Iid al‑Khubza bala Tawwaara
13
1 Wa Allah hajja le Muusa wa gaal :
2 « Khassis leyi kulla wald bikir al‑wildooh fi lubb Bani Israaʼiil wa fi l‑bahaayim.
Dool yabgo hineeyi ana. »
3 Wa Muusa gaal le l‑naas :
« Kulli sana,
zakkuru fi l‑yoom al‑maragtu beyah min Masir balad al‑ubuudiiye.
Achaan Allah maragaaku min Masir be gudurtah.
Ma taakulu khubza al‑indaha tawwaara fi l‑yoom da !
4 Da al‑yoom al‑intu maragtu beyah min Masir fi chahar al‑Ganaadiil.*
5 Allah halaf le juduudku wa gaal yantiiku balad al‑malaane be l‑laban wa l‑asal.
Wa di balad al‑Kanʼaaniyiin wa l‑Hittiyiin wa l‑Amuuriyiin wa l‑Hiwwiyiin wa l‑Yabuusiyiin.
Wa wakit Allah waddaaku hinaak,
fi kulli sana waajib tiʼayyudu fi nafs al‑chahar.
6 Wa fi muddit sabʼa yoom,
aakulu khubza bala tawwaara bas.
Wa fi l‑yoom al‑saabiʼ,
ayyudu le Allah.
7 Fi muddit sabʼa yoom,
intu taakulu khubza bala tawwaara.
Wa ma tikhallu khubza al‑indaha tawwaara wa la tawwaara tagood fi kulla baladku.
8 « Wa ayyi sana fi l‑iid da,
intu tifassuru le iyaalku maʼana al‑iid da wa tuguulu leehum :
‹ Niʼayyudu al‑iid da achaan nizzakkaro al‑cheyy al‑Allah sawwa leena wakit maragaana min Masir. ›
9 Wa l‑iid da yabga leeku zikra misil alaama al‑yarbutuuha al‑naas fi iideehum aw fi jabhaathum achaan ma yanso al‑cheyy al‑muhimm leehum.
Al‑iid da yizakkirku kadar waajib tiballukhu wasaaya Allah,
hu al‑maragaaku min Masir be iidah al‑chadiide.
10 Wa waajib titabbugu al‑gaanuun da fi l‑yoom al‑magtuuʼ leyah fi kulli sana. »
Ayyi wald bikir mukhassas le Allah
11 Wa Muusa gaal battaan :
« Allah yiwaddiiku fi balad al‑Kanʼaaniyiin misil hu halaf leeku wa le juduudku wa gaal yantiiha leeku.
12 Fi l‑wakit da,
khassusu leyah kulla awlaad al‑bikir.
Kulla awlaad al‑bikir al‑dukuur min al‑naas wa min al‑bahaayim yabgo khaassiin le Allah.
13 Wa ayyi wald bikir hana l‑hamiir,
chiilu fi badalah kharuuf.
Wa kan ma baddaltuuh kamaan,
aksuru ragabatah.
Wa laakin ayyi wald bikir min iyaalku intu al‑insaan,
afdooh.
14 « Wa akuun iyaalku yasʼalooku wa yuguulu leeku :
‹ Maala tisawwu al‑cheyy da ?
› Khalaas,
ruddu leehum wa guulu :
‹ Allah maragaana be gudurtah min Masir balad al‑ubuudiiye.
15 Wa l‑malik sawwa raas gawi wa aba ma khallaana namurgu min balad Masir.
Wa be da,
Allah katal kulla awlaad al‑bikir min al‑naas wa min al‑bahaayim fi balad Masir.
Wa fi chaan da,
nadbaho le Allah kulla awlaad al‑bikir al‑dukuur min bahaayimna.
Wa laakin awlaad al‑bikir hineena kamaan,
nafdoohum. ›
16 Wa da yabga leeku zikra misil alaama al‑yarbutuuha al‑naas fi iideehum aw fi jabhaathum achaan ma yanso al‑cheyy al‑muhimm leehum.
Wa misil da,
ma tanso kadar Allah maragaaku min Masir be gudurtah. »
Bani Israaʼiil addo jamb al‑bahar
17 Wakit Firʼoon malik Masir khalla Bani Israaʼiil marago,
al‑Rabb ma waddaahum be l‑derib al‑yuchugg balad al‑Filistiyiin hatta kan al‑derib da gariib kula.
Achaan hu irif kan humman yiwaajuhu harib,
yandamo le marigiinhum wa battaan yigabbulu fi Masir.
18 Wa l‑Rabb waddaahum ale l‑sahara be derib aakhar al‑yiʼaddi be l‑bahar al‑Ahmar.
Wa Bani Israaʼiil marago min Masir jaahiziin le l‑harib.
19 Wa Muusa chaal maʼaayah udaam Yuusuf* achaan zamaan wakit Yuusuf hayy,
hallafaahum le Bani Israaʼiil wa gaal leehum :
« Akiid al‑Rabb yifakkir leeku.
Wa wakit tamurgu min hini,
waddu udaami maʼaaku. »
20 Wa Bani Israaʼiil gammo macho min Sukkuut wa nazalo fi Itaam fi khachum al‑sahara.
21 Wa Allah maachi giddaamhum be l‑nahaar fi amuud hana sahaab le yuguudhum fi l‑derib wa be l‑leel fi amuud hana naar le yidawwi leehum.
Achaan be da,
yagdaro yuruukhu leel wa nahaar.
22 Wa amuud al‑sahaab al‑yuguudhum be l‑nahaar wa amuud al‑naar al‑yuguudhum be l‑leel ma kasso minhum abadan.