أفَسُس 6

وصايا للعيال و والْدَيْنهم

١ أَسْمَعَوْا، يَا الْعِيَالْ، الرَّبّ يِدَوْر إِنْتُو تَسْمَعَوْا كَلَامْ وَالْدَيْنكُو. دَا بَسْ الْوَاجِبْ تِسَوُّوهْ. ٢ مَكْتُوبْ فِي الْكِتَابْ: ﴿كَرِّمْ أَمَّكْ وَ أَبُوكْ.﴾ وَ مِنْ الْوَصَايَا، دِي بَسْ الْوَصِيَّةْ الْأَوَّلْ الْعِنْدَهَا وَعَدْ. ٣ وَ الْوَعَدْ هُو: ﴿أَشَانْ تَلْقَى الْخَيْر وَ عُمْرَكْ يَبْقَى طَوِيلْ فِي الْأَرْض.﴾

٤ أَسْمَعَوْا، يَا أَبَّهَاتْ الْعِيَالْ، مَا تِزَعُّلُوا عِيَالْكُو لَاكِنْ رَبُّوهُمْ فِي الْأَدَبْ وَ تَعْلِيمْ الرَّبّ.

وصايا للعبيد و سيادهم

٥ أَسْمَعَوْا، يَا الْعَبِيدْ، تَابُعُوا كَلَامْ النَّاسْ الْفِي الدُّنْيَا دِي هُمَّنْ سِيَادْكُو. أَيْوَى، كَرُّمُوهُمْ وَ أَخَافَوْا مِنْهُمْ. أَخْدُمُوا لَيْهُمْ بِنِيَّةْ وَاحِدَةْ مِثِلْ إِنْتُو قَاعِدِينْ تَخْدُمُوا لِلْمَسِيحْ. ٦ أَخْدُمُوا لَيْهُمْ مَا فِي شَانْ هُمَّنْ قَاعِدِينْ يِشِيفُوكُو بَسْ. مَا تُخُطُّوا بَالْكُو فِي شُكُرْ النَّاسْ. لَاكِنْ خُطُّوا فِي فِكِرْكُو إِنْتُو عَبِيدْ لِلْمَسِيحْ وَ سَوُّوا الْيِدَوْرَهْ اللّٰهْ بِنِيَّةْ مُخْلِصَةْ. ٧ أَخْدُمُوا لَيْهُمْ بِفَرَحْ مِثِلْ خِدْمِتْكُو هِي لِرَبِّنَا وَ مَا لِلنَّاسْ بَسْ. ٨ خَلِّي تَعَرْفُوا كَدَرْ أَيِّ نَادُمْ مِنِّنَا يَلْقَى أَجُرْ مِنْ الرَّبّ عَلَيْ حَسَبْ الْخَيْر الْهُو سَوَّاهْ، كَنْ هُو عَبِدْ وَلَّا حُرّ.

٩ أَسْمَعَوْا، يَا سِيَادْ الْعَبِيدْ، طَبُّقُوا نَفْس التَّعْلِيمْ. وَ مَا تِهَدُّدُوا عَبِيدْكُو. مَا تَنْسَوْا كَدَرْ إِنْتُو وَ عَبِيدْكُو كُلُّكُو عَبِيدْ هَنَا سِيدْ وَاحِدْ. وَ هُو الْقَاعِدْ فِي السَّمَاوَاتْ وَ مَا يِشِيفْ نَادُمْ أَخَيْر مِنْ نَادُمْ.

سِلاح اللّه الكامِل

١٠ وَ آخِرْ شَيّءْ، أَبْقَوْا قَوِيِّينْ فِي عَلَاقِتْكُو مَعَ الرَّبّ وَ بِقُدُرْتَهْ الْعَظِيمَةْ. ١١ أَلْبَسَوْا سِلَاحْ اللّٰهْ الْكَامِلْ أَشَانْ تَقْعُدُوا بَيَّهْ ثَابْتِينْ وَ نَجَاضَةْ إِبْلِيسْ مَا تِنَّصِرْ فَوْقكُو. ١٢ أَنِحْنَ مَا نِحَارُبُوا عَدُو مِنْ النَّاسْ. لَاكِنْ فِي الزَّمَنْ الْحَاضِرْ دَا، الدُّنْيَا قَاعِدَةْ فِي الضَّلَامْ وَ فِيَّهْ شَوَاطِينْ الْقَاعِدِينْ يَمُلْكُوهَا. وَ أَنِحْنَ قَاعِدِينْ نِحَارُبُوا حُكَّامْ وَ كُبَارَاتْ الشَّوَاطِينْ دَوْل، الْهُمَّنْ عَسْكَرْ إِبْلِيسْ الْقَاعِدِينْ فِي السَّمَاوَاتْ.

١٣ أَشَانْ دَا بَسْ، أَلْبَسَوْا سِلَاحْ اللّٰهْ الْكَامِلْ أَشَانْ تَقْعُدُوا ثَابْتِينْ وَكِتْ إِبْلِيسْ يَهْجِمْكُو. وَ بَعَدْ كُلَّ الدُّوَاسْ يِكَمِّلْ، تَقْعُدُوا ثَابْتِينْ بَتَّانْ. ١٤ أَشَانْ دَا، أَقْعُدُوا ثَابْتِينْ، صُلُبْكُو مَرْبُوطْ بِالْحَقّ. خَلِّي الْحَالْ الصَّالْحَةْ تَبْقَى لَيْكُو دِرِعْ قَوِي فِي صَدُرْكُو. ١٥ أَبْقَوْا دَايْماً شَجِيعِينْ لِتِبَلُّغُوا بِشَارَةْ السَّلَامْ وَ دَا يَبْقَى لَيْكُو مِثِلْ نِعْلَيْ عَدِيلِينْ فِي رِجْلَيْكُو. ١٦ وَ زِيدُوا عَلَيْ السِّلَاحْ دَا الْإِيمَانْ وَ خَلِّي يَبْقَى لَيْكُو دَرَقَةْ. إِبْلِيسْ الشَّرِيرْ يِدَوْر يِزَرِّقْكُو بِنَشَاشِيبَهْ الْعِنْدُهُمْ فِي رَاسْهُمْ نَارْ وَ بِالْإِيمَانْ تَكْتُلُوا النِّيرَانْ دَوْل. ١٧ وَ خَلِّي النَّجَاةْ تَبْقَى لَيْكُو طَاقِيَّةْ هِنْت حَرِبْ. وَ أَكُرْبُوا قَوِي كَلَامْ اللّٰهْ الْهُو مِثِلْ سَيْف هَنَا الرُّوحْ الْقُدُّوسْ.

١٨ وَ خَلُّوا الرُّوحْ الْقُدُّوسْ يُقُودْكُو فِي صَلَاوَاتْكُو وَ أَسْأَلَوْا اللّٰهْ فِي كُلَّ وَكِتْ بِكُلَّ أَنْوَاعْ هَنَا دُعَا وَ طَلَبْ. وَ مِثِلْ دَا، أَقْعُدُوا وَاعِيِّينْ وَ أَنْكَرْبُوا فِي صَلَاوَاتْكُو وَ أَسْأَلَوْا اللّٰهْ لِكُلَّ الصَّالِحِينْ.

١٩ وَ أَسْأَلَوْا اللّٰهْ لَيِّ أَنَا ذَاتِي أَشَانْ فِي أَيِّ وَكِتْ النِّدَوْر نِحَجِّي بِكَلَامْ اللّٰهْ، خَلِّي هُو يَنْطِينِي الْكَلَامْ الْوَاجِبْ لَيِّ. نِدَوْر نِحَجِّي بَلَا خَوْف وَ نِفَسِّرْ لِلنَّاسْ سِرّ اللّٰهْ الْبَيَّنَهْ فِي بِشَارَةْ الْمَسِيحْ. ٢٠ وَ فِي شَانْ الْبِشَارَةْ، أَنَا بِقِيتْ سَفِيرْ وَ بِسَبَبْهَا كَرَبَوْنِي فِي السِّجِنْ. خَلِّي اللّٰهْ يَنْطِينِي قُدْرَةْ أَشَانْ نِبَلِّغْهَا بَلَا خَوْف وَ نِكَلِّمْ مِثِلْ وَاجِبْ.

نِهاية الجواب

٢١ وَ خَلَاصْ، أَخُونَا تِشِيكُسْ يِأَوْرِيكُو بِكُلَّ خَبَرِي. هُو أَخُونَا النِّحِبُّوهْ وَ يَخْدِمْ لِرَبِّنَا بِأَمَانْ. ٢٢ وَ هُو يِخَبِّرْكُو بِحَالِتْنَا وَ يِشَجِّعْكُو وَ بِسَبَبْ دَا بَسْ، رَسَّلْتَهْ لَيْكُو. ٢٣ وَ خَلِّي كُلَّ الْأَخْوَانْ يَلْقَوْا السَّلَامْ وَ الْمَحَبَّةْ مَعَ الْإِيمَانْ مِنْ اللّٰهْ أَبُونَا وَ رَبِّنَا عِيسَى الْمَسِيحْ. ٢٤ وَ النِّعْمَةْ لِكُلَّ النَّاسْ الْيِحِبُّوا رَبِّنَا عِيسَى الْمَسِيحْ بِالْمَحَبَّةْ الْمَا تِكَمِّلْ أَبَداً.