Kaffaarat al‑khata wa l‑zanib
7
1 Wa daahu gaanuun dahiiyat kaffaarat al‑khata wa da cheyy mukhaddas marra waahid.
2 Wa fi l‑bakaan al‑yadbaho foogah al‑dahiiye al‑muharraga bas yadbaho foogah dahiiyat kaffaarat al‑khata wa dammaha yuruchchu beyah nawaayit al‑madbah.
3 Wa raajil al‑diin yigaddim kulla l‑chaham wa l‑danab wa l‑chaham al‑mukhatti al‑butuun
4 wa l‑kalaawe be chahamhum wa chaham al‑nawaayit wa nuss al‑kibde al‑maragah maʼa l‑kalaawe.
5 Wa raajil al‑diin yiharrigah le Allah fi l‑madbah hana l‑dahaaya al‑muharragiin.
Wa di dahiiyat kaffaarat al‑khata.
6 Wa ayyi dakar min rujaal al‑diin yaakulah.
Wa yaakuluuh fi bakaan mukhaddas wa da cheyy mukhaddas marra waahid.
7 Wa l‑dahiiye le kaffaarat al‑zanib,
hi misil al‑dahiiye le kaffaarat al‑khata wa humman al‑itneen gaanuunhum waahid.
Wa l‑dahiiye di tabga hint raajil al‑diin al‑yisawwi al‑kaffaara.
Al‑gisim al‑waajib le raajil al‑diin
8 Wa kan raajil diin yigaddim dahiiye muharraga hana naadum aakhar,
al‑farwa hana l‑dahiiye al‑muharraga di tabga hint raajil al‑diin.
9 Wa ayyi hadiiye hana dagiig al‑najjadooha fi furun aw fi tahwa aw fi saaja tabga hint raajil al‑diin al‑yigaddimha.
10 Wa laakin ayyi hadiiye hana dagiig mukhalbata be dihin aw jaaffe tabga hint zurriiyit Haaruun bala tafrikha.
Dahiiyat al‑salaama
11 Daahu al‑gaanuun al‑bukhuss dahiiyat al‑salaama al‑yigaddumuuha le Allah.
12 Wa kan naadum yigaddim dahiiyat chukur,
khalli yigaddim maʼaaha kaʼak bala tawwaara mukhalbat be dihin wa kisaar bala tawwaara mamsuuh be dihin wa kaʼak hana dagiig al‑muʼajjan be dihin.
13 Wa ziyaada fi l‑kaʼak,
hu yigaddim khubza al‑indaha tawwaara wa da le yigaddimha maʼa dahiiyat al‑salaama wa dahiiyat al‑chukur.
14 Wa hu yichiil chiyya min ayyi hadiiye wa yigaddimah le Allah.
Wa l‑hadiiye di tabga hint raajil al‑diin al‑yuruchch al‑damm hana dahiiyat al‑salaama.
15 Wa kan le laham dahiiyat al‑salaama wa dahiiyat al‑chukur,
yaakuluuh fi nafs al‑yoom al‑yigaddumuuh foogah wa ma yifaddulu minnah cheyy le ambaakir.
16 Wa kan le dahiiyat al‑nazir aw be niiye,
fi nafs al‑yoom al‑yigaddumuuha foogah bas,
yaakuluuha.
Wa l‑faddal minha yagdaro yaakuluuh ambaakir.
17 Wa fi l‑yoom al‑taalit,
al‑faddal min al‑laham hana l‑dahiiye yiharruguuh fi l‑naar.
18 Wa kan naadum akal min laham dahiiyat al‑salaama fi l‑yoom al‑taalit,
al‑naadum al‑gaddam al‑dahiiye di,
Allah ma yakhbalah wa dahiiytah kula ma tinhasib leyah.
Wa l‑laham da yukuun haraam.
Wa l‑yaakulah yilhammal natiijat khataayah.
19 Wa kan al‑laham limis ayyi cheyy nijis,
ma yaakuluuh wa laakin yiharruguuh fi l‑naar.
Wa kan le l‑laham kamaan,
ayyi naadum taahir yagdar yaakulah.
20 Wa laakin kan naadum nijis wa yaakul min laham dahiiyat al‑salaama al‑gaddamooh le Allah,
al‑naadum da waajib yafsuluuh min chaʼabah.
21 Masalan naadum limis ayyi cheyy nijis aw insaan nijis aw bahiime nijse aw ayyi haywaan muharram wa nijis marra waahid.
Wa kan al‑naadum da akal min laham dahiiyat al‑salaama al‑gaddamooh le Allah,
waajib yafsuluuh min chaʼabah.
Gawaaniin le l‑chaʼab
22 Wa Allah hajja le Muusa wa gaal :
23 Hajji le Bani Israaʼiil wa guul leehum :
« Ma taakulu ayyi chaham wa la hana bagar wa la hana khanam wa la hana inze.
24 Wa chaham hana l‑rimme wa chaham hana l‑jiife tagdaro tistaʼmalooh le ayyi khidme wa laakin ma taakuluuh.
25 Wa ayyi naadum al‑yaakul chaham hana bahiime al‑yigaddumuuha dahiiye muharraga le Allah,
al‑naadum da waajib yafsuluuh min chaʼabah.
26 Wa ma taakulu al‑damm wa la hana teer wa la hana haywaan fi ayyi bakaan al‑intu saakniin foogah.
27 Wa ayyi naadum al‑yaakul min ayyi damm,
al‑naadum da waajib yafsuluuh min chaʼabah. »
Gisim rujaal al‑diin min al‑dahiiye
28 Wa Allah hajja le Muusa wa gaal :
29 Hajji le Bani Israaʼiil wa guul leehum :
« Kan naadum yigaddim dahiiyat salaama le Allah,
waajib yijiib le Allah gisim min dahiiytah hana l‑salaama.
30 Wa hu zaatah yichiil fi iideenah al‑gisim al‑khaass min al‑dahiiye al‑muharraga le Allah,
yaʼni al‑chaham wa l‑zoor.
Wa l‑zoor da yigaddimah hadiiye marfuuʼa le Allah.
31 Wa raajil al‑diin yiharrig al‑chaham.
Wa l‑zoor kamaan,
yabga hana Haaruun wa awlaadah.
32 Wa waajib tichiilu al‑gaayme al‑zeene al‑warraaniiye hana dahiiyat al‑salaama al‑tigaddumuuha hadiiye wa tantuuha le raajil al‑diin.
33 Wa l‑gaayme di tabga gisim le raajil al‑diin min zurriiyit Haaruun al‑yigaddim al‑damm wa l‑chaham hana dahiiyat al‑salaama.
34 Achaan min dahiiyat al‑salaama al‑gaddamooha Bani Israaʼiil,
al‑zoor al‑yigaddumuuh hadiiye marfuuʼa wa l‑gaayme al‑zeene al‑warraaniiye hana l‑dahiiye,
ana Allah chiltuhum wa anteethum le raajil al‑diin Haaruun wa le zurriiytah.
Wa da yukuun leehum hagg daayim min Bani Israaʼiil.
35 « Wa da gisim Haaruun wa gisim awlaadah min al‑dahaaya al‑muharragiin al‑yigaddumuuhum le Allah.
Wa da min yoom al‑yidarrujuuhum rujaal diin wa yukuunu fi khidmit Allah.
36 Wa l‑gisim da,
Allah amar Bani Israaʼiil yantuuh leehum min yoom yamsahoohum wa yidarrujuuhum.
Wa da yabga leehum hagg daayim min zurriiye le zurriiye. »
37 Wa dool gawaaniin al‑dahaaya al‑muharragiin wa hadiiyat al‑dagiig wa dahiiyat kaffaarat al‑zanib wa dahiiyat kaffaarat al‑khata wa dahiiyat al‑darrijiin wa dahiiyat al‑salaama.
38 Wa da amur Allah antaah le Muusa fi l‑sahara fi jabal Siinaaʼ min yoom hu amar Bani Israaʼiil yigaddumu leyah dahaayaahum.