فِلِبِّي 1

جواب لفِلِبِّي

من جوابات الرسول بولس

١ جَوَابْ مِنِّي أَنَا بُولُسْ وَ تِمُوتَاوُسْ عَبِيدْ عِيسَى الْمَسِيحْ، لَيْكُو إِنْتُو كُلُّكُو الْبِقِيتُوا صَالِحِينْ بِعِيسَى الْمَسِيحْ الْفِي حِلَّةْ فِلِبِّي مَعَ مَسَائِيلْكُو وَ مُعَاوِنِينْهُمْ. ٢ عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.

دُعا الرسول و شُكْره

٣ فِي أَيِّ وَكِتْ كَنْ فَكَّرْت لَيْكُو، نَشْكُرْ اللّٰهْ رَبِّي. ٤ وَ أَيِّ وَكِتْ نِصَلِّي لِلّٰهْ، نَسْأَلَهْ لَيْكُو كُلُّكُو بِفَرَحْ. ٥ أَنَا فَرْحَانْ مِنْكُو أَشَانْ إِنْتُو شَارَكْتُوا مَعَايِ فِي بَلِّغِينْ بِشَارَةْ الْمَسِيحْ مِنْ أَوَّلْ وَكِتْ أَنَا جِيتْ لَيْكُو لَحَدِّي الْيَوْم. ٦ وَ أَنَا مُؤَكِّدْ كَدَرْ اللّٰهْ، الْبَدَا خِدِمْتَهْ الْعَدِيلَةْ فَوْقكُو، هُو يِسَوِّيهَا دَايْماً لَحَدِّي يِتَمِّمْهَا فِي يَوْم جَيَّةْ الْمَسِيحْ عِيسَى.

٧ وَ وَاجِبْ لَيِّ نِحِسّ بَيْكُو كُلُّكُو مِثِلْ دَا أَشَانْ قَلْبِي دَايْماً مَعَاكُو. وَ نِحِبُّكُو أَشَانْ إِنْتُو كُلُّكُو مُشَارِكِينْ مَعَايِ فِي نِعْمَةْ اللّٰهْ. وَ إِنْتُو دَايْماً مُشَارِكِينْ مَعَايِ وَكِتْ أَنَا قَاعِدْ مُجَنْزَرْ فِي السِّجِنْ وَ وَكِتْ أَنَا قَاعِدْ نِدَافِعْ لِبِشَارَةْ الْمَسِيحْ وَ نِثَبِّتْهَا لِلنَّاسْ. ٨ وَ اللّٰهْ يَشْهَدْ لَيِّ، أَنَا قَرْمَانْ بِلْحَيْن لَيْكُو كُلُّكُو بِمَحَبَّةْ الْمَسِيحْ عِيسَى.

٩ وَ أَنَا قَاعِدْ نَسْأَلْ اللّٰهْ أَشَانْ هُو يِزِيدْ مَحَبِّتْكُو وَ يِكَتِّرْهَا لَيْكُو بِزِيَادَةْ. وَ خَلِّي يَنْطِيكُو مَعَاهَا عِلِمْ وَ فِهِمْ تَمَامْ ١٠ أَشَانْ تَعَرْفُوا كِكَّيْف تِمَيُّزُوا دَايْماً الشَّيّءْ الْأَفْضَلْ. وَ خَلَاصْ تِعِيشُوا بِنِيَّةْ مُخْلِصَةْ وَ بَلَا عَيْب وَ تَبْقَوْا جَاهِزِينْ لِلْيَوْم الْيَجِي فَوْقَهْ الْمَسِيحْ. ١١ وَ تَبْقَوْا صَالِحِينْ وَ مَلَانِينْ بِالْخَيْر الْجَايِ مِنْ عِيسَى الْمَسِيحْ. وَ خَلَاصْ، الْمَجْد وَ الشُّكُرْ لِلّٰهْ.

بلِّغين البِشارة للناس

١٢ يَا أَخْوَانِي، نِدَوْر إِنْتُو تَعَرْفُوا كَدَرْ التَّعَبْ اللِّحِقَانِي هِنِي سَاعَدْ بِشَارَةْ الْمَسِيحْ وَ هِي أَلْوَسَّعَتْ زِيَادَةْ. ١٣ أَشَانْ بِقِي وَاضِحْ لِكُلَّ عَسْكَرْ هَنَا قَصِرْ الْوَالِي وَ لِكُلَّ النَّاسْ الْآخَرِينْ كَدَرْ أَنَا مَسْجُونْ فِي شَانْ أَنَا عَبْد الْمَسِيحْ. ١٤ وَ فِي السِّجِنْ، أَنَا بِقِيتْ مَثَلْ لِلْأَخْوَانْ الْفِي الْحِلَّةْ دِي. وَ كَتِيرِينْ مِنْهُمْ عَشَمْهُمْ فِي رَبِّنَا بِقِي قَوِي زِيَادَةْ. وَ لِقَوْا شَجَاعَةْ لَحَدِّي قَمَّوْا يِحَجُّوا بِكَلَامْ اللّٰهْ بَلَا خَوْف.

١٥ صَحِيحْ، وَاحِدِينْ مِنْهُمْ قَاعِدِينْ يِبَشُّرُوا بِالْمَسِيحْ وَ دَا، أَشَانْ يَحْسُدُونِي وَ يِخَاصُمُونِي لَاكِنْ آخَرِينْ يِبَشُّرُوا بِنِيَّةْ عَدِيلَةْ. ١٦ الْأَخْوَانْ دَوْل يِبَشُّرُوا أَشَانْ يِحِبُّونِي وَ يَعَرْفُوا اللّٰهْ جَابَانِي هِنِي أَشَانْ نِدَافِعْ لِلْبِشَارَةْ. ١٧ وَ لَاكِنْ الْحَسُودِينْ دَوْل يِبَلُّغُوا بِالْمَسِيحْ بِنِيَّةْ مَا مُخْلِصَةْ. يِدَوْرُوا يُخُطُّوا نُفُوسْهُمْ قِدَّامْ. وَ فِي فِكِرْهُمْ، بَلِّغِينْهُمْ يَبْقَى لَيِّ قَاسِي وَكِتْ أَنَا مُجَنْزَرْ فِي السِّجِنْ. ١٨ وَ كَنْ لَيِّ أَنَا، دَا مَا يِسَوِّي لَيِّ شَيّءْ. كَنْ نِيِّتْهُمْ فَسْلَةْ وَلَّا نِيِّتْهُمْ عَدِيلَةْ كُلَ، بِأَيِّ طَرِيقَةْ هُمَّنْ قَاعِدِينْ يِبَلُّغُوا كَلَامْ الْمَسِيحْ وَ بَيْدَا، أَنَا فَرْحَانْ. أَيْوَى، بَتَّانْ كُلَ نَفْرَحْ ١٩ أَشَانْ نَعَرِفْ كَدَرْ اللّٰهْ يِنَجِّينِي وَ دَا بِسَبَبْ إِنْتُو قَاعِدِينْ تَسْأَلَوْه لَيِّ وَ رُوحْ عِيسَى الْمَسِيحْ يِعَاوِنِّي.

حالة الرسول القاسية

٢٠ وَ نِتْمَنَّى بِنِيَّةْ وَاحِدَةْ وَ بِعَشَمْ قَوِي كَدَرْ مَا نَفْشُلْ فِي أَيِّ شَيّءْ. وَ نِدَوْر نِكَلِّمْ مِثِلْ دَايْماً كَلَّمْت بِشَجَاعَةْ وَ بَلَا خَوْف وَ نِعَظِّمْ الْمَسِيحْ قِدَّامْ النَّاسْ فِي كُلَّ حَيَاتِي، كَنْ نِعِيشْ وَلَّا نُمُوتْ كُلَ. ٢١ أَشَانْ لَيِّ أَنَا، الْحَيَاةْ إِلَّا مَعَ الْمَسِيحْ. وَ الْمَوْت عِنْدَهْ لَيِّ فَايْدَةْ بِزِيَادَةْ. ٢٢ وَ كَنْ اللّٰهْ يِدَوْر مَا نِفَارِقْ الدُّنْيَا دِي، خَلَاصْ أَنَا نَخْدِمْ خِدْمَةْ سَمْحَةْ لِلْمَسِيحْ. لَاكِنْ بَيْن الْحَيَاةْ وَ الْمَوْت، مَا نَعَرِفْ نِشِيلْ وَيْنُو. ٢٣ عِنْدِي شَهْوَاتْ إِتْنَيْن الْقَاعِدِينْ يِدَّاوَسَوْا فَوْقِي. نِدَوْر نِفَارِقْ الدُّنْيَا وَ نَقْعُدْ مَعَ الْمَسِيحْ أَشَانْ دَا بَسْ الْأَفْضَلْ. ٢٤ وَ لَاكِنْ وَاجِبْ بِزِيَادَةْ نَقْعُدْ حَيّ فِي الدُّنْيَا دِي أَشَانْ حَيَاتِي عِنْدَهَا فَايْدَةْ لَيْكُو.

٢٥ وَ دَا، بِقِي لَيِّ وَاضِحْ. كَنْ مَا نُمُوتْ يَبْقَى لَيْكُو أَخَيْر. وَ خَلَاصْ، نَعَرِفْ كَدَرْ نَقْعُدْ حَيّ مَعَاكُو سَوَا أَشَانْ إِنْتُو تَبْقَوْا قَوِيِّينْ وَ فَرْحَانِينْ فِي الْإِيمَانْ بِزِيَادَةْ. ٢٦ وَ بِمِثِلْ دَا وَكِتْ نِقَبِّلْ لَيْكُو، إِنْتُو تِفَاشُرُوا زِيَادَةْ بِعِيسَى الْمَسِيحْ بِسَبَبِي أَنَا.

الحال الواجْبة في التعب

٢٧ لَاكِنْ خَلِّي تِعِيشُوا بِالْحَالْ الْمُوَافْقَةْ لِبِشَارَةْ الْمَسِيحْ. وَ مِثِلْ دَا، كَنْ نَجِي نِشِيفْكُو وَلَّا كَنْ أَنَا بَعِيدْ مِنْكُو كُلَ، خَلَاصْ نَسْمَعْ كَلَامْ فِيكُو الْيُقُولْ إِنْتُو ثَابْتِينْ بِفِكِرْ وَاحِدْ وَ هَدَفْ وَاحِدْ وَ إِنْتُو قَاعِدِينْ تِحَارُبُوا سَوَا فِي شَانْ الْإِيمَانْ اللِّقِيتُوهْ مِنْ بِشَارَةْ الْمَسِيحْ. ٢٨ مَا تِخَلُّوا الْخَوْف يِسَوِّيكُو بِسَبَبْ أَيِّ خِدْمَةْ الْيِسَوُّوهَا النَّاسْ الْيِخَالُفُوكُو. وَ دَا يَبْقَى لَيْهُمْ عَلَامَةْ التِّوَصِّفْ كَدَرْ هُمَّنْ فِي دَرِبْ الْهَلَاكْ وَ إِنْتُو فِي دَرِبْ النَّجَاةْ. وَ الْيِنَجِّيكُو، هُو اللّٰهْ. ٢٩ أَشَانْ اللّٰهْ أَنْطَاكُو رَحْمَةْ وَ بِالرَّحْمَةْ دِي، إِنْتُو مَا تِآمُنُوا بِالْمَسِيحْ بَسْ لَاكِنْ تَتْعَبَوْا فِي شَانَهْ كُلَ. ٣٠ وَ خَلَاصْ، إِنْتُو قَاعِدِينْ تِشَارُكُوا فِي نَفْس الْحَرِبْ الْأَنَا قَاعِدْ نِحَارِبْ فَوْقَهْ. وَ الْحَرِبْ دَا، إِنْتُو شِفْتُوهْ أَوَّلْ وَكِتْ أَنَا لِسَّاعْ قَاعِدْ مَعَاكُو. وَ هَسَّعْ كُلَ، سِمِعْتُوا كَدَرْ أَنَا قَاعِدْ نِحَارِبْ مِثِلْ دَا بَتَّانْ.