Mukhbar al‑bakhuur le Allah
30
1 « ‹ Wa sawwi mukhbar min khachab al‑sunt le tiharrig foogah al‑bakhuur.
2 Wa l‑mukhbar da yukuun murabbaʼ tuulah duraaʼ wa urdah kula duraaʼ.
Wa tuulah foog kamaan duraaʼeen.
Wa l‑mukhbar da yukuun hu wa guruunah sunʼa waahide bas.
3 Wa amsah daharah wa kulla jawaanibah wa guruunah be dahab saafi.
Wa darris khachmah kula be dahab.
4 Wa sawwi leyah khawaatim itneen tihit min al‑diraasa be l‑jaanib al‑waahid wa be l‑jaanib al‑aakhar kula.
Wa be da,
yagdaro yidakhkhulu le l‑mukhbar iidaan itneen le yichiiluuh beehum.
5 Wa sawwi al‑iidaan al‑itneen dool be hatab al‑sunt wa amsahhum be dahab.
6 Wa khutt al‑mukhbar da barra min al‑sitaar al‑gaaʼid giddaam al‑sanduug al‑foogah liihaan al‑muʼaahada.
Al‑sanduug wa sidaadtah gaaʼidiin wara l‑sitaar.
Wa da l‑bakaan al‑ana nigaabilak foogah.
7 « ‹ Haaruun yiharrig al‑bakhuur al‑muʼattar da kulli fajur wakit yaji yinaddif al‑faanuus.
8 Wa battaan yiharrigah achiiye wakit yaji yigabbid al‑faanuus.
Al‑bakhuur yiharruguuh daayman fajur wa achiiye giddaam Allah min zurriiye le zurriiye.
9 Ma tiharrig fi l‑mukhbar da bakhuur al‑Allah ma azan beyah wa la dahiiye muharraga wa la hadiiye hana dagiig.
Wa ma tusubbu foogah hadiiyat charaab.
10 Wa marra fi l‑sana,
Haaruun waajib yichiil min damm hana l‑bahiime al‑dabahooha le kaffaarat al‑zanib wa yamsahah fi guruun al‑mukhbar da.
Wa be da,
hu yikhassis al‑mukhbar marra waahide fi l‑sana,
min zurriiye le zurriiye.
Wa l‑mukhbar da yabga mukhaddas marra waahid le Allah.
› »
Gurus al‑fadayaan
11 Wa battaan Allah hajja le Muusa wa gaal :
12 « Wakit tahsib Bani Israaʼiil le talga adadhum,
khalli kulla raajil yafda nafsah wa yigaddim fidya le Allah achaan ma yagaʼ fooghum waba wakit inta gaaʼid tahsibhum.
13 Ayyi waahid kan hasabooh khalaas,
yanti nuss hajar hana fudda hadiiye le Allah.
Wa hasab al‑wazin al‑rasmi hana l‑bakaan al‑mukhaddas,
ayyi hajar fudda yawzin 12 giraam.
14 Wa ayyi waahid al‑umrah tamma 20 sana wa ziyaada kan hasabooh khalaas,
waajib yanti hadiiye le Allah.
15 Al‑khani ma yanti aktar min nuss hajar wa l‑fagri kula ma yanti angas achaan di hadiiye le Allah al‑tabga kaffaara le nufuushum.
16 Chiil al‑fudda hana l‑kaffaara di min Bani Israaʼiil wa astaʼmalha le khidmit kheemat al‑ijtimaaʼ.
Wa tabga kaffaara le Bani Israaʼiil wa zikra giddaam Allah. »
Hoot al‑nahaas
17 Wa battaan Allah hajja le Muusa wa gaal :
18 « Asnaʼ hoot min nahaas le l‑wadu.
Wa sawwi leyah gaʼar min nahaas wa khuttah been kheemat al‑ijtimaaʼ wa l‑madbah.
Wa subb foogah almi.
19 Wa Haaruun wa awlaadah yilwaddo be l‑almi da.
20 Gubbaal ma yadkhulu fi kheemat al‑ijtimaaʼ,
yilwaddo achaan ma yumuutu.
Wa gubbaal ma yaju gariib le l‑madbah le yigaddumu le Allah hadiiye muharraga,
21 yilwaddo achaan ma yumuutu.
Wa da yabga chart daayim le Haaruun wa awlaadah min zurriiye le zurriiye. »
Dihin al‑masahaan
22 Wa battaan Allah hajja le Muusa wa gaal :
23 « Chiil min ahsan al‑riihe.
Chiil min al‑khumra 6 kiilo wa min al‑sandal 3 kiilo wa min al‑itir 3 kiilo
24 wa min al‑girfa 3 kiilo.
Wa da kula hasab al‑wazin al‑rasmi hana l‑bakaan al‑mukhaddas.
Wa chiil battaan 4 liitir min dihin al‑zaytuun.
25 Wa da kulla khalbitah sawa wa sawwi beyah dihin muʼattar khaass le l‑masahaan.
Wa l‑yisawwi al‑dihin da,
naadum maʼruuf fi khalbitiin al‑itir.
Wa da yabga dihin khaass le l‑masahaan.
26 Wa be l‑dihin al‑khaass da,
amsah kheemat al‑ijtimaaʼ wa l‑sanduug al‑foogah liihaan al‑muʼaahada
27 wa l‑tarabeeza wa kulla muʼiddaatha wa l‑faanuus wa muʼiddaatah wa mukhbar al‑bakhuur.
28 Wa battaan amsah al‑madbah hana l‑dahaaya al‑muharragiin wa muʼiddaatah wa l‑hoot wa gaʼarah kula.
29 Wa khassishum le yukuunu mukhaddasiin marra waahid.
Wa l‑cheyy al‑yilammishum kula yabga mukhaddas.
30 Wa baʼad da,
amsah Haaruun wa awlaadah wa khassishum achaan yabgo leyi rujaal diin.
31 Wa guul le Bani Israaʼiil :
‹ Dihin al‑masahaan da yabga leyi khaass min zurriiye le zurriiye.
32 Ma tamsaho beyah ayyi naadum wa la tikhalbutu dihin aakhar mislah.
Hu khaass wa waajib intu kula taʼarfu kadar hu khaass.
33 Wa ayyi naadum al‑yikhalbit dihin mislah aw yamsahah le naadum ma min rujaal al‑diin,
al‑naadum da waajib yafsuluuh min ahalah.
› »
Al‑bakhuur al‑muʼattar
34 Wa battaan Allah gaal le Muusa :
« Chiil fi wazin mutasaawi al‑aryaah dool wa humman al‑samukh wa l‑dufur wa l‑lubaan wa l‑samukh al‑muʼattar.
35 Wa khalbit minhum bakhuur muʼattar.
Wa l‑yisawwi al‑bakhuur da,
naadum maʼruuf fi khalbitiin al‑itir.
Wa yukuun sameh wa saafi wa khaass.
36 Wa chiil minnah wa arhakah maarin wa khuttah giddaam al‑sanduug al‑foogah liihaan al‑muʼaahada fi kheemat al‑ijtimaaʼ wa da l‑bakaan al‑ana nigaabilak foogah.
Wa da khalli yabga leeku mukhaddas marra waahid.
37 Wa ma tisawwu le nufuusku bakhuur misil al‑bakhuur da wa laakin ajʼalooh khaass le Allah.
38 Wa ayyi naadum al‑yisawwi bakhuur mislah le yuchummah,
waajib yafsuluuh min ahalah. »