جواب لفِلِبِّي
من جوابات الرسول بولس
مقدمة
كلام اللّه يوصِّفنا كدر في الدُنْيا دي، المُؤمِنين دايْماً يلْقوا تعب. و الجواب دا، الرسول بُولُس كتبه وكت هو مكْروب في السِجِن. و كتبه لتلاميذه القاعدين يتْعبوا في حِلّة فِلِبِّي. لاكن ما عِنْده شكْوة و لا زعل. هو شجّعاهم و قال خلّي يفْرحوا مِثِل هو كل فرْحان.
و حِلّة فِلِبِّي قاعدة في بلد مَقِدُونِيَة و اللّه رسّل ليها الرسول بُولُس مع جماعْته سِيلَا و لُوقا و تِمُوتَاوُس. و الرسول بُولُس بلّغ فَوْقها البِشارة و ناس واحِدين آمنوا و بِقوا مسيحيّين. لاكن في الوكت داك، تُجّار واحِدين خالفوا بُولُس و حرّشوا كُبارات الحِلّة أشان يتعُّبوه تعب شديد. و كل الكلام دا مكتوب في كتاب أعمال الرُسُل فصُل 16.
المُؤمِنين الفي حِلّة فِلِبِّي دَوْل، الرسول بُولُس يعرِفهم تمام. و همن رسّلوا ليه واحِد من أخْوانهم أُسْمه أَبْفَرِيد أشان يودّي ليه خبرهم و يساعِده في السِجِن. و بَيْدا، بُولُس سِمِع كدر كُبارات الحِلّة قاعدين يتعُّبوا المُؤمِنين بتان. و هو كل سِمِع خبر هنا مُخاصمة أمبين واحِدين من المُؤمِنين. و أشان دا، هو كتب ليهم الجواب دا بقُدْرة الروح القُدّوس و رسّله بإيد أَبْفَرِيد. و في الجواب دا، هو أوْراهم كدر اللّه يساعِدهم في التعب و واجِب يصْبُروا و يفْرحوا بربُّهم المسيح. و علّماهم كدر أيِّ مُؤمِن واجِب يتابِع مَثَل هنا عِيسَى المسيح و يبْقى ضلول لأخْوانه و ما يسوّي نفْسه عَالِي. و أوْراهم ككيف يعيشوا بمحبّة و فرح و سلام.
النادم اليقْري الجواب دا، خلّي يعرِف سلام اللّه الفايِت كل شيّء. آمين.