14
1 Wakit humman fi Itaam,
Allah hajja le Muusa wa gaal :
2 « Guul le Bani Israaʼiil khalli yigabbulu chiyya wa yagoodu giddaam Khachum al‑Hiruut.
Wa da ambeen Migduul wa l‑bahar,
mugaabil Baʼal Safuun.
Wa fi l‑bakaan da bas,
intu tanzulu jamb al‑bahar.
3 Wa khalaas,
Firʼoon malik Masir yifakkir wa yuguul :
‹ Daahu Bani Israaʼiil waddaro fi l‑kadaade wa l‑sahara sajanathum. ›
4 Wa battaan ana nigawwi raas Firʼoon wa hu yamchi waraaku le yakrubku.
Wa be da,
ana niwassif gudurti al‑majiide beyah hu wa askarah.
Wa misil da,
kulla l‑Masriyiin yaʼarfu kadar ana bas Allah.
» Wa Bani Israaʼiil macho nazalo fi l‑bakaan da misil Allah amaraahum.
Al‑Masriyiin macho wara Bani Israaʼiil
5 Wakit Firʼoon malik Masir simiʼ kadar Bani Israaʼiil arrado minnah,
tawwaali lamma khaddaamiinah wa khayyaro fikirhum wa gaalo :
« Chunu al‑aniina sawweena da ?
Khalleena Bani Israaʼiil marago min baladna.
Waddarna al‑iid al‑takhdim leena ! »
6 Wa l‑malik chaal arabaatah hana l‑harib wa kulla askarah.
7 Chaal 600 arabaat harib min al‑nooʼ al‑adiil wa l‑arabaat al‑aakhariin hana l‑Masriyiin kamaan taabaʼoohum be wara.
Wa fi ayyi waahide fiyah zaabit.
8 Wa Allah gawwa raas malik Masir achaan yamchi wara Bani Israaʼiil al‑marago wa maachiin farhaaniin be hurriiyithum.
9 Al‑Masriyiin macho wara Bani Israaʼiil be kulla kheel al‑malik wa arabaatah wa siyaadhum wa kulla deechah.
Wa lihgoohum le Bani Israaʼiil fi l‑bakaan al‑humman nazalo foogah jamb al‑bahar fi Khachum al‑Hiruut mugaabil Baʼal Safuun.
10 Wakit malik Masir gaaʼid yigarrib leehum,
Bani Israaʼiil chaafo min baʼiid al‑Masriyiin jaayiin waraahum.
Wa min chiddit al‑khoof,
aato wa gaalo :
« Ya Allah,
najjiina ! »
11 Wa fi l‑bakaan da,
laamooh le Muusa wa gaalo :
« Fi Masir ma fi khubuur walla ?
Maala jibtina numuutu fi l‑sahara di ?
Le chunu maragtina min Masir ?
12 Wa fi chaan da bas,
wakit aniina fi Masir kallamnaak wa gulna leek :
‹ Khalliina saakit !
Nagoodu abiid le l‑Masriyiin bas.
Da akheer leena min numuutu fi l‑sahara !
› »
13 Wa laakin Muusa radda leehum wa gaal :
« Ma takhaafo !
Agoodu bakaan waahid wa chiifu kikkeef al‑yoom Allah yinajjiiku !
Al‑Masriyiin al‑intu gaaʼidiin tichiifuuhum al‑yoom,
abadan ma tichiifuuhum !
14 Daahu Allah yihaarib aduuku.
Wa laakin intu kamaan,
agoodu saakit bas. »
Allah sabbat guluub Bani Israaʼiil
15 Khalaas,
Allah gaal le Muusa :
« Maala tikoorik leyi battaan ?
Guul le Bani Israaʼiil khalli yichiilu deribhum wa yamchu !
16 Kan leek inta,
arfaʼ asaatak foog wa midd iidak ale l‑bahar wa yinchagga bakaanteen.
Wa fi ust al‑bahar,
al‑turaab yabga yaabis wa Bani Israaʼiil yagtaʼo al‑bahar raaykhiin be rijleehum fi l‑turaab al‑yaabis da.
17 Wa fi l‑bakaan da,
ana nigawwi raas al‑Masriyiin achaan yadkhulu waraaku fi l‑bahar.
Wa khalaas,
ana niwassif gudurti al‑majiide be Firʼoon malik Masir wa deechah wa arabaatah hana l‑harib wa siyaad kheelah.
18 Wa wakit niwassifhum gudurti al‑majiide be malik Masir wa arabaatah wa siyaad kheelah,
khalaas al‑Masriyiin yaʼarfu kadar ana bas Allah. »
19 Wa malak Allah al‑awwal maachi giddaam fariig Bani Israaʼiil gabbal wa gaʼad waraahum.
Wa amuud al‑sahaab al‑awwal maachi giddaamhum kula gabbal wa gaʼad waraahum.
20 Wa amuud al‑sahaab wagaf been muʼaskar al‑Masriyiin wa fariig Bani Israaʼiil wa nussah al‑ale Bani Israaʼiil gaaʼid yidawwi wa nussah al‑ale l‑Masriyiin gaaʼid adlam.
Wa tuul al‑leele di,
ma fi waahid al‑garrab le l‑aakhar.
Bani Israaʼiil chaggo al‑bahar
21 Wa baʼad da,
Muusa madda iidah ale l‑bahar wa fi l‑bakaan da,
Allah nafakh riih chadiide jaaye min sabaah.
Wa fi tuul al‑leel,
al‑riih gaaʼide tusuug wa gassamat al‑almi bakaanteen lahaddi al‑turaab al‑yaabis baan.
22 Wa khalaas,
Bani Israaʼiil addo ust al‑bahar fi l‑turaab al‑yaabis wa l‑almi gaʼad jaay wa jaay leehum misil durdur be nussuhum al‑israay wa l‑zeenaay.
23 Al‑Masriyiin wa kheel al‑malik wa arabaatah hana l‑harib wa siyaadhum dakhalo wara Bani Israaʼiil ambeenaat al‑daraadir al‑itneen hana l‑almi.
24 Wa be fajur badri min al‑amuud hana l‑naar wa sahaab,
Allah chaaf deech al‑Masriyiin wa barjalaahum.
25 Wa hu tallaf rijle arabaathum wa ma yagdaro yamchu illa be taʼab.
Wa fi l‑bakaan da,
al‑Masriyiin gaalo :
« Yalla !
Najru min Bani Israaʼiil achaan Allah gaaʼid yihaarib leehum diddina ! »
26 Wakit Bani Israaʼiil gataʼo al‑bahar khalaas,
Allah gaal le Muusa :
« Midd iidak ale l‑bahar wa khalli al‑almi yilimm fi l‑Masriyiin wa fi arabaat al‑harib wa fi siyaad al‑kheel. »
27 Wa wakit al‑harraay talaʼat,
Muusa madda iidah ale l‑bahar wa l‑almi ansadda fi bakaanah misil awwal.
Wa wakit al‑Masriyiin muʼarridiin ale khachum al‑bahar,
Allah lazzaahum fi ust al‑almi.
28 Wa l‑almi gabbal fi bakaanah wa akal al‑arabaat wa siyaad al‑kheel wa kulla deech Firʼoon malik Masir al‑dakhalo wara Bani Israaʼiil fi l‑bahar.
Wa naadum waahid kula minhum ma faddal !
29 Wa kan le Bani Israaʼiil kamaan,
al‑bahar anchagga wa bigi misil durdur jaay wa jaay leehum wa humman gataʼo al‑bahar fi l‑turaab al‑yaabis.