Allah azal naas le yasnaʼo al‑muʼiddaat
31
1 Wa Allah hajja le Muusa battaan wa gaal :
2 « Asmaʼ.
Ana azalt Basaliil wileed Uuri wileed Huur min gabiilat Yahuuza.
3 Ana nazzalt Ruuhi foogah wa anteetah khibra wa fihim wa maʼrafa le yasnaʼ kulli cheyy.
4 Wa da,
yaʼarif yasnaʼ achya be dahab wa fudda wa nahaas
5 wa yagtaʼ al‑hujaar al‑khaaliyiin wa yanguchhum wa yanjur al‑khachab wa yasnaʼ kulla cheyy.
6 Wa be da,
ana kallaft Uhuliyaab wileed Akhisamaak min gabiilat Daan le yisaaʼidah.
Wa battaan,
ana anteet khibra le kulla l‑sinaaʼiyiin le yisawwu kulla l‑achya al‑ana amartak beehum.
Wa humman
7 kheemat al‑ijtimaaʼ
wa l‑sanduug al‑foogah liihaan al‑muʼaahada
wa sidaadtah al‑yisidduuh beeha
wa kulla muʼiddaat al‑kheema
8 wa l‑tarabeeza wa kulla muʼiddaatha
wa l‑faanuus hana l‑dahab al‑saafi wa kulla muʼiddaatah
wa mukhbar al‑bakhuur
9 wa l‑madbah hana l‑dahaaya al‑muharragiin wa kulla muʼiddaatah
wa l‑hoot wa gaʼarah
10 wa l‑khulgaan al‑khaaliyiin al‑khaassiin le Haaruun raajil al‑diin
wa khulgaan iyaalah wakit yakhdumu misil rujaal diin
11 wa dihin al‑masahaan
wa l‑bakhuur al‑muʼattar al‑yiharruguuh fi l‑bakaan al‑mukhaddas.
« Wa humman yisawwu kulla l‑achya dool misil ana amartak beyah. »
Tabbigiin churuut yoom al‑sabt
12 Wa battaan Allah gaal le Muusa :
13 « Guul le Bani Israaʼiil :
‹ Ahfado yoomi hana l‑sabt achaan ana jaʼaltah alaama beeni wa beenku min zurriiye le zurriiye.
Wa be da,
taʼarfu kadar ana Allah bas nikhassisku.
14 Wa ahfado yoom al‑sabt achaan hu yoom mukhaddas leeku.
Kan naadum ma yihtarim yoom al‑sabt,
waajib yaktuluuh.
Wa kan naadum yisawwi ayyi khidme fi l‑yoom da,
waajib yafsuluuh min ahalah.
15 Fi sitte yoom,
sawwu khidmitku wa laakin al‑yoom al‑saabiʼ da,
hu sabt.
Hu yoom hana raaha,
mukhaddas le Allah.
Wa kan naadum sawwa ayyi amal fi yoom al‑sabt da,
waajib yaktuluuh.
16 Khalli Bani Israaʼiil yahfado yoom al‑sabt wa yiʼayyuduuh min zurriiye le zurriiye misil muʼaahada daayme.
17 Wa hu yabga alaama daayme beeni wa been Bani Israaʼiil achaan ana Allah khalagt al‑samaawaat wa l‑ard fi sitte yoom.
Wa fi l‑yoom al‑saabiʼ kamaan,
ana ma khalagt cheyy.
Wa be da,
ana jaʼaltah yoom hana raaha.
› »
18 Wa wakit Allah kammal kalaamah maʼa Muusa fi jabal Siinaaʼ,
antaah liihaan al‑muʼaahada.
Wa humman liihaan itneen hana hajar al‑Allah zaatah katab fooghum kalaamah.