أفَسُس 1

جواب لأفَسُس

من جوابات الرسول بولس

١ جَوَابْ مِنِّي أَنَا بُولُسْ رَسُولْ عِيسَى الْمَسِيحْ بِإِذِنْ اللّٰهْ. وَ نَكْتِبْ لَيْكُو إِنْتُو الصَّالِحِينْ الْفِي حِلَّةْ أَفَسُسْ الثَّابْتِينْ فِي إِيمَانْكُو بِالْمَسِيحْ عِيسَى. ٢ عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.

شُكُر لبركات اللّه

٣ خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ. هُو بَارَكَانَا بِكُلَّ الْبَرَكَاتْ الرُّوحِيَّةْ الْفِي السَّمَاءْ أَشَانْ عَلَاقِتْنَا مَعَ الْمَسِيحْ. ٤ قُبَّالْ بِدَايَةْ الدُّنْيَا، اللّٰهْ عَزَلَانَا فِي الْمَسِيحْ. بِسَبَبْ مَحَبِّتَهْ، هُو شَالْ نِيَّةْ أَشَانْ نَبْقَوْا خَاصِّينْ وَ نَحْضَرَوْا قِدَّامَهْ بَلَا أَيِّ عَيْب. ٥ مِنْ أَوَّلْ، هُو قَدَّرْ لَيْنَا وَ شَالْ نِيَّةْ أَشَانْ نَبْقَوْا عِيَالَهْ بِوَاسِطَةْ عِيسَى الْمَسِيحْ. وَ دِي بَسْ نِيّتَهْ الْهُو رَضْيَانْ بَيْهَا. ٦ خَلِّي نَشْكُرُوهْ فِي شَانْ نِعْمَتَهْ الْمَجِيدَةْ النَّزَّلَاهَا فَوْقنَا بِإِبْنَهْ الْيِحِبَّهْ. ٧ إِبْنَهْ فَدَانَا بِدَمَّهْ وَ بَيَّهْ هُو، اللّٰهْ غَفَرْ لَيْنَا خَطَايَانَا. دِي بَسْ نِعْمَتَهْ الْعَظِيمَةْ ٨ النَّزَّلَاهَا فَوْقنَا بِكَتَرَةْ.

وَ اللّٰهْ الْحَكِيمْ الْيَعَرِفْ كُلَّ شَيّءْ ٩ بَيَّنْ لَيْنَا سِرّ هَنَا مُرَادْتَهْ الْهُو رَضْيَانْ بَيْهَا. وَ شَالْ نِيَّةْ لِيِتَمِّمْهَا فِي الْمَسِيحْ. ١٠ وَ دَاهُو هَدَفْ اللّٰهْ. فِي الْوَكِتْ الْهُو حَدَّدَهْ، هُو يِدَوْر يِلِمّ كُلَّ شَيّءْ الْفِي السَّمَاوَاتْ وَ كُلَّ شَيّءْ الْفِي الْأَرْض وَ يُخُطُّهُمْ تِحِتْ رَئِيسْ وَاحِدْ وَ هُو الْمَسِيحْ.

١١ وَ بِعَلَاقِتْنَا مَعَ الْمَسِيحْ، اللّٰهْ جَعَلَانَا شَعَبَهْ الْيَلْقَوْا الْوَرَثَةْ. اللّٰهْ عَزَلَانَا مِنْ أَوَّلْ حَسَبْ نِظَامَهْ. هُو يِسَوِّي كُلَّ شَيّءْ حَسَبْ نِيّتَهْ وَ مُرَادْتَهْ. ١٢ وَ اللّٰهْ عَزَلَانَا أَنِحْنَ الْبِقِينَا الْأَوَّلَانِيِّينْ الْخَطَّيْنَا عَشَمْنَا فِي الْمَسِيحْ لِنَشْكُرُوهْ وَ نِمَجُّدُوهْ. ١٣ وَ إِنْتُو كُلَ، سِمِعْتُوا كَلَامْ الْحَقّ فِي بِشَارَةْ الْمَسِيحْ الْبَيْهَا نِجِيتُوا وَ بِقِيتُوا مُؤمِنِينْ بِالْمَسِيحْ. وَ بِسَبَبْ عَلَاقِتْكُو مَعَ الْمَسِيحْ، اللّٰهْ نَزَّلْ فَوْقكُو الرُّوحْ الْقُدُّوسْ الْوَاعَدَانَا بَيَّهْ وَ هُو مِثِلْ الْوَسِمْ الْاللّٰهْ خَطَّاهْ فَوْقكُو. ١٤ وَ الرُّوحْ الْقُدُّوسْ يِأَكِّدْ لَيْنَا كَدَرْ نَلْقَوْا قِسِمْنَا مِنْ الْوَرَثَةْ الْوَاعَدْ بَيْهَا شَعَبَهْ. وَ هُو يِأَكِّدْ لَيْنَا كَدَرْ نَلْقَوْا الْوَرَثَةْ دِي وَكِتْ نَجَاتْنَا بِقَتْ كَامِلَةْ. وَ أَشَانْ دَا، خَلِّي نِمَجُّدُوا عَظَمَةْ اللّٰهْ.

دُعا بُولُس للمُؤمِنين

١٥ وَ فِي شَانْ كُلَّ الْأَشْيَاءْ دَوْل، أَنَا نَشْكُرْ اللّٰهْ. أَيْوَى، مِنْ سِمِعْت كَدَرْ إِيمَانْكُو بِرَبِّنَا عِيسَى قَوِي وَ تِحِبُّوا كُلَّ الصَّالِحِينْ، ١٦ أَنَا قَاعِدْ نَشْكُرْ اللّٰهْ دَايْماً فِي شَانْكُو وَ نِفَكِّرْ لَيْكُو فِي أَيِّ وَكِتْ النِّصَلِّي. ١٧ وَ نَدْعِي اللّٰهْ أَبُونَا الْمَجِيدْ الرَّسَّلْ رَبِّنَا عِيسَى الْمَسِيحْ وَ نَسْأَلَهْ لَيْكُو كَدَرْ هُو يَنْطِيكُو بِالرُّوحْ الْقُدُّوسْ فِكِرْ عَدِيلْ وَ عِرْفَةْ أَشَانْ تَعَرْفُوا اللّٰهْ بِزِيَادَةْ. ١٨ خَلِّي نُورْ اللّٰهْ يَدْخُلْ فِي قُلُوبْكُو أَشَانْ تَفْهَمَوْا تَمَامْ الْعَشَمْ الْاللّٰهْ نَادَاكُو لِتَلْقَوْه وَ بَتَّانْ تَفْهَمَوْا كُبُرْ الْوَرَثَةْ الْمَجِيدَةْ الْقَاعِدَةْ فِي أُسْط الصَّالِحِينْ.

١٩ وَ تَعَرْفُوا قُدُرْتَهْ الْمَا عِنْدَهَا حَدّ الْقَاعِدَةْ تَخْدِمْ لَيْنَا أَنِحْنَ الْمُؤمِنِينْ. الْقُدْرَةْ دِي عَظِيمَةْ وَ هِي الْقُدْرَةْ ٢٠ الْاللّٰهْ بَيَّنْهَا فِي الْمَسِيحْ وَكِتْ بَعَثَهْ مِنْ أُسْط الْمَيْتِينْ وَ رَفَعَهْ فَوْق فِي السَّمَاوَاتْ وَ قَعَّدَهْ فِي نُصَّهْ الزَّيْنَايْ. ٢١ الْمَسِيحْ قَاعِدْ فِي بَكَانْ عَالِي بِلْحَيْن مِنْ كُلَّ الْحُكَّامْ وَ الْكُبَارَاتْ وَ مِنْ كُلَّ شَيّءْ الْعِنْدَهْ قُدْرَةْ وَلَّا مُلُكْ. أُسْمَهْ عَالِي مِنْ كُلَّ أُسُمْ الْيَطْرُوهْ النَّاسْ، مَا فِي الدُّنْيَا بَسْ لَاكِنْ فِي الْآخِرَةْ كُلَ. ٢٢ وَ اللّٰهْ خَطَّ كُلَّ شَيّءْ تِحِتْ مُلُكْ الْمَسِيحْ وَ جَعَلَهْ رَئِيسْ فِي كُلَّ شَيّءْ لِفَايْدَةْ أُمَّتَه. ٢٣ وَ أُمَّتَه هِي مِثِلْ جِسْمَهْ وَ هِي مَلَانَةْ بِقُدْرَةْ الْمَسِيحْ وَ الْمَسِيحْ قُدُرْتَهْ تَمْلَا كُلَّ شَيّءْ.