أفَسُس 2

الحياة الجديدة بنِعْمة اللّه

١ أَوَّلْ، إِنْتُو مَيْتِينْ بِسَبَبْ خَطَايَاكُو وَ ذُنُوبْكُو. ٢ وَ فِي الْوَكِتْ الْفَاتْ دَاكْ، إِنْتُو قَاعِدِينْ تِتَابُعُوا دَرِبْ الدُّنْيَا وَ تِتَابُعُوا كَبِيرْ الْمَمْلَكَةْ الشَّيْطَانِيَّةْ الْقَاعِدَةْ بَيْن السَّمَاءْ وَ الْأَرْض وَ هُو الشَّيْطَانْ الْقَاعِدْ يَخْدِمْ فِي قُلُوبْ النَّاسْ الْيِخَالُفُوا اللّٰهْ. ٣ وَ أَوَّلْ كُلِّنَا مِنْهُمْ وَ نِتَابُعُوا شَهْوَاتْ الْإِنْسَانْ وَ نِسَوُّوا الشَّيّءْ الْجِسِمْنَا وَ أَفْكَارْنَا يِدَوْرُوهْ. أَوَّلْ أَنِحْنَ ذَاتْنَا وَاجِبْ لَيْنَا غَضَبْ اللّٰهْ مِثِلْ النَّاسْ الْآخَرِينْ.

٤ وَ لَاكِنْ رَحْمَةْ اللّٰهْ، هِي عَظِيمَةْ وَ هُو يِحِبِّنَا بِمَحَبَّةْ كَبِيرَةْ بِلْحَيْن. ٥ وَ وَكِتْ أَنِحْنَ مَيْتِينْ بِسَبَبْ خَطَايَانَا، هُو أَنْطَانَا الْحَيَاةْ الْجَدِيدَةْ مَعَ الْمَسِيحْ. أَيْوَى، بِنِعْمَةْ اللّٰهْ بَسْ إِنْتُو نِجِيتُوا. ٦ وَ اللّٰهْ بَعَثَانَا مَعَايَهْ وَ قَعَّدَانَا مَعَايَهْ فِي السَّمَاوَاتْ وَ دَا بِقِي لَيْنَا بِالْمَسِيحْ عِيسَى. ٧ وَ هُو سَوَّى لَيْنَا زَيْن بِالْمَسِيحْ عِيسَى أَشَانْ فِي كُلَّ الزَّمَنْ الْجَايِ، يِبَيِّنْ رَحْمَتَهْ الْكَبِيرَةْ بِلْحَيْن الْمَا عِنْدَهَا حَدّ.

٨ أَيْوَى، بِرَحْمَةْ اللّٰهْ بَسْ، إِنْتُو نِجِيتُوا بِسَبَبْ إِيمَانْكُو بِالْمَسِيحْ. إِنْتُو مَا نَجَّيْتُوا نُفُوسْكُو لَاكِنْ النَّجَاةْ دِي هَدِيَّةْ مِنْ اللّٰهْ. ٩ اللّٰهْ مَا نَجَّاكُو بِسَبَبْ عَمَلْكُو هَنَا الْخَيْر وَ فِي شَانْ دَا، مَا فِي نَادُمْ عِنْدَهْ حَقّ يِسْتَكْبَرْ. ١٠ وَ خَلَاصْ أَنِحْنَ بِقِينَا خَلِيقَةْ اللّٰهْ. هُو سَوَّانَا خَلِيقَةْ جَدِيدَةْ فِي الْمَسِيحْ عِيسَى أَشَانْ نِسَوُّوا عَمَلْ الْخَيْر الْمِنْ أَوَّلْ هُو جَهَّزَهْ لَيْنَا أَشَانْ نِسَوُّوهْ.

الناس بِقوا نفر واحِد

١١ يَا أَخْوَانِي الْمَا يَهُودْ، فَكُّرُوا فِي حَالِتْكُو الْقَدِيمَةْ. أَوَّلْ الْيَهُودْ يُقُولُوا فَوْقكُو إِنْتُو مَا مُطَهَّرِينْ. وَ النَّاسْ الْيُقُولُوا الْكَلَامْ دَا يُقُولُوا هُمَّنْ بَسْ الْمُطَهَّرِينْ لَاكِنْ طَهُورِتْهُمْ قَطِعِينْ الْجِلِدْ الْيِسَوُّوهْ بِإِيدَيْن النَّاسْ بَسْ. ١٢ أَوَّلْ إِنْتُو مَا عِنْدُكُو عَلَاقَةْ مَعَ الْمَسِيحْ. إِنْتُو مِنْ قَبَايِلْ شِقْ، مَا مِنْ بَنِي إِسْرَائِيلْ الشَّعَبْ الْاللّٰهْ عَزَلَاهُمْ. الْمُعَاهَدَاتْ الْاللّٰهْ سَوَّاهُمْ مَعَ الْيَهُودْ، هُو مَا سَوَّاهُمْ مَعَاكُو. وَ الْوَعَدْ الْاللّٰهْ أَنْطَاهْ لَيْهُمْ، إِنْتُو مَا عِرِفْتُوهْ. إِنْتُو عَايْشِينْ فِي الدُّنْيَا لَاكِنْ مَا عِرِفْتُوا اللّٰهْ وَ مَا عِنْدُكُو عَشَمْ فَوْقَهْ. ١٣ لَاكِنْ هَسَّعْ عِنْدُكُو عَلَاقَةْ مَعَ الْمَسِيحْ عِيسَى. إِنْتُو أَوَّلْ بَعِيدِينْ مِنْ اللّٰهْ لَاكِنْ هَسَّعْ دَمّ الْمَسِيحْ دَفَّقْ فِي شَانْكُو وَ قَرَّبَاكُو لَيَّهْ.

١٤ الْمَسِيحْ بَسْ الْجَابْ لَيْنَا السَّلَامْ. أَنِحْنَ الْيَهُودْ وَ إِنْتُو الْمَا يَهُودْ، هُو جَعَلَانَا كُلِّنَا نَفَرْ وَاحِدْ. بِضَحِيَّةْ جِسْمَهْ، هُو كَسَّرْ الْحُدُودْ الْأَوَّلْ فَرَقَوْكُو مِنِّنَا وَ سَبَّبَوْا أَمْبَيْنَاتْنَا الْمُخَاصَمَةْ. ١٥ هُو بَطَّلْ دَرِبْ قَوَانِينْ الْيَهُودْ مَعَ شُرُوطْهُمْ أَشَانْ يِكَوِّنْ فِي الْعَلَاقَةْ مَعَايَهْ نَفَرْ وَاحِدْ جَدِيدْ فِي بَدَلْ نَفَرَيْن. وَ مِثِلْ دَا، هُو سَوَّى أَمْبَيْنَاتْنَا السَّلَامْ. ١٦ هُو صَالَحَانَا كُلِّنَا مَعَ اللّٰهْ، الْيَهُودْ وَ الْمَا يَهُودْ، لِنَبْقَوْا أُمَّةْ وَاحِدَةْ بِوَاسِطَةْ مَوْتَهْ فِي الصَّلِيبْ. وَ خَلَاصْ، الْمُخَاصَمَةْ الْأَوَّلْ قَاعِدَةْ أَمْبَيْنَاتْنَا بِقَتْ مَا فِيهَا.

١٧ الْمَسِيحْ جَاءْ وَ بَلَّغْ بِشَارَةْ السَّلَامْ لَيْكُو إِنْتُو الْمَا يَهُودْ الْأَوَّلْ بَعِيدِينْ مِنْ اللّٰهْ. وَ بَلَّغْ بِشَارَةْ السَّلَامْ لَيْنَا أَنِحْنَ الْيَهُودْ الْقَرِيبِينْ لِلّٰهْ. ١٨ وَ خَلَاصْ بِالْمَسِيحْ، أَنِحْنَ كُلِّنَا نَقْدَرَوْا نِقَرُّبُوا لِلّٰهْ أَبُونَا بِالرُّوحْ الْقُدُّوسْ الْوَاحِدْ.

١٩ وَ خَلَاصْ هَسَّعْ إِنْتُو الْمَا يَهُودْ، إِنْتُو مَا أَجَانِبْ بَتَّانْ وَ لَا نَاسْ مِنْ قَبِيلَةْ آخَرَةْ. بِقِيتُوا مُوَاطِنِينْ هَنَا مَمْلَكَةْ اللّٰهْ مَعَ الصَّالِحِينْ. بِقِيتُوا أَهَلْ بَيْت اللّٰهْ. ٢٠ وَلَّا بِمَثَلْ آخَرْ، اللّٰهْ جَعَلَاكُو الْبَيْت الْهُو سَاكِنْ فَوْقَهْ. وَ الْأَسَاسْ الْاللّٰهْ بَنَاكُو فَوْقَهْ، هُو كَلَامْ الرُّسُلْ وَ الْأَنْبِيَاء. وَ عِيسَى الْمَسِيحْ، هُو حَجَرْ الزَّاوِيَةْ الْيَرْبُطْ الْأَسَاسْ. ٢١ بِعَلَاقِتْنَا مَعَ الْمَسِيحْ بَسْ، كُلِّنَا أَنْرَبَطْنَا سَوَا وَ بِقِينَا مِثِلْ بَيْت وَاحِدْ الْقَاعِدْ يَكْبُرْ لَحَدِّي يَبْقَى بَيْت مُقَدَّسْ وَ مَسْكَنْ خَاصّ لِلرَّبّ. ٢٢ بِعَلَاقِتْكُو مَعَ الْمَسِيحْ، اللّٰهْ قَاعِدْ يَبْنِي بَيْتَهْ بَيْكُو إِنْتُو كُلَ مَعَ كُلَّ الصَّالِحِينْ أَشَانْ تَبْقَوْا الْبَكَانْ الْاللّٰهْ يَسْكُنْ فَوْقَهْ بِرُوحَهْ.