6
1 *Wa Allah hajja le Muusa wa gaal :
2 Akuun naadum sawwa zanib wa isi Allah be sabab hu khachcha akhuuh fi chaan amaana aw deen aw sirge aw galaʼ be gu
3 walla hu kadab be sabab cheyy waddar wa hu ligiih walla hu halaf be kidib fi amal waahid misil al‑zunuub dool.
4 Al‑naadum al‑sawwa al‑zanib da,
hu khaati wa waajib yigabbil al‑cheyy al‑hu sirgah aw galaʼah be gu min akhuuh aw al‑amaana walla l‑cheyy al‑waddar wa hu ligiih
5 aw ayyi cheyy al‑hu halaf be kidib fi chaanah.
Waajib hu yigabbil al‑cheyy da kaamil le siidah wa yiziid foogah khumus tamanah.
Wa da fi nafs al‑yoom al‑hu yigaddim foogah dahiiye le kaffaarat al‑khata.
6 Wa hu yijiib le Allah dahiiyat kaffaarat al‑khata wa l‑dahiiye di tukuun kabich al‑ma indah ayyi eeb al‑yichiilah min al‑khanam al‑tamanah yisaawi hasab al‑taman al‑waajib le dahiiyat kaffaarat al‑khata.
7 Wa raajil al‑diin yisawwi leyah kaffaara giddaam Allah wa hu yalga al‑khufraan,
kan zanbah da misil chunu kula.
Hadiiyat al‑dagiig
8 Wa Allah hajja le Muusa wa gaal :
9 Anti al‑amur da le Haaruun wa zurriiytah wa guul leehum :
« Daahu al‑gaanuun hana l‑dahiiye al‑muharraga.
Al‑dahiiye al‑muharraga tagood fi naar al‑madbah tuul al‑leel lahaddi fajur wa naar al‑madbah tahrigha.
10 Wa raajil al‑diin yalbas khalagah hana l‑kattaan wa yalbas surwaalah al‑gisayyir hana kattaan.
Wa yamrug al‑rumaad al‑mudahhan hana l‑dahiiye al‑muharraga min al‑madbah wa yukhuttah jamb al‑madbah.
11 Wa hu yisill khulgaanah wa yalbas khulgaan aakhariin achaan yiwaddi al‑rumaad al‑mudahhan barra min al‑fariig fi bakaan taahir.
12 Wa l‑naar mugabbide fi l‑madbah abadan ma tumuut.
Wa kulli sabaah raajil al‑diin yiziid hatab al‑madbah wa yukhutt foogah al‑dahiiye al‑muharraga wa yiharrig al‑chaham hana dahiiyat al‑salaama.
13 Wa l‑naar mugabbide daayman fi l‑madbah abadan ma tumuut.
14 « Wa daahu al‑gaanuun hana hadiiyat al‑dagiig.
Zurriiyit Haaruun yigaddumuuha giddaam Allah mugaabiliin al‑madbah.
15 Wa raajil al‑diin yichiil malyit iid min al‑dagiig wa l‑dihin wa kulla l‑lubaan al‑gaaʼid fi l‑hadiiye wa yiharrighum fi l‑naar wa di hadiiyat zikra hana dagiig al‑riihitha Allah yarda beeha.
16 Wa Haaruun wa zurriiytah yaakulu al‑faddal min al‑hadiiye.
Wa humman yaakuluuh bala tawwaara fi bakaan mukhaddas.
Wa yaakuluuh fi l‑fadaay hana kheemat al‑ijtimaaʼ.
17 Wa ma yirakkubuuh be tawwaara.
Wa da,
hagguhum al‑ana anteetah leehum min al‑hadaaya al‑muharragiin al‑yigaddumuuhum leyi.
Wa l‑hadiiye di mukhaddasa marra waahid misil al‑fadle hana dahiiye le kaffaarat al‑zanib aw dahiiye le kaffaarat al‑khata.
18 Wa kulli dakar min zurriiyit Haaruun yaakul minha.
Wa da,
chart daayim min zurriiye le zurriiye al‑bukhuss al‑hadaaya al‑muharragiin le Allah.
Wa kulla cheyy al‑yilammis al‑hadaaya dool yabga mukhaddas. »
Hadiiyat al‑masahaan
19 Wa Allah hajja le Muusa wa gaal :
20 Wa daahu al‑hadiiye al‑yigaddumuuha Haaruun wa zurriiytah,
fi yoom yamsaho wa yidarruju waahid minhum.
Hu yigaddim le Allah hadiiye kulla yoom kooro hana dagiig,
nussaha be fajur wa nussaha be achiiye.
21 Wa yikhalbutuuha be dihin wa yinajjuduuha fi saaja wa yigaddumuuha hadiiye munajjada wa mugattaʼa al‑riihitha Allah yarda beeha.
22 Wa raajil diin min zurriiyit Haaruun al‑yamsahooh wa yidarrujuuh min baʼadah,
hu yigaddim al‑hadiiye di.
Wa da hagg daayim le Allah wa yiharruguuh kulla.
23 Wa kulli hadiiye hana dagiig al‑yigaddimha raajil diin,
yiharruguuha kullaha,
ma yaakulu minha cheyy.
Dahiiye le kaffaarat al‑zanib
24 Wa Allah hajja le Muusa wa gaal :
25 Hajji le Haaruun wa zurriiytah wa guul leehum :
« Daahu al‑gaanuun hana dahiiyat kaffaarat al‑zanib.
Wa fi l‑bakaan al‑yadbaho foogah al‑dahiiye al‑muharraga bas,
yadbaho foogah al‑dahiiye le kaffaarat al‑zanib giddaam Allah.
Wa da cheyy mukhaddas marra waahid.
26 Wa raajil al‑diin al‑yigaddim al‑dahiiye yaakulha.
Wa hu yaakulha fi bakaan mukhaddas wa da fi l‑fadaay hana kheemat al‑ijtimaaʼ.
27 Wa ayyi cheyy al‑yilammis lahamha yabga mukhaddas.
Wa kan al‑damm rachcha fi khalag,
waajib yikhassulu al‑bakaan al‑rachcha foogah al‑damm fi bakaan mukhaddas.
28 Wa l‑burma hana l‑tiine al‑rakkabo foogha al‑laham,
waajib yikassuruuha.
Wa laakin kan rakkabooh fi burma hana nahaas,
waajib yuhukkuuha wa yikhassuluuha be almi.
29 Wa ayyi raajil min rujaal al‑diin yaakul al‑laham da wa l‑laham da mukhaddas marra waahid.
30 Wa laakin ayyi dahiiye al‑yigaddumuuha le l‑zanib wa yiwaddu dammaha fi kheemat al‑ijtimaaʼ le kaffaarat al‑zanib,
yiharruguuha,
ma yaakulu minha cheyy. »