فِلِبِّي 3

الطهورة الصحيحة

١ وَ خَلَاصْ، يَا أَخْوَانِي، أَفْرَحَوْا بِرَبِّنَا عِيسَى. مَا قَاسِي لَيِّ نَكْتِبْ لَيْكُو نَفْس الشَّيّءْ الْأَوَّلْ أَوْرَيْتكُو بَيَّهْ وَ نِكَرِّرَهْ بَتَّانْ أَشَانْ دَا يَبْقَى لَيْكُو أَكِيدْ. ٢ أَوْعُوا بَالْكُو مِنْ الْكُلابْ! هُمَّنْ الْيِسَوُّوا الشَّرّ. يَفْرَحَوْا بِقَطِعِينْ مِنْ الْجِسِمْ وَ نُقُولْ لَيْكُو بَتَّانْ أَوْعُوا بَالْكُو مِنْهُمْ! ٣ يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

٤ وَ حَسَبْ كَلَامْهُمْ، أَنَا عِنْدِي حَقّ نِنْتَكِلْ عَلَيْ جِلْدِي. أَيِّ نَادُمْ الْيُقُولْ هُو عِنْدَهْ حَقّ يِنْتَكِلْ عَلَيْ جِلْدَهْ، أَنَا عِنْدِي حَقّ زِيَادَةْ مِنَّهْ. ٥ أَنَا طَهَّرَوْنِي فِي الْيَوْم التَّامِنْ مِنْ يَوْم وِلْدَوْنِي. وَ أَنَا مِنْ ذُرِّيَّةْ بَنِي إِسْرَائِيلْ وَ مِنْ قَبِيلَةْ بَنْيَامِينْ. أَنَا عِبْرَانِي مِيَةْ فِي الْمِيَةْ. وَ فِي الشَّيّءْ الْبُخُصّ طَبِّقِينْ شُرُوطْ التَّوْرَاةْ، أَنَا مِنْ طَرِيقَةْ الْفَرِيزِيَّةْ. ٦ وَ أَنَا بِقِيتْ مُنْكَرِبْ بِلْحَيْن فِي دِينِي الْيَهُودِي لَحَدِّي حَاوَلْت نِدَمِّرْ أُمَّةْ الْمَسِيحْ. وَ حَسَبْ كَلَامْهُمْ فِي شُرُوطْ التَّوْرَاةْ، أَنَا بِقِيتْ نَادُمْ صَالِحْ وَ مَا عِنْدِي عَيْب.

المسيح أخَيْر من كل شيّء

٧ لَاكِنْ كُلَّ شَيّءْ الْأَوَّلْ جَعَلْتَهْ هُو عِنْدَهْ فَايْدَةْ دَا، أَنَا خَلَّيْتَهْ مِنِّي وَ جَعَلْتَهْ مِثِلْ شَيّءْ سَاكِتْ فِي شَانْ الْمَسِيحْ. ٨ أَيْوَى وَ زِيَادَةْ مِنْ دَا، عِرْفَةْ الْمَسِيحْ عِيسَى رَبِّي بِقَتْ لَيِّ أَخَيْر مِنْ كُلَّ شَيّءْ وَ نَجْعَلْ كُلَّ شَيّءْ آخَرْ سَاكِتْ. فِي شَانْ الْمَسِيحْ، أَنَا خَلَّيْت كُلَّ شَيّءْ الْعِنْدِي. وَ كُلَّ شَيّءْ الْأَوَّلْ عِنْدَهْ لَيِّ فَايْدَةْ، جَعَلْتَهْ مِثِلْ وَسَخْ أَشَانْ نَلْقَى الْفَايْدَةْ الْكَبِيرَةْ وَ هِي الْعَلَاقَةْ مَعَ الْمَسِيحْ. ٩ وَ نِدَوْر عَلَاقْتِي مَعَايَهْ تَبْقَى كَامِلَةْ. وَ بِمِثِلْ دَا، مَا نَجْعَلْ نَفْسِي صَالِحْ بِطَبِّقِينْ شُرُوطْ التَّوْرَاةْ لَاكِنْ نَبْقَى صَالِحْ بِإِيمَانِي بِالْمَسِيحْ أَشَانْ الدَّرِبْ الْاللّٰهْ يِسَوِّي بَيَّهْ النَّاسْ صَالِحِينْ، هُو دَرِبْ الْإِيمَانْ. ١٠ وَ نِجَاهِدْ أَشَانْ نَعَرِفْ الْمَسِيحْ تَمَامْ وَ نِعِيشْ بِقُدْرَةْ بُعَاثَهْ وَ نِشَارِكْ مَعَايَهْ فِي تَعَبَهْ. وَ نِدَوْر نَبْقَى مِثِلْ هُو بِقِي فِي مَوْتَهْ ١١ وَ خَلَاصْ بِأَيِّ دَلِيلْ، نَلْحَقْ فِي الأَخِيرْ بُعَاثْ الْمَيْتِينْ. ١٢ وَ مَا نُقُولْ تَمَّيْت مَقْصُودِي خَلَاصْ وَ بِقِيتْ نَادُمْ تَمَامْ. لَاكِنْ أَنَا نِجَاهِدْ لِنَمُلْكَهْ أَشَانْ الْمَسِيحْ عِيسَى مَلَّكَانِي لِنَمْلُكْ الْمَقْصُودْ دَا.

مَثَل بُولُس

١٣ يَا أَخْوَانِي، أَبَداً مَا نُخُطّ فِي فِكْرِي كَدَرْ أَنَا مَلَكْت الْمَقْصُودْ خَلَاصْ. لَاكِنْ نِسَوِّي شَيّءْ وَاحِدْ بَسْ، نَنْسَى الْوَرَاءْ وَ نِفَكِّرْ فِي الْقِدَّامْ. ١٤ وَ نِجَاهِدْ أَشَانْ نِتَمِّمْ الْمَقْصُودْ وَ نَلْقَى الْجَائِزَةْ وَ هِي الْبَرَكَةْ الْاللّٰهْ يِدَوْر يَنْطِيهَا لِلنَّاسْ النَّادَاهُمْ فِي مَجْدَهْ بِالْمَسِيحْ عِيسَى. ١٥ وَ خَلَاصْ، خَلِّي كُلِّنَا الْبِقِينَا قَوِيِّينْ فِي الْإِيمَانْ نِتَابُعُوا نَفْس الْفِكِرْ. وَ كَنْ فِكِرْكُو شِقْ مِنْ الْفِكِرْ دَا، خَلِّي دَا كُلَ اللّٰهْ يِوَصِّفَهْ لَيْكُو. ١٦ خَلِّي أَيِّ وَاحِدْ يِعِيشْ حَسَبْ مَعْرَفَةْ الْمَسِيحْ اللِّقِيهَا وَ يَمْشِي قِدَّامْ.

١٧ يَا أَخْوَانِي، خَلِّي كُلُّكُو تِتَابُعُوا مَثَلِي وَ شِيفُوا عَدِيلْ النَّاسْ الْعَايْشِينْ مِثِلْنَا وَ فَكُّرُوا فِي حَالْهُمْ. ١٨ وَ قُلْت الْكَلَامْ دَا أَشَانْ فِي نَاسْ كَتِيرِينْ يِسَوُّوا نُفُوسْهُمْ عَدُو لِصَلِيبْ الْمَسِيحْ مِثِلْ أَوْرَيْتكُو بَيَّهْ عِدَّةْ مَرَّاتْ. وَ بَتَّانْ نِأَوْرِيكُو بَيَّهْ بِحِزِنْ شَدِيدْ وَ دُمُوعْ. ١٩ وَ فِي الأَخِيرْ، هُمَّنْ يَمْشُوا فِي الْهَلَاكْ. بُطُونْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيّءْ الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فِي خُمَامْ الدُّنْيَا بَسْ. ٢٠ لَاكِنْ جِنْسِيِّتْنَا أَنِحْنَ، هِي الْجِنْسِيَّةْ السَّمَاوِيَّةْ. وَ أَنِحْنَ نَرْجَوْا مُنَجِّينَا الْيَجِي مِنْ السَّمَاءْ وَ خَاطِّينْ بَالْنَا فِي جَيْتَهْ وَ هُو رَبِّنَا عِيسَى الْمَسِيحْ. ٢١ وَ بِقُدُرْتَهْ الْعَظِيمَةْ الْيُخُطّ بَيْهَا كُلَّ شَيّءْ تِحِتْ حُكْمَهْ، هُو يَجِي يِغَيِّرْ جِسِمْنَا الضَّعِيفْ وَ يَجْعَلَهْ مِثِلْ جِسْمَهْ هُو الْمَجِيدْ.