
Wa da marad al‑jisim.
16 Wa kan al‑jisim al‑binchaaf ahmar khayyar wa bigi abyad,
khalli al‑mardaan yigabbil le raajil al‑diin.
17 Wa raajil al‑diin yichiifah battaan.
Wa kan al‑uwaara bigat beeda,
hu yiballikh kadar al‑jisim taahir.
Wa l‑naadum da kula taahir.
18 Wa wakit naadum indah fi jismah hibin baryaan
19 wa fi nafs al‑bakaan al‑hibin da gammat khurraaja beeda aw bugʼa beeda muhammire wa tiraari,
khalli al‑naadum da yiwassif nafsah le raajil al‑diin
20 wa raajil al‑diin yichiifah.
Wa kan al‑bugʼa di sawwat nugra fi l‑laham wa l‑suuf bigi abyad fi l‑bakaan da,
raajil al‑diin yiballikh kadar al‑naadum da nijis.
Wa da marad al‑jisim al‑yugumm fi lubb bakaan al‑hibin.
21 Wa kan raajil al‑diin chaaf ma fi suuf abyad fi l‑bugʼa wa ma sawwat nugra fi l‑laham wa ma gaaʼide tiraari,
hu yukhutt al‑mardaan da taraf le muddit sabʼa yoom.
22 Wa kan al‑bugʼa alwassaʼat fi l‑jisim,
khalaas raajil al‑diin yiballikh kadar al‑mardaan da nijis.
Wa di uwaara.
23 Wa kan al‑bugʼa al‑tiraari di gaaʼide fi bakaanha wa ma alwassaʼat,
khalaas di alaama hana hibin bas.
Wa raajil al‑diin yiballikh kadar hu taahir.
24 Wa wakit naadum indah haraag min naar wa fi l‑uwaara di baanat bugʼa beeda muhammire aw beeda wa tiraari,
25 waajib raajil al‑diin yichiifha.
Wa kan al‑suuf al‑fi l‑uwaara al‑tiraari bigi abyad wa kan hi sawwat nugra fi l‑laham da,
khalaas da marad fi l‑jisim yidoor yugumm fi l‑uwaara.
Wa raajil al‑diin yiballikh kadar al‑naadum da nijis.
Wa da marad al‑jisim.
26 Wa laakin kan raajil al‑diin chaaf ma fi suuf abyad fi l‑bugʼa wa ma sawwat nugra fi l‑laham wa ma gaaʼide tiraari,
hu yukhutt al‑mardaan da taraf le muddit sabʼa yoom.
27 Wa fi l‑yoom al‑saabiʼ,
raajil al‑diin yichiifah wa kan al‑bugʼa di alwassaʼat fi l‑jisim,
hu yiballikh kadar al‑mardaan da nijis.
Wa da marad al‑jisim.
28 Wa laakin kan al‑bugʼa al‑tiraari di gaaʼide fi bakaanha wa ma alwassaʼat wa ma gaaʼide tiraari,
khalaas di khurraaja jaaye min al‑haraag.
Wa raajil al‑diin yiballikh kadar al‑naadum da taahir achaan di alaama hana haraag bas.
29 Wa wakit raajil aw mara indah uwaara fi raasah aw fi dignah,
30 waajib raajil al‑diin yichiif al‑uwaara di.
Wa kan al‑uwaara di sawwat nugra fi l‑laham wa indaha suuf musaffir wa rugaag,
khalaas raajil al‑diin yiballikh kadar al‑naadum da nijis.
Wa da guub,
hu marad al‑jisim al‑yakrub fi l‑raas aw fi l‑digin.
31 Wa kan raajil al‑diin chaaf al‑uwaara ma indaha nugra fi l‑laham wa ma indaha suuf azrag misil fi l‑aadi,
khalaas hu yukhuttah taraf le muddit sabʼa yoom le l‑mardaan al‑indah guub.
32 Wa fi l‑yoom al‑saabiʼ,
raajil al‑diin yichiif al‑uwaara.
Wa kan al‑guub da ma alwassaʼ wa ma fi suuf musaffir wa kan ma sawwa nugra fi l‑laham,
33 al‑naadum da yizzayyan.
Wa laakin ma yizayyin al‑bakaan al‑indah guub.
Wa raajil al‑diin yukhutt siid al‑guub taraf le mudda taaniye hana sabʼa yoom.
34 Wa raajil al‑diin yichiif al‑guub fi l‑yoom al‑saabiʼ.
Wa kan al‑guub da ma alwassaʼ fi l‑jisim wa ma sawwa nugra fi l‑laham,
khalaas raajil al‑diin yiballikh kadar al‑naadum da taahir.
Wa baʼad yikhassil khulgaanah,
hu yabga taahir.
35 Wa laakin kan al‑guub alwassaʼ fi jismah baʼad ballakho kadar hu taahir,
36 raajil al‑diin yichiifah.
Wa kan al‑guub da ma alwassaʼ fi l‑jisim,
raajil al‑diin ma yifattich kan fi suuf musaffir walla la,
al‑mardaan da hu nijis.
37 Wa kan al‑guub da gaaʼid fi bakaanah wa ma zaad wa suufah al‑azrag kula gamma foogah,
khalaas al‑naadum da biri wa bigi taahir.
Wa raajil al‑diin yiballikh kadar hu taahir.
38 Wa wakit bugaʼ buyud wa biraaru marago fi jisim hana mara aw raajil,
39 waajib raajil al‑diin yichiifah.
Wa kan al‑bugaʼ al‑fi l‑jisim dool buyud wa ma biraaru,
khalaas dool bugaʼ saakit bas al‑gammo fi l‑jisim wa l‑naadum da taahir.
40 Wa kan naadum waddar suufah wa bigi musalliʼ,
hu taahir.
41 Wa kan waddar suuf raasah min giddaam wa buguchtah musalliʼe kula,
hu taahir.
42 Wa laakin kan fi l‑bakaan al‑musalliʼ be wara aw fi l‑bugcha indah uwaara beeda muhammire,
khalaas da marad al‑jisim gaaʼid yugumm fi l‑bakaan al‑musalliʼ be wara aw fi l‑bugcha
43 wa waajib raajil al‑diin yichiifah.
Wa kan al‑uwaara di tisawwi khurraaja beeda muhammire fi l‑bakaan al‑musalliʼ be wara aw fi l‑bugcha,
wa kan hi tichaabih marad al‑jisim hana l‑farwa,
44 khalaas fi l‑bakaan da,
al‑naadum da indah marad al‑jisim wa hu nijis.
Wa raajil al‑diin yiballikh kadar hu nijis wa l‑marad da karabah fi raasah.
45 Wa fi l‑haala di,
kan naadum karabah marad al‑jisim wa bigi mardaan,
waajib yalbas khulgaan mucharratiin wa ma yiʼaddil suuf raasah wa yikhatti chanabah wa yiʼiit wa yuguul :
« Nijis !
Nijis ! »
46 Wa hu yukuun nijis fi kulla l‑mudda al‑gaaʼide foogha al‑uwaara al‑nijse.
Hu yagood wiheedah wa yukhutt beetah barra min al‑fariig.
Bugaʼ al‑barnuug fi l‑khulgaan
47 Wa wakit fi bugʼa hana barnuug fi khalag hana suuf aw hana kattaan,
48 aw fi gumaach aw fi khattaay hana suuf aw hana kattaan aw fi farwa aw fi ayyi cheyy hana farwa,
49 wa kan al‑bugʼa di mukhaddire aw muhammire fi l‑khalag aw fi l‑farwa aw fi l‑gumaach aw fi l‑khattaay aw fi ayyi cheyy hana farwa,
khalaas di bugʼa hana barnuug.
Khalli yiwassufuuha le raajil al‑diin.
50 Wa raajil al‑diin yichiif al‑bugʼa di wa yichiil al‑cheyy al‑hi foogah wa yukhuttah taraf le muddit sabʼa yoom.
51 Wa fi l‑yoom al‑saabiʼ,
raajil al‑diin yichiif al‑bugʼa di wa kan hi alwassaʼat fi l‑khalag aw fi l‑gumaach aw fi l‑khattaay aw fi l‑farwa aw fi ayyi cheyy hana farwa,
khalaas da barnuug mudammir.
Wa l‑cheyy da nijis.
52 Wa raajil al‑diin yiharrig al‑khalag aw al‑gumaach aw al‑khattaay hana l‑suuf aw hana l‑kattaan aw ayyi cheyy hana farwa,
al‑foogah al‑bugʼa.
Achaan da barnuug al‑mudammir wa l‑cheyy al‑hu foogah,
waajib yiharruguuh fi l‑naar.
53 Wa laakin kan raajil al‑diin chaaf al‑bugʼa di ma gaaʼide tilwassaʼ fi l‑khalag aw fi l‑gumaach aw fi l‑khattaay aw fi ayyi cheyy hana farwa,
54 khalaas raajil al‑diin yaamur yikhassulu al‑cheyy al‑foogah al‑bugʼa wa yichiilah battaan wa yukhuttah taraf le muddit sabʼa yoom.
55 Wa raajil al‑diin yichiif al‑bugʼa baʼad khassalooha.
Wa kan al‑bugʼa ma alkhayyarat wa ma gaaʼide tilwassaʼ,
khalaas al‑cheyy al‑foogah al‑bugʼa di nijis.
Wa waajib yiharruguuh achaan al‑khalag da maʼkuul be giddaam aw be wara.
56 Wa kan raajil al‑diin chaaf al‑bugʼa di gaaʼide tiwaddir baʼad khassalooha,
hu yagtaʼha min al‑khalag aw al‑farwa aw al‑gumaach aw al‑khattaay.
57 Wa laakin kan battaan cheyy baan fi nafs al‑khalag aw al‑gumaach aw al‑khattaay aw fi ayyi cheyy hana farwa,
khalaas di bugʼa hana barnuug al‑gaaʼide tugumm.
Waajib yiharrugu al‑cheyy al‑foogah al‑bugʼa di marra waahid.
58 Wa ayyi khalag aw gumaach aw khattaay aw ayyi cheyy hana farwa al‑yikhassuluuh wa l‑bugʼa tamrug minnah,
khalli yikhassuluuh battaan wa hu yabga taahir.
59 Wa dool gawaaniin al‑bugʼa hana l‑barnuug,
kan fi khalag hana suuf aw hana kattaan aw gumaach aw khattaay aw ayyi cheyy hana farwa.
Wa dool al‑gawaaniin al‑be sababhum yiballukhu kan al‑cheyy nijis aw taahir.