جواب لكُلُوسِي
من جوابات الرسول بولس
مقدمة
الحمْدُ للّٰه، اللّه بس سيد النجاة و القُدْرة و النور و البركة. و هو رسّل إبْنه عِيسَى المسيح أشان ينجّي الناس و يودّيهم في ممْلكته المجيدة.
و الجواب دا، الرسول بُولُس كتبه للمُؤمِنين الفي حِلّة كُلُوسِي. الحِلّة دي قاعدة في تُراب هنا أفَسُس لاكن الرسول بُولُس أبداً ما مشى ليها. النادم البلّغ فَوْقها البِشارة أُسْمه أَبْفُرَاس. هو سِمِع كلام اللّه من خشُم بُولُس و بِقي تِلْميذه. و بلّغ البِشارة في حِلّة كُلُوسِي و في الحِلّال القاعدين قريب ليها الأساميهم لَاوْدِكِيَّة و هِرَابُلُس. و زمان، الناس دَوْل ما عِرْفوا شيّء في كلام اللّه.
و في الحِلّال دَوْل، ناس واحِدين دوّروا يخلْبُطوا كلام المسيح مع كلام فلْسفتهم. و همن قاعدين يلِمّوا في فلْسفتهم دي كلام أصْنامهم و عادات اليَهُود و كلام هنا الرُؤية القالوا شافوها. يقولوا الناس واجِب يعبُدوا قوّات السماء مِثِل الملائِكة و الجُنون. و الناس دَوْل يقولوا المسيح هو واحِد من الجماعة دَوْل. و تعْليم الناس دَوْل قاعد يبرْجِل المُؤمِنين. و أشان دا، أَبْفُرَاس سافر و مشى لبُولُس في السِجِن بخبر هنا كُلُوسِي. و في البكان دا، الرسول كتب ليهم الجواب دا بقُدْرة الروح القُدّوس و ذكّراهم كدر المسيح أكْبر من أيِّ شيّء الاللّه خلقه و بركة اللّه كُلّها كَي تِنْلقي في المسيح. و ذكّراهم بتان بالحال الواجْبة للناس الدخلوا في مملكة النور.
خلّي أيِّ نادم اليقْري الجواب دا يلْقى البركة الكامِلة الجات بالمسيح. آمين.