Al‑manna wa l‑salwa
16
1 Wa kulla mujtamaʼ Bani Israaʼiil rahalo min Iliim fi yoom 15 hana l‑chahar al‑taani min marigiinhum min Masir.
Wa macho ale saharat Siin al‑gaaʼide ambeen Iliim wa jabal Siinaaʼ.
2 Wa fi l‑sahara di,
kulla mujtamaʼ Bani Israaʼiil laamo Muusa wa Haaruun
3 wa gaalo leehum :
« Akheer leena kan Allah katalaana fi balad Masir wakit aniina chabʼaaniin jamb al‑buraam hana l‑laham.
Wa laakin intu maragtuuna fi l‑sahara di le numuutu kullina min al‑juuʼ ! »
4 Wa Allah gaal le Muusa :
« Hassaʼ ana ninazzil leeku akil min al‑sama.
Wa l‑chaʼab yamchu yilaggutu akil al‑yitimmuhum hana kulla yoom.
Wa be da,
nijarribku le naʼarif kan intu titaabuʼu wasiiyaati walla la.
5 Fi l‑yoom al‑saadis,
laggutu wa jahhuzu al‑akil wa hu yabga marrateen ziyaada min al‑ayyaam al‑aakhariin. »
6 Wa khalaas,
Muusa wa Haaruun gaalo le kulla Bani Israaʼiil :
« Al‑yoom achiiye,
taʼarfu kadar Allah hu bas maragaaku min balad Masir.
7 Wa ambaakir fajur,
tichiifu majd Allah yibiin leeku achaan hu simiʼ luwaamitku.
Kan leena aniina,
aniina ke chunu al‑intu tuluumuuna ? »
8 Wa Muusa gaal battaan :
« Allah hu bas al‑yantiiku be achiiye laham taakuluuh.
Wa be fajur,
tachbaʼo be akil min al‑sama achaan hu simiʼ luwaamitku.
Wa kan tuluumuuna aniina da,
intu lumtu Allah. »
9 Wa baʼad da,
Muusa gaal le Haaruun :
« Guul le kulla mujtamaʼ Bani Israaʼiil :
‹ Taʼaalu giddaam Allah achaan hu simiʼ luwaamitku.
› »
10 Wa wakit Haaruun bada yikallim leehum be l‑kalaam da,
humman kulluhum anlafato ale l‑sahara wa chaafo majd Allah baan leehum fi l‑sahaab.
11 Wa Allah hajja le Muusa wa gaal :
12 « Ana simiʼt luwaamit Bani Israaʼiil.
Guul leehum :
‹ Al‑yoom achiiye,
taakulu laham wa ambaakir fajur,
tachbaʼo be l‑akil al‑yanzil min al‑sama.
Wa be da,
taʼarfu kadar ana bas Allah Ilaahku.
› »
13 Wa khalaas be achiiye,
al‑teer al‑usmah salwa ja sadda al‑bakaan al‑humman naazliin foogah.
Wa be fajur,
al‑karany nazal wa khatta hawaale al‑fariig.
14 Wakit al‑karany chirib,
khalla cheyy khafiif misil al‑talaj laasig fi l‑ard.
15 Wa wakit Bani Israaʼiil chaafooh,
assaaʼalo ambeenaathum wa gaalo :
« Da chunu ?
» Achaan humman abadan ma yaʼarfuuh.
Laakin Muusa gaal leehum :
« Da bas al‑akil al‑antaaku Allah le taakuluuh.
16 Wa Allah amaraaku le tilaggutu minnah kulla yoom wa ayyi naadum yilaggit hasab al‑yitimm leyah.
Wa tichiilu kooro le ayyi naadum min al‑aayila. »
17 Wa Bani Israaʼiil sawwo misil ooroohum.
Waahidiin laggato katiir wa waahidiin laggato chiyya.
18 Laakin wakit macho gaawasooh,
al‑laggato katiir ma faddal leehum wa l‑laggato chiyya kula ma gassar leehum.
Wa be da,
ayyi waahid laggat hasab al‑yitimm leyah.
19 Wa khalaas,
Muusa gaal leehum :
« Khalli naadum ma yudumm al‑akil da lahaddi fajur. »
20 Wa laakin waahidiin minhum ma simʼo kalaam Muusa wa dammo min al‑akil da lahaddi fajur.
Wa l‑akil al‑dammooh da affan wa dawwad.
Wa fi l‑bakaan da,
Muusa ziʼil fooghum.
21 Wa kulli fajur,
humman yilaggutu al‑akil da wa ayyi naadum yilaggit hasab al‑yitimm leyah.
Wakit al‑harraay tidaahi,
al‑akil da yumuuʼ.
22 Wa fi l‑yoom al‑saadis,
yilaggutu akil ziyaada yaʼni koorteen le ayyi naadum.
Wa chuyuukh al‑mujtamaʼ jo kallamo Muusa be l‑cheyy da.
23 Wa hu gaal leehum :
« Allah yuguul ke :
‹ Ambaakir da yoom al‑sabt wa da yoom Allah wa hu mukhaddas wa tinjammo foogah.
Wa l‑cheyy al‑tidooru tidissuuh fi l‑furun,
dissuuh al‑yoom.
Wa l‑tidooru tirakkubuuh fi l‑naar kula,
rakkubuuh al‑yoom.
Wa l‑faddal min al‑akil da,
dummuuh lahaddi fajur.
› »
24 Khalaas,
dammo al‑akil da lahaddi fajur misil Muusa amaraahum.
Wa l‑akil da wa la affan wa la dawwad.
25 Wa Muusa gaal :
« Aakuluuh fi l‑yoom da achaan hu yoom al‑sabt le Allah.
Wa fi yoom al‑sabt,
ma talgo akil al‑tilaggutuuh.
26 Fi muddit sitte yoom,
laggutu al‑akil al‑yanzil min al‑sama.
Wa l‑yoom al‑saabiʼ da yabga yoom al‑sabt.
Fi l‑yoom da,
al‑akil ma yanzil. »
27 Wa wakit al‑yoom al‑saabiʼ ja,
waahidiin min al‑chaʼab macho le yilaggutu al‑akil al‑yanzil min al‑sama wa laakin ma ligooh.
28 Wa Allah gaal le Muusa :
« Le mata taabo ma titabbugu gawaaniini wa wasiiyaati ?
29 Ma taʼarfu kadar ana Allah azalt leeku yoom al‑sabt le tinjammo ?
Wa fi chaan da,
fi l‑yoom al‑saadis anteetku akil hana yoomeen.
Wa khalli ayyi naadum yagood fi beetah ma yamrug fi l‑yoom al‑saabiʼ. »
30 Wa be sabab da,
kulla l‑chaʼab anjammo fi buyuuthum fi l‑yoom al‑saabiʼ.
31 Wa Bani Israaʼiil sammo al‑akil al‑yanzil min al‑sama da manna.
Hi misil iyaal al‑kussubarra wa loonha abyad wa taʼamha misil kaʼak be asal.
32 Wa Muusa gaal :
« Daahu amur Allah.
Chiilu kooro malaan manna wa ahfadooh le zurriiyitku achaan humman yichiifu al‑akil al‑ana anteetah leeku fi l‑sahara wakit maragtuku min balad Masir. »
33 Wa Muusa gaal le Haaruun :
« Chiil jarr wa subb foogah kooro hana manna wa khuttah giddaam Allah.
Wa yukuun mahfuud adiil wa yagood min zurriiye le zurriiye. »
34 Wa Haaruun chaalah wa baʼadeen khattaah fi sanduug maʼa liihaan al‑muʼaahada achaan yukuun mahfuud adiil misil Allah amar beyah Muusa.