Gaddimiin dahiiyat kaffaarat al‑zanib
4
1 Wa Allah hajja le Muusa wa gaal :
2 Hajji le Bani Israaʼiil wa guul leehum :
« Ayyi waahid minku al‑yisawwi zanib bala raayah wa yikhaalif waahide min kulla wasaaya Allah be sawwiyiin amal muharram,
daahu al‑cheyy al‑waajib yisawwiih.
Dahiiyat raajil al‑diin
3 « Wa kan raajil al‑diin al‑masahooh wa darrajooh sawwa zanib wa jaabah le kulla l‑chaʼab,
hu yigaddim le Allah toor al‑ma indah ayyi eeb fi chaan al‑zanib da.
Wa da yabga dahiiye le kaffaarat al‑zanib.
4 Wa hu yijiib al‑toor fi madkhal kheemat al‑ijtimaaʼ giddaam Allah wa yukhutt iidah fi raas al‑toor wa yadbahah giddaam Allah.
5 « Wa raajil al‑diin al‑masahooh wa darrajooh yichiil min damm al‑toor wa yiwaddiih fi kheemat al‑ijtimaaʼ.
6 Wa raajil al‑diin yidiss usbaʼah fi l‑damm wa yuruchchah sabʼa marraat giddaam Allah,
mugaabil al‑sitaara fi l‑bakaan al‑mukhaddas.
7 Wa raajil al‑diin yamsah be l‑damm da guruun mukhbar al‑bakhuur al‑muʼattar al‑gaaʼid fi kheemat al‑ijtimaaʼ giddaam Allah.
Wa hu yidaffig kulla damm al‑toor al‑faddal fi gaʼar al‑madbah hana l‑dahaaya al‑muharragiin al‑gaaʼid barra fi madkhal kheemat al‑ijtimaaʼ.
8 « Wa hu yichiil kulla l‑chaham hana l‑toor al‑yigaddumuuh dahiiye le kaffaarat al‑zanib wa da l‑chaham al‑mukhatti al‑butuun wa l‑chaham al‑fi l‑butuun
9 wa l‑kalaawe be chahamhum wa chaham al‑nawaayit wa nuss al‑kibde al‑maragah maʼa l‑kalaawe.
10 Wa da misil al‑yichiilah min toor dahiiyat al‑salaama.
Wa raajil al‑diin yiharrigah fi l‑madbah hana l‑dahaaya al‑muharragiin.
11 « Wa laakin yichiil farwit al‑toor wa kulla lahamah al‑faddal wa l‑raas wa l‑dalaafe wa l‑butuun wa l‑baʼar
12 yaʼni kulla l‑faddal min al‑toor wa yiwaddiih barra min al‑fariig.
Wa da fi l‑bakaan al‑taahir al‑yidaffugu foogah al‑rumaad al‑mudahhan.
Wa yiharrigah fi l‑naar be hatab fi l‑bakaan hana l‑rumaad al‑mudahhan.
Dahiiyat mujtamaʼ Bani Israaʼiil
13 « Wa kan kulla mujtamaʼ Bani Israaʼiil yisawwu khata bala raayhum wa ma yaʼarfuuh,
da amal muharram fi wasaaya Allah.
Wa khalaas,
be da yabgo khaatiyiin.
14 Wa wakit yaʼarfu khataahum,
al‑mujtamaʼ yigaddim toor dahiiye le kaffaarat al‑zanib wa yiwadduuh giddaam kheemat al‑ijtimaaʼ.
15 Wa kubaaraat al‑mujtamaʼ yukhuttu iideehum fi raas al‑toor giddaam Allah wa yadbahooh giddaamah.
16 « Wa raajil al‑diin al‑masahooh wa darrajooh yiwaddi min damm al‑toor da fi lubb kheemat al‑ijtimaaʼ.
17 Wa yidiss usbaʼah fi l‑damm wa yuruchchah sabʼa marraat giddaam Allah mugaabil al‑sitaara.
18 Wa raajil al‑diin yamsah be l‑damm da guruun mukhbar al‑bakhuur al‑gaaʼid fi kheemat al‑ijtimaaʼ giddaam Allah.
Wa yidaffig kulla damm al‑toor al‑faddal fi gaʼar al‑madbah hana l‑dahaaya al‑muharragiin al‑gaaʼid barra fi madkhal kheemat al‑ijtimaaʼ.
19 « Wa yichiil kulla l‑chaham wa yiharrigah fi l‑madbah.
20 Wa yisawwi be l‑toor da misil hu sawwaah be l‑toor hana dahiiyat kaffaarat al‑zanib.
Wa be misil da,
raajil al‑diin yisawwi leehum kaffaara wa humman yalgo al‑khufraan.
21 Wa yiwaddi al‑faddal min al‑toor barra min al‑fariig wa yiharrigah misil hu harrag al‑toor al‑awwal.
Wa da yabga dahiiye le kaffaarat al‑zanib hana l‑mujtamaʼ.
Dahiiyat al‑cheekh
22 « Wa kan cheekh sawwa zanib bala raayah,
da amal muharram fi wasaaya Allah Ilaahah wa khalaas,
hu yabga khaati.
23 Wa kan arrafooh zanbah al‑sawwaah,
hu yigaddim dahiiye hana tees al‑ma indah ayyi eeb.
24 Wa hu yukhutt iidah fi raas al‑tees wa yadbahah fi l‑bakaan al‑yadbaho foogah al‑dahaaya al‑muharragiin giddaam Allah.
Wa da yabga dahiiye le kaffaarat al‑zanib.
25 « Wa raajil al‑diin yichiil be usbaʼah min damm al‑dahiiye hana kaffaarat al‑zanib wa yamsahah fi guruun al‑madbah hana l‑dahaaya al‑muharragiin.
Wa yidaffig al‑damm al‑faddal fi gaʼar al‑madbah da.
26 Wa yiharrig kulla l‑chaham fi l‑madbah misil hu sawwaah be l‑chaham hana dahiiyat al‑salaama.
Wa be misil da,
raajil al‑diin yisawwi kaffaarat al‑zanib le l‑cheekh wa hu yalga al‑khufraan.
Dahiiyat ayyi naadum
27 « Wa kan naadum min Bani Israaʼiil sawwa zanib bala raayah,
da amal muharram fi wasaaya Allah,
khalaas be da hu yabga khaati.
28 Wa kan arrafooh zanbah al‑sawwaah,
hu yigaddim dahiiye hana anzaay al‑ma indaha ayyi eeb fi chaan al‑zanib al‑hu sawwaah.
29 Wa hu yukhutt iidah fi raas al‑dahiiye al‑yigaddimha le kaffaarat al‑zanib.
Wa yadbah al‑dahiiye di fi l‑bakaan al‑yadbaho foogah al‑dahaaya al‑muharragiin.
30 « Wa raajil al‑diin yichiil be usbaʼah min damm al‑dahiiye wa yamsahah fi guruun al‑madbah da.
Wa yidaffig kulla l‑damm al‑faddal fi gaʼar al‑madbah hana l‑dahaaya al‑muharragiin.
31 Wa yichiil kulla l‑chaham misil gaaʼidiin yichiiluuh min dahiiyat al‑salaama wa raajil al‑diin yiharrigah fi l‑madbah wa riihtah Allah yarda beeha.
Wa raajil al‑diin yisawwi leyah kaffaara wa hu yalga al‑khufraan.
32 « Wa kan yigaddim min al‑khanam dahiiye le kaffaarat al‑zanib,
khalli yigaddim antaay al‑ma indaha ayyi eeb.
33 Wa hu yukhutt iidah fi raas al‑dahiiye al‑yigaddimha le kaffaarat al‑zanib wa yadbah al‑dahiiye le kaffaarat al‑zanib di fi l‑bakaan al‑yadbaho foogah al‑dahaaya al‑muharragiin.
34 « Wa raajil al‑diin yichiil be usbaʼah min damm al‑dahiiye hana kaffaarat al‑zanib wa yamsahah fi guruun al‑madbah hana l‑dahaaya al‑muharragiin.
Wa yidaffig kulla l‑damm al‑faddal fi gaʼar al‑madbah.
35 Wa raajil al‑diin yichiil kulla l‑chaham misil gaaʼidiin yichiiluuh min al‑kabich hana dahiiyat al‑salaama wa yiharrigah fi l‑madbah min foog le l‑dahaaya al‑muharragiin al‑gaaʼidiin fi l‑naar giddaam Allah.
Wa raajil al‑diin yisawwi leyah kaffaara le l‑zanib al‑hu sawwaah wa hu yalga al‑khufraan. »