جوابات لتَسَلونِيكِي
من جوابات الرسول بولس
مقدمة
سُبْحان اللّه و الحمْدُ للّٰه، اللّه رسّل عِيسَى المسيح أشان ينجّي كل الناس. و خِدْمة المسيح ما كمّلت. هو قاعد يخْدِم في الدُنْيا بواسِطة خدّامينه و في الأخير، هو يقبِّل في الأرْض.
الناس الأوّل بلّغوا بِشارة المسيح في تَسَلونِيكِي، همن الرسول بُولُس و تِمُوتَاوُس و سِيلَا. و تَسَلونِيكِي هي حِلّة كبيرة في بلد مَقِدُونِيَة. هي قاعدة لحدي اليوم و حاليّاً في بلد اليُونَان. همن بلّغوا البِشارة لليَهُود تلاتة أُسْبوع لحدي اليَهُود طردوهم من بيت الصلاة. و بعد دا، بلّغوا البِشارة لليونانيّين و كتيرين مِنهم آمنوا بعِيسَى المسيح. لاكن اليَهُود الما آمنوا حرّشوا ناس الحِلّة و سوّوا فِتْنة. و بَيْدا، المُؤمِنين ذاتهم قمّوا مرقوا بُولُس من الحِلّة. و الكلام دا قاعد في كتاب أعمال الرُسُل فصُل 17 آية 1-8.
و بُولُس مشى لمدينة أَتِينَا و من هِناك، هو رسّل تِمُوتَاوُس بتان في تَسَلونِيكِي أشان يلْقى خبر المُؤمِنين. وكت تِمُوتَاوُس قبّل من تَسَلونِيكِي، جاب لبُولُس الخبر. قال كدر ناس الحِلّة قاعدين يتعُّبوا المُؤمِنين لاكن المُؤمِنين قاعدين ثابْتين في إيمانهم. و في الوكت دا بس، بُولُس كتب ليهم بقُدْرة الروح القُدّوس الجواب الأوّل دا أشان يشجِّعهم و يعلِّمهم. و بعد وكت شيّة بس، لِقي مِنهم ردّ. و خلاص كتب ليهم الجواب التاني.
التعْليم الفي الجوابات الإتْنَيْن دَوْل بُخُصّ الحال الواجْبة للمُؤمِنين و الصبُر الواجِب في التعب. و الجوابات يحجّوا في اليوم الأخير و جيّة ناكِر الحقّ و جيّة المسيح التانية و بُعاث المُؤمِنين.
خلّي أيِّ نادم اليقْري الجوابات دَوْل يسْأل من اللّه رحْمته و نِعْمته أشان يفْهم الكلام المكتوب فوقهم و يطبِّقه عديل. آمين.