Khassisiin rujaal al‑diin
29
1 « ‹ Daahu kikkeef tisawwi le tikhassis Haaruun wa awlaadah le yabgo leyi rujaal diin.
Chiil toor wa kubchaan itneen al‑ma induhum ayyi eeb.
2 Wa chiil dagiig hana gameh wa sawwi beyah khubza bala tawwaara wa kaʼak bala tawwaara al‑tisawwiih be dihin wa kisaar mamsuuh be dihin.
3 Wa kulla l‑khumaam da,
subbah fi soosal wa gaddimah be l‑soosal da maʼa l‑toor wa l‑kubchaan al‑itneen.
4 Wa naadi Haaruun wa awlaadah yaju fi madkhal kheemat al‑ijtimaaʼ wa barridhum.
5 Wa chiil al‑khulgaan wa labbis Haaruun al‑jawwaaniiye wa l‑jallaabiiye wa l‑farmala wa l‑sideeriiye.
Wa arbut al‑farmala be l‑hizaam.
6 Wa khutt al‑kadmuul fi raasah wa sabbit foogah al‑hafiide al‑mukhassasa.
7 Wa chiil dihin al‑masahaan wa subbah fi raasah wa amsahah.
8 Wa baʼad da,
jiib awlaadah wa labbishum jawwaaniiyaat.
9 Wa ayyi waahid,
arbut sulbah be hizaam wa khutt leyah kadmuul.
Wa misil da,
darrij leyi Haaruun wa awlaadah.
Wa khidmit rujaal al‑diin tukuun leehum misil chart daayim.
Dahiiyat al‑toor
10 « ‹ Wa battaan jiib al‑toor giddaam kheemat al‑ijtimaaʼ wa khalli Haaruun wa awlaadah yukhuttu iideehum fi raas al‑toor da.
11 Wa adbah al‑toor giddaam Allah fi madkhal kheemat al‑ijtimaaʼ.
12 Wa chiil min damm al‑toor be usbaʼak wa khuttah fi guruun al‑madbah.
Wa l‑baagi min al‑damm kamaan subbah fi gaʼar al‑madbah.
13 Wa chiil kulla l‑chaham al‑mukhatti al‑butuun wa nuss al‑kibde wa l‑kalaawe be chahamhum wa harrighum fi l‑madbah.
14 Wa laakin laham al‑toor wa farwitah wa baʼarah,
harrighum barra min al‑fariig achaan di dahiiye le kaffaarat al‑zanib.
Dahiiyat al‑kabich al‑awwalaani
15 « ‹ Wa chiil waahid min al‑kubchaan al‑itneen wa khalli Haaruun wa awlaadah yukhuttu iideehum fi raasah.
16 Adbah al‑kabich wa chiil dammah wa ruchchah fi kulla nawaayit al‑madbah.
17 Wa gattiʼ laham al‑kabich da dugaag dugaag wa khassil butuunah wa dalaafeeh wa khuttuhum maʼa l‑raas wa l‑gitaʼ al‑aakhariin.
18 Wa harrig kulla l‑kabich da fi l‑madbah achaan di dahiiye muharraga le Allah al‑hu yarda be riihitha achaan hi hadiiye le Allah.
Dahiiyat al‑kabich al‑taani
19 « ‹ Wa chiil al‑kabich al‑taani wa khalli Haaruun wa awlaadah yukhuttu iideehum fi raasah.
20 Adbah al‑kabich wa chiil min dammah wa khuttah fi halamat al‑adaan al‑zeene hana Haaruun wa awlaadah.
Wa khuttah fi asaabiʼhum al‑kubaar hana iideehum wa rijleehum al‑zeenaayaat.
Wa ruchch baagi al‑damm fi nawaayit al‑madbah.
21 Wa chiil min al‑damm al‑sabbeetah fi l‑madbah wa dihin al‑masahaan wa ruchchah fi Haaruun wa lubaasah wa fi awlaadah wa lubaashum.
Wa be da,
Haaruun wa awlaadah wa khulgaanhum yabgo mukhassasiin le Allah.
22 « ‹ Wa chiil min al‑kabich da chaham al‑danab wa l‑chaham al‑mukhatti al‑butuun wa nuss al‑kibde wa l‑kalaawe be chahamhum wa l‑gaayme al‑zeene.
Wa da kabich hana darrijiin.
23 Wa chiil min al‑soosal al‑gaaʼid giddaam Allah khubza waahide wa kaʼakaay al‑sawwooha be dihin wa kisaaraay.
24 Wa khuttuhum fi iideen Haaruun wa awlaadah le yigaddumuuhum hadaaya marfuuʼiin le Allah.
25 Wa battaan chiil al‑hadaaya dool min iideehum wa harrighum fi l‑madbah maʼa l‑dahiiye al‑muharraga le Allah al‑hu yarda be riihitha achaan hi hadiiye le Allah.
26 Wa chiil zoor al‑kabich hana darrijiin Haaruun wa gaddimah hadiiye marfuuʼa le Allah.
Wa da yabga hanaak inta.
Al‑waajib le rujaal al‑diin
27 « ‹ Wa min kabich al‑darrijiin hana Haaruun wa awlaadah,
khassis al‑zoor wa l‑gaayme al‑gaddamtuhum hadiiye marfuuʼa.
Dool yukuunu le Haaruun wa awlaadah.
28 Al‑laham da yabga hagg daayim le Haaruun wa awlaadah min kulla dahaaya al‑salaama al‑yadbahoohum Bani Israaʼiil wa yigaddumuuhum hadiiye le Allah.
29 « ‹ Wa ahfado al‑khulgaan al‑khaassiin hana Haaruun achaan ayyi waahid min awlaadah al‑yaji baʼadah yalbashum wakit yamsahooh wa yidarrujuuh.
30 Wa l‑wileed al‑yabga kabiir rujaal al‑diin baʼad Haaruun yalbashum sabʼa ayyaam gabul ma yadkhul fi kheemat al‑ijtimaaʼ wa yakhdim fi l‑bakaan al‑mukhaddas.
Kikkeef yaakulu laham al‑dahiiye
31 « ‹ Wa laakin al‑laham al‑yifaddil min kabich al‑darrijiin,
tichiilah wa tirakkibah fi bakaan mukhaddas.
32 Haaruun wa awlaadah yaakulu laham al‑kabich da wa l‑khubza al‑gaaʼide fi l‑soosal fi madkhal kheemat al‑ijtimaaʼ.
33 Humman yaakulu hadaaya al‑kaffaara dool wakit yidarrujuuhum wa yikhassusuuhum.
Naadum aakhar ke ma yaakul minhum achaan al‑hadaaya dool mukhaddasiin.
34 Wa kan yifaddil cheyy min laham kabich al‑darrijiin aw min al‑khubza lahaddi ambaakir,
ma yaakuluuh achaan da mukhaddas.
Khalli yiharruguuh fi l‑naar.
Sabʼa yoom hana darrijiin wa khassisiin
35 « ‹ Sawwi le Haaruun wa awlaadah misil ana amartak beyah.
Wa muddit darrijiinhum tukuun sabʼa yoom.
36 Wa gaddim kulla yoom toor dahiiye le kaffaarat al‑zanib.
Wa khassis al‑madbah kula be dahiiyat al‑kaffaara wa amsahah le yukuun mukhaddas.
37 Fi muddit sabʼa yoom,
tadbah dahiiyat al‑kaffaara fi l‑madbah wa tikhassisah.
Wa be da,
yukuun mukhaddas marra waahid.
Wa kulla cheyy al‑yilammis al‑madbah yukuun mukhaddas.
Al‑dahiiye al‑yoomiiye
38 « ‹ Daayman wa kulla yoom,
gaddim fi l‑madbah khurfaan itneen awlaad sana.
39 Al‑kharuuf al‑waahid,
gaddimah be fajur wa l‑aakhar be achiiye.
40 Wa maʼa l‑kharuuf al‑awwal,
gaddim kooro hana dagiig mukhalbat be liitir hana dihin zaytuun maʼsuur.
Wa gaddim maʼaayah liitir hana khamar al‑inab hadiiyat charaab.
41 Wa l‑kharuuf al‑taani,
gaddimah be achiiye.
Wa gaddim maʼaayah hadiiye hana dagiig wa hadiiyat charaab misil inta sawweetah be fajur.
Wa hi hadiiye muharraga le Allah al‑hu yarda be riihitha.
42 Min zurriiye le zurriiye,
gaddumu daayman al‑dahaaya al‑muharragiin dool fi madkhal kheemat al‑ijtimaaʼ giddaam Allah.
Wa da l‑bakaan al‑ana nigaabilak foogah le nikallimak.
43 Wa hinaak nigaabil Bani Israaʼiil wa be gudrat majdi,
al‑bakaan da yabga mukhaddas.
44 Wa be da,
nikhaddis kheemat al‑ijtimaaʼ wa l‑madbah.
Wa nikhassis Haaruun wa awlaadah le yabgo leyi rujaal diin.
45 Wa naskun maʼa Bani Israaʼiil wa nabga Ilaahhum.
46 Wa be da,
yaʼarfu kadar ana bas Allah Ilaahhum al‑maragtuhum min balad Masir le naskun maʼaahum.
Ana Allah Ilaahhum.