Dahiiyat al‑salaama
3
1 Wa kan naadum yadbah dahiiyat salaama min al‑bagar,
dakar aw antaay,
khalli yigaddim le Allah bahiime al‑ma indaha ayyi eeb.
2 Wa hu yukhutt iidah fi raas al‑bahiime di wa yadbahha fi madkhal kheemat al‑ijtimaaʼ.
Wa rujaal al‑diin min zurriiyit Haaruun yuruchchu al‑damm fi nawaayit al‑madbah.
3 Wa min dahiiyat al‑salaama di,
hu yigaddim dahiiye muharraga le Allah wa da l‑chaham al‑mukhatti al‑butuun wa l‑chaham al‑fi l‑butuun
4 wa l‑kalaawe be chahamhum wa chaham al‑nawaayit wa nuss al‑kibde al‑maragah maʼa l‑kalaawe.
5 Wa zurriiyit Haaruun yiharruguuh fi l‑madbah min foog le l‑dahiiye al‑muharraga al‑gaaʼide fi hatab al‑naar.
Wa di dahiiye muharraga al‑riihitha Allah yarda beeha.
6 Wa kan hadiiytah al‑yigaddimha le Allah dahiiyat al‑salaama min al‑khanam,
dakar aw antaay,
khalli yigaddim le Allah bahiime al‑ma indaha ayyi eeb.
7 Wa kan yigaddim dahiiye hana kharuuf,
hu yigaddimah le Allah.
8 Wa hu yukhutt iidah fi raas al‑bahiime di wa yadbahha fi madkhal kheemat al‑ijtimaaʼ.
Wa rujaal al‑diin min zurriiyit Haaruun yuruchchu al‑damm fi nawaayit al‑madbah.
9 Wa min dahiiyat al‑salaama di,
hu yigaddim dahiiye muharraga le Allah wa da kulla l‑chaham wa kulla l‑danab al‑magtuuʼ min gaʼarah wa l‑chaham al‑mukhatti al‑butuun wa l‑chaham al‑fi l‑butuun
10 wa l‑kalaawe be chahamhum wa chaham al‑nawaayit wa nuss al‑kibde al‑maragah maʼa l‑kalaawe.
11 Wa raajil al‑diin yiharrigah fi l‑madbah wa da misil akil muharrag le Allah.
12 Wa kan naadum yigaddim dahiiye hana anzaay,
hu yigaddimha le Allah.
13 Wa hu yukhutt iidah fi raas al‑bahiime di wa yadbahha fi madkhal kheemat al‑ijtimaaʼ.
Wa rujaal al‑diin min zurriiyit Haaruun yuruchchu al‑damm fi nawaayit al‑madbah.
14 Wa min al‑dahiiye di,
yigaddim dahiiye muharraga le Allah al‑chaham al‑mukhatti al‑butuun wa l‑chaham al‑fi l‑butuun
15 wa l‑kalaawe be chahamhum wa chaham al‑nawaayit wa nuss al‑kibde al‑maragah maʼa l‑kalaawe.
16 Wa raajil al‑diin yiharrigah fi l‑madbah misil akil.
Wa di dahiiye muharraga le Allah al‑yarda be riihitha.
Wa kulla l‑chaham hu hana Allah.
17 Ma taakulu chaham wa la damm.
Wa da yabga leeku chart daayim min zurriiye le zurriiye fi ayyi bakaan al‑taskunu foogah.