فِلِبِّي 2

المسْكنة هنا المُؤمِنين

١ هَلْ لِقِيتُوا شَجَاعَةْ بِعَلَاقِتْكُو مَعَ الْمَسِيحْ وَلَّا؟ وَ مَحَبِّتَهْ رَقَّدَتْ قُلُوبْكُو وَلَّا؟ وَ شَارَكْتُوا سَوَا فِي قُدْرَةْ الرُّوحْ الْقُدُّوسْ وَلَّا؟ وَ لِقِيتُوا مِنْ الْمَسِيحْ مَحَنَّةْ كَتِيرَةْ وَلَّا؟ ٢ خَلَاصْ، زِيدُوا فَرْحِتِي وَ خَلِّي فِكِرْكُو يَبْقَى وَاحِدْ. أَرَّايَدَوْا أَمْبَيْنَاتْكُو بِمَحَبَّةْ وَاحِدَةْ. وَ أَسْتَفُقُوا أَمْبَيْنَاتْكُو مَرَّةْ وَاحِدْ بِهَدَفْ وَاحِدْ. ٣ وَ مَا تِسَوُّوا شَيّءْ مِنْ الْحُسُدْ وَ الْإِسْتِكْبَارْ. خَلِّي أَيِّ وَاحِدْ يِمَسْكِنْ نَفْسَهْ وَ يِشِيفْ أَخْوَانَهْ أَخَيْر مِنْ نَفْسَهْ. ٤ خَلِّي أَيِّ وَاحِدْ مَا يِفَكِّرْ فِي الشَّيّءْ الْيِجِيبْ فَايْدَةْ لَيَّهْ هُو وِحَيْدَهْ بَسْ، لَاكِنْ خَلِّي يُخُطّ بَالَهْ فِي الشَّيّءْ الْيِجِيبْ فَايْدَةْ لِلْآخَرِينْ.

المسْكنة و عظمة المسيح

٥ الْفِكِرْ الْإِنْتُو وَاجِبْ تِتَابُعُوهْ، هُو نَفْس الْفِكِرْ الْعِيسَى الْمَسِيحْ تَابَعَهْ.

٦ مِنْ أَوَّلْ هُو عِنْدَهْ طَبِيعَةْ اللّٰهْ

لَاكِنْ مَا دَوَّرْ يَمْسُكْ لِنَفْسَهْ

قُدُرْتَهْ الرَّبَّانِيَّةْ.

٧ بِالْعَكْس، هُو خَلَّى مِنَّهْ كُلَّ شَيّءْ

وَ سَوَّى نَفْسَهْ مِثِلْ عَبِدْ

وَ قَصَّدْ يَلْدَوْه وَ يَبْقَى إِنْسَانْ.

٨ وَ وَكِتْ بِقِي نَادُمْ،

هُو مَسْكَنْ نَفْسَهْ

وَ بِقِي طَايِعْ لَحَدِّي الْمَوْت

وَ قَصَّدْ يُمُوتْ مَوْت شَيْن فِي الصَّلِيبْ.

٩ أَشَانْ دَا، اللّٰهْ رَفَعَهْ فَوْق مَرَّةْ وَاحِدْ

وَ أَنْطَاهْ أُسُمْ عَالِي مِنْ كُلَّ الْأَسَامَيْ

١٠ لَحَدِّي أَيِّ وَاحِدْ يِشَرِّفْ أُسُمْ عِيسَى

فِي السَّمَاءْ وَ فِي الْأَرْض وَ تِحِتْ الْأَرْض

وَ يَرْكَعْ قِدَّامَهْ.

١١ وَ لَحَدِّي أَيِّ وَاحِدْ يَشْهَدْ وَ يُقُولْ

كَدَرْ عِيسَى الْمَسِيحْ هُو الرَّبّ

وَ يِمَجِّدْ اللّٰهْ أَبُوهْ.

أبْقوا نور في أُسْط الناس

١٢ فِي شَانْ كُلَّ الْكَلَامْ دَا، يَا أَخْوَانِي النِّحِبُّكُو، أَسْمَعَوْا كَلَامِي. وَكِتْ أَنَا مَعَاكُو، إِنْتُو دَايْماً تِتَابُعُوا كَلَامْ اللّٰهْ. وَ هَسَّعْ وَكِتْ أَنَا مَا مَعَاكُو، وَاجِبْ تِتَابُعُوهْ بِزِيَادَةْ. جَاهُدُوا بِخَوْف وَ رَجِفِينْ لِتِسَوُّوا كُلَّ شَيّءْ الْوَاجِبْ لِلنَّاسْ الْاللّٰهْ نَجَّاهُمْ. ١٣ أَشَانْ اللّٰهْ هُو الْقَاعِدْ يِسَوِّي عَمَلَهْ فَوْقكُو وَ هُو يَنْطِيكُو النِّيَّةْ وَ الْقُدْرَةْ لِتِسَوُّوا الشَّيّءْ الْعَدِيلْ الْيَرْضَى بَيَّهْ.

١٤ فِي كُلَّ شَيّءْ مَا تَشْكُوا وَ لَا تِهَارُجُوا أَمْبَيْنَاتْكُو. ١٥ أَشَانْ تَبْقَوْا نَاسْ بَلَا خَطَا وَ بَرِيِّينْ وَ تِعِيشُوا مِثِلْ عِيَالْ اللّٰهْ بَلَا عَيْب فِي أُسُطْ النَّاسْ الْفَسْلِينْ وَ عُوُجْ هَنَا الدُّنْيَا دِي. وَ تَبْقَوْا فِي أُسُطْهُمْ نُورْ مِثِلْ النُّجُومْ فِي الْعَالَمْ الْأَضْلَمْ ١٦ أَشَانْ إِنْتُو مُنْكَرِبِينْ فِي كَلَامْ الْحَيَاةْ. وَ كَنْ تَبْقَوْا مِثِلْ دَا، نَقْدَرْ نَرْفَعْ رَاسِي فَوْق فِي يَوْم جَيَّةْ الْمَسِيحْ. وَ نَعَرِفْ تَعَبِي وَ خِدِمْتِي الْخَدَمْتَهَا لَيَّهْ مَا فَشَلَتْ. ١٧ وَ حَتَّى كَانْ دَمِّي وَاجِبْ يِدَفِّقْ مِثِلْ هَدِيَّةْ شَرَابْ فِي الضَّحِيَّةْ التِّقَدُّمُوهَا لِلّٰهْ فِي شَانْ إِيمَانْكُو وَ خِدْمِتْكُو، خَلَاصْ أَنَا نَفْرَحْ وَ نِنْبَسِطْ مَعَاكُو كُلُّكُو. ١٨ وَ وَاجِبْ إِنْتُو كُلَ تَبْقَوْا فَرْحَانِينْ وَ تَفْرَحَوْا مَعَايِ.

حال تِمُوتَاوُس

١٩ وَ بَعَدْ شِيَّةْ، نِتْمَنَّى نِرَسِّلْ لَيْكُو تِمُوتَاوُسْ كَنْ دَا الْيِدَوْرَهْ رَبِّنَا عِيسَى. نِدَوْر نِرَسِّلَهْ أَشَانْ هُو يِشَجِّعْنِي وَكِتْ يِقَبِّلْ يِجِيبْ لَيِّ خَبَرْكُو. ٢٠ مَا فِي نَادُمْ آخَرْ الْيِهِمّ بَيْكُو مِثْلِي أَنَا، إِلَّا هُو بَسْ. يِهِمّ بَيْكُو بِنِيَّةْ مُخْلِصَةْ. ٢١ كُلَّ الْآخَرِينْ يُخُطُّوا بَالْهُمْ فِي الشَّيّءْ الْيِجِيبْ فَايْدَةْ لَيْهُمْ هُمَّنْ وَ مَا فِي الشَّيّءْ الْيِجِيبْ فَايْدَةْ لِعِيسَى الْمَسِيحْ. ٢٢ لَاكِنْ أَكِيدْ إِنْتُو تَعَرْفُوا كِكَّيْف تِمُوتَاوُسْ وَصَّفْ ثَبَاتَهْ. مِنْ وَكِتْ طَوِيلْ، هُو قَاعِدْ يَخْدِمْ مَعَايِ فِي بَلِّغِينْ بِشَارَةْ الْمَسِيحْ مِثِلْ وِلَيْد الْيَخْدِمْ مَعَ أَبُوهْ. ٢٣ أَشَانْ دَا وَكِتْ نَعَرِفْ شُنُو يَبْقَى لَيِّ هِنِي، نِتْمَنَّى نِرَسِّلَهْ لَيْكُو طَوَّالِي. ٢٤ وَ عِنْدِي عَشَمْ فَوْق رَبِّنَا كَدَرْ بَعَدْ وَكِتْ شِيَّةْ بَسْ، أَنَا ذَاتِي نَمْشِي لَيْكُو.

حال أَبْفَرِيد

٢٥ وَ فِي فِكْرِي أَنَا، وَاجِبْ لَيِّ نِرَسِّلْ لَيْكُو أَخُويِ أَبْفَرِيدْ الْقَاعِدْ يَخْدِمْ مَعَايِ وَ نِجَاهُدُوا سَوَا. صَحِيحْ، إِنْتُو بَسْ رَسَّلْتُوهْ لَيِّ أَشَانْ فِي تَعَبِي هُو يِسَاعِدْنِي. ٢٦ لَاكِنْ هُو قَاعِدْ يَقْرَمْ لَيْكُو كُلُّكُو وَ بِقِي لَيَّهْ قَاسِي أَشَانْ إِنْتُو سِمِعْتُوا خَبَرْ هَنَا مَرَضَهْ. ٢٧ وَ بِالصَّحِيحْ، أَوَّلْ هُو مَرْضَانْ بِلْحَيْن وَ قَرِيبْ يُمُوتْ. لَاكِنْ اللّٰهْ حَنَّ فَوْقَهْ وَ مَا فَوْقَهْ هُو وِحَيْدَهْ بَسْ، لَاكِنْ فَوْقِي أَنَا كُلَ أَشَانْ مَا يِزِيدْ لِحِزْنِي حِزِنْ آخَرْ بَتَّانْ.

٢٨ وَ شِلْت نِيَّةْ نِرَسِّلَهْ لَيْكُو عَجَلَةْ أَشَانْ بِجَيْتَهْ، إِنْتُو تَفْرَحَوْا بَتَّانْ وَ أَنَا كَمَانْ قَلْبِي يَرْقُدْ. ٢٩ وَ خَلَاصْ، أَكُرْبُوهْ بِأُسُمْ الرَّبّ بِفَرْحَةْ كَبِيرَةْ. وَ نُقُولْ لَيْكُو وَاجِبْ تِكَرُّمُوا بِزِيَادَةْ أَيِّ نَادُمْ مِثْلَهْ هُو. ٣٠ أَوَّلْ هُو قَرِيبْ يُمُوتْ فِي شَانْ خِدِمْتَهْ لِلْمَسِيحْ وَ دَسَّ نَفْسَهْ فِي خُطُورَةْ شَدِيدَةْ أَشَانْ يِجِيبْ لَيِّ مُسَاعَدَةْ الْإِنْتُو مَا تَقْدَرَوْا تِجِيبُوهَا لَيِّ.