Bani Israaʼiil chakaro Allah wa khanno
15
1 Wa khalaas,
Muusa wa Bani Israaʼiil khanno le Allah al‑khine al‑buguul :
Ana nikhanni le Allah
achaan hu wassaf gudurtah al‑majiide.
Wa hu rama fi l‑bahar
al‑juwaad wa siidah.
2 Allah hu gudurti
wa fiyah hu,
ana nikhanni.
Hu bas al‑najjaani
wa hu Rabbi al‑ana nimajjidah.
Hu al‑Rabb al‑abuuyi abadah.
Ana niʼazzimah !
3 Rabbina siid al‑harib
wa hu bas usmah Allah.
4 Arabaat Firʼoon malik Masir wa kulla deechah,
fi l‑bahar Allah dassaahum.
Wa askarah al‑adiiliin,
al‑bahar al‑Ahmar akalaahum.
5 Wa wagaʼo misil al‑hajar lahaddi aakhir al‑bahar
wa almi al‑khariig khattaahum.
6 Ya Allah,
iidak al‑zeene
wassafat gudurtak.
Ya Allah,
iidak al‑zeene
dammarat udwaanak.
7 Be majdak al‑aziim
rameet udwaanak.
Wa misil al‑naar taakul al‑gechch,
harragtuhum be naar khadabak.
8 Wa min inta nafakht al‑riih,
al‑almi lamma bakaan waahid.
Wa l‑challaal wagaf misil al‑durdur
wa almi al‑khariig jamad fi ust al‑bahar.
9 Wa l‑adu fachar be nafsah wa gaal :
« Namchi waraahum,
nalhaghum nidammirhum.
Wa nichiil al‑khaniime
wa minha nachbiʼ nafsi.
Nisill seefi
wa be iidi narhakhum. »
10 Wa laakin inta nafakht fi l‑bahar
wa l‑almi khatta al‑Masriyiin.
Wa tamaso misil durdumt al‑hadiid
fi almi al‑khariig.
11 Ya Allah,
yaatu mislak inta
fi ilaahaat al‑gabaayil ?
Yaatu mislak,
ya Jaliil,
ya Khudduus ?
Inta al‑waajib leek al‑chukur
wa inta al‑Gaadir tisawwi ajaayib.
12 Wakit maddeet iidak al‑zeene,
al‑ard zaratathum.
13 Be rahmatak inta gudt chaʼabak
al‑min al‑moot fadeethum.
Wa be gudurtak waddeethum
ale bakaanak al‑mukhaddas.
14 Wa l‑gabaayil al‑simʼo beehum rajafo
wa min al‑khoof,
al‑Filistiyiin anbahato.
15 Wa chuyuukh Adoom barjalo
wa muluuk Muwaab rajafo
wa kulla sukkaan Kanʼaan ayyaso.
16 Wa fooghum kulluhum
al‑ruʼub wa l‑barjaal wagaʼo.
Wa be gudrat iidak al‑chadiide,
bigo misil al‑hajar wa sakato
hatta chaʼabak gidro addo.
Ya Allah,
hatta gidro addo
chaʼabak al‑inta fadeethum !
17 Inta tiwaddiihum fi bakaanak
wa tisakkinhum fi jabal warasatak.
Ya Allah,
da l‑bakaan al‑azaltah
le yabga beetak.
Ya Rabb,
da beetak al‑mukhaddas
al‑sabbatatah iidak.
18 Allah yamluk daayman wa ila l‑abad !
Mariyam khannat khine al‑nasur
19 Wakit kheel Firʼoon malik Masir wa arabaatah wa siyaadhum dakhalo fi l‑bahar,
Allah galab fooghum al‑almi.
Wa laakin Bani Israaʼiil gataʼo al‑bahar fi l‑turaab al‑yaabis.
20 Wa khalaas,
Mariyam al‑nabiiye akhut Haaruun chaalat nuggaara sakhayre wa kulla l‑awiin taabaʼanha wa gamman yalʼaban wa yuduggan nagaagiirhin.
21 Wa Mariyam khannat wa gaalat :
« Khannu le Allah
achaan hu wassaf gudurtah al‑majiide.
Wa hu rama fi l‑bahar
al‑juwaad wa siidah ! »
Bani Israaʼiil rahalo le saharat Chuur
22 Wa baʼad da,
Muusa chaal Bani Israaʼiil min al‑bahar al‑Ahmar wa waddaahum le saharat Chuur.
Wa fi muddit talaata yoom,
humman saayriin fi l‑sahara wa ma ligo almi yacharbooh.
23 Wa wakit wassalo fi Murra,
ligo almi wa laakin al‑almi da murr,
ma gidro yacharbooh.
Wa fi chaan da bas,
al‑bakaan da sammooh Murra.
24 Fi l‑bakaan da,
laamooh le Muusa wa gaalo :
« Nacharbo chunu ? »
25 Wa Muusa saʼal Allah wa Allah wassaf leyah chadara waahide.
Wa Muusa gataʼ minha firiʼ wa zagalah fi l‑almi da wa l‑almi bigi halu.
Wa fi l‑bakaan da bas,
Allah anta le Bani Israaʼiil gawaaniin wa churuut.
Wa jarrabaahum
26 wa gaal :
« Kan tasmaʼo kalaami ana Allah Ilaahku wa tisawwu al‑adiil giddaami wa titaabuʼu wasiiyaati wa titabbugu kulla l‑churuut,
ana ma ninazzil foogku waba misil al‑nazzaltah fi l‑Masriyiin.
Achaan ana Allah al‑yachfiiku. »
27 Wa baʼad da,
humman jo fi Iliim wa ligo foogha 12 een hana almi wa 70 nakhal.
Wa nazalo jamb al‑almi da.