Gawaaniin iid al‑Fisha
12
1 Wa Allah gaal le Muusa wa Haaruun fi Masir :
2 « Min hassaʼ,
al‑chahar da yabga leeku chahar bidaayit al‑sana wa awwal chahar fi chuhuur al‑sana.
3 Amchu guulu le kulla mujtamaʼ Bani Israaʼiil kadar fi yoom 10 hana l‑chahar da,
ayyi naadum yichiil hamal waahid le aayiltah walla le beetah.
4 Wa kan naas al‑beet chiyya ma yagdaro yaakulu kulla l‑hamal da,
khalli yilimmu maʼa jiiraanhum al‑gariibiin wa yigassumuuh ale adadhum.
Wa ayyi naadum yaʼazil hamal al‑yitimm le naasah.
5 Wa waajib taʼazulu hamal aw sakhal wald sana al‑ma indah ayyi eeb.
6 « Wa tikhalluuh yagood lahaddi yoom 14 hana l‑chahar.
Wa kulla mujtamaʼ Bani Israaʼiil yadbaho humlaanhum be makhrib.
7 Wa khalli yichiilu min al‑damm da wa yamsahooh fi l‑iidaan al‑itneen hana l‑baab wa uudah al‑foogaani hana l‑beet al‑yaakulu foogah al‑hamal.
8 Wa yutuchchu al‑laham da wa be l‑leel,
yaakuluuh be khubza bala tawwaara wa be khadaar murr.
9 Wa ma taakulu al‑laham da neyy walla murakkab laakin tuchchuuh kaamil fi naar be raasah wa rijileenah wa butuunah.
10 Wa kadar le fajur da,
ma tikhallu minnah cheyy.
Wa kan cheyy faddal kamaan,
harruguuh.
11 « Wa daahu kikkeef taakulu al‑akil da.
Aakuluuh sulubku marbuut wa be niʼleeku fi rijleeku wa akurbu isayku fi iideeku wa aakuluuh ajala.
Wa da iid al‑Fisha* le Allah.
12 Wa fi l‑leele di,
ana nuchugg balad Masir wa naktul ayyi wald bikir hana l‑naas wa hana l‑bahaayim.
Wa be misil da,
niʼaakhib ilaahaat balad Masir achaan ana Allah.
13 Wa l‑damm da yabga leeku alaama al‑tahmiiku fi l‑buyuut al‑intu saakniin fooghum.
Wa kan ana chift al‑damm da,
nibaari buyuutku wa l‑waba hana l‑moot ma yalhagku wakit niʼaakhib al‑Masriyiin.
14 « Wa l‑yoom da,
yabga leeku yoom al‑tizzakkaro foogah.
Wa tiʼayyudu daayman al‑iid da le Allah wa da yabga leeku chart daayim min zurriiye le zurriiye. »
Akil al‑Khubza bala Tawwaara
15 Wa battaan Allah gaal :
« Fi muddit sabʼa yoom,
aakulu khubza bala tawwaara.
Min al‑yoom al‑awwal,
ma tikhallu fi buyuutku al‑tawwaara.
Wa min al‑yoom al‑awwal lahaddi l‑yoom al‑saabiʼ,
kan naadum akal khubza al‑indaha tawwaara,
waajib yafsuluuh min Bani Israaʼiil.
16 Wa fi l‑yoom al‑awwal wa l‑yoom al‑saabiʼ,
tilimmu malamma khaassa le taʼabuduuni.
Wa fi l‑ayyaam dool,
ma takhdumu illa tisawwu akil le nufuusku bas.
17 Wa tiʼayyudu iid al‑Khubza bala Tawwaara achaan fi l‑yoom da bas,
ana maragtuku min Masir hasab majmuuʼaatku.
Wa l‑iid da yabga leeku chart daayim min zurriiye le zurriiye.
18 Wa min yoom 14 hana l‑chahar al‑awwal lahaddi yoom 21,
taakulu khubza bala tawwaara be makhrib.
19 Fi muddit al‑sabʼa yoom dool,
tawwaara ma tagood fi buyuutku.
Wa ayyi naadum al‑akal khubza al‑indaha tawwaara da,
waajib yafsuluuh min mujtamaʼ Bani Israaʼiil,
kan ajnabi walla kan min Bani Israaʼiil kula.
20 Ma taakulu abadan khubza al‑indaha tawwaara fi l‑ayyaam dool.
Wa fi ayyi bakaan al‑saakniin foogah,
taakulu illa khubza bala tawwaara. »
Iid al‑Fisha
21 Wa baʼad da,
Muusa naada kulla chuyuukh Bani Israaʼiil wa gaal leehum :
« Ayyi waahid yichiil hamal le aayiltah wa yadbahah le iid al‑Fisha.
22 Wa chiilu rubta hana warchaal zuufa wa dissuuha fi damm al‑hamal al‑sabbeetuuh fi maaʼuun.
Wa amsaho beyah al‑iidaan al‑itneen hana l‑baab wa uudah al‑foogaani.
Wa naadum waahid kula minku ma yamrug min beetah lahaddi l‑fajur.
23 Wakit Allah yuchugg balad Masir le yadrub al‑Masriyiin,
kan hu yichiif al‑damm al‑masahtuuh fi l‑iidaan al‑itneen hana l‑baab wa uudah al‑foogaani,
hu yibaari buyuutku wa yadhar waba al‑moot ma yadkhul fi buyuutku wa yadrubku.
24 « Wa l‑cheyy da yabga leeku wa le zurriiyitku chart daayim.
25 Wa wakit tadkhulu fi l‑balad al‑Allah gaal yantiiku da,
titabbugu al‑gaanuun da.
26 Akuun iyaalku yasʼalooku wa yuguulu :
‹ Al‑iid da maʼanaatah chunu ? ›
27 Intu guulu leehum :
‹ Nadbaho dahiiyat iid al‑Fisha le Allah achaan Allah baara buyuutna aniina Bani Israaʼiil fi Masir.
Wakit hu darab al‑Masriyiin,
hu baara buyuutna wa najjaana.
› »
Wa fi l‑bakaan da,
kulla chaʼab Bani Israaʼiil dangaro wa sajado.
28 Wa Bani Israaʼiil macho wa sawwo kulla cheyy misil Allah amar beyah Muusa wa Haaruun.
Waba moot awlaad al‑bikir
29 Wa khalaas fi ust al‑leel,
Allah katal kulla awlaad al‑bikir al‑fi Masir min wald al‑bikir hana Firʼoon al‑gaaʼid fi kursi al‑muluk lahaddi awlaad al‑bikir hana l‑masaajiin wa awlaad al‑bikir hana l‑bahaayim.
30 Wa fi l‑leele di,
al‑malik wa kulla khaddaamiinah wa kulla l‑Masriyiin gammo min al‑noom wa bako baki chadiid achaan beet al‑ma indah moot ke ma fiih.
31 Wa l‑malik naada Muusa wa Haaruun fi ust al‑leel wa gaal leehum :
« Yalla gummu !
Amurgu min baladi,
intu wa chaʼab Bani Israaʼiil.
Amchu aʼabudu Allah misil intu talabtuuh minni.
32 Wa chiilu khanamku wa bagarku misil gultuuh.
Amchu wa asʼalo Ilaahku yibaarikni ana kula ! »
33 Wa l‑Masriyiin yahsubu humman kulluhum yumuutu.
Khalaas,
gammo yaʼasuru Bani Israaʼiil achaan yamurgu ajala min baladhum.
Al‑khuruuj min Masir
34 Wa chaʼab Bani Israaʼiil chaalo ajiin al‑khubza al‑lissaaʼ ma indah tawwaara wa khattooh fi taasaat wa rabatooh fi khulgaanhum wa khattooh fi kataafeehum.
35 Wa Bani Israaʼiil saʼalo al‑Masriyiin achya hana fudda wa dahab wa khulgaan misil Muusa gaalah.
36 Wa Allah sawwa Bani Israaʼiil ligo rida al‑Masriyiin.
Wa antoohum kulla cheyy al‑saʼaloohum wa be misil da,
Bani Israaʼiil kasabo maal al‑Masriyiin.
37 Wa baʼad da,
Bani Israaʼiil gammo min madiinat Raʼamsiis wa macho ale Sukkuut.
Wa adadhum 600 000 rujaal maachiin be rijleehum wa da bala adad al‑awiinhum wa l‑iyaalhum.
38 Wa chaalo bagar wa khanam katiiriin marra waahid.
Wa macho maʼaahum naas katiiriin min gabaayil aakhariin.
39 Wa Bani Israaʼiil sallalo khubza bala tawwaara be l‑ajiin al‑chaalooh min Masir al‑lissaaʼ ma indah tawwaara.
Wa da achaan al‑Masriyiin taradoohum min Masir wa ma ligo wakit achaan yijahhuzu le nufuushum zaad.
40 Wa Bani Israaʼiil aacho muddit 430 sana fi Masir.
41 Wa baʼad 430 sana fi l‑yoom al‑muhaddad,
kulla chaʼab Allah marago min balad Masir hasab majmuuʼaathum.
42 Wa fi l‑leele di,
Allah raakhab tuul al‑leel fi chaan chaʼabah le yamrughum min Masir.
Wa fi chaan da,
waajib Bani Israaʼiil yisaahuru le Allah fi l‑leele di min zurriiye le zurriiye.
Allah zaad gawaaniin hana iid al‑Fisha
43 Wa Allah gaal le Muusa wa Haaruun :
« Daahu gawaaniin hana iid al‑Fisha.
Ayyi naadum al‑ma min Bani Israaʼiil ma yaakul maʼaaku akil al‑iid.
44 Wa l‑abid al‑chareetuuh ma yaakul maʼaaku illa kan tahhartuuh.
45 Wa ayyi deef walla ajnabi al‑yakhdim leeku be gurus ma yaakul maʼaaku.
46 Wa l‑hamal da aakuluuh daakhal fi lubb al‑beet wa ma tamurgu lahamah barra min al‑beet.
Wa ma taksuru waahid min udaamah.
47 Wa kulla mujtamaʼ Bani Israaʼiil yiʼayyid al‑iid da.
48 Wa kan naadum ajnabi gaaʼid maʼaaku wa yidoor yiʼayyid al‑iid le Allah,
waajib titahhuruuh.
Wa hu yitahhir kulla l‑dukuur al‑gaaʼidiin fi beetah.
Wa misil da,
yagdar yiʼayyid al‑iid misil waahid min Bani Israaʼiil.
Laakin ayyi raajil al‑ma mutahhar ma yaakul akil al‑iid da.
49 Wa da nafs al‑gaanuun le naadum al‑min Bani Israaʼiil wa le l‑ajnabi al‑saakin maʼaaku. »