أعمال الرُسُل 22

١ وَ قَالْ: «يَا أَخْوَانِي، يَا أَبَّهَاتِي، أَسْمَعَوْا كَلَامِي. خَلِّي نِدَافِعْ لِنَفْسِي.» ٢ وَ وَكِتْ النَّاسْ سِمْعَوْا هُو يِحَجِّي لَيْهُمْ بِكَلَامْ عِبْرَانِي، سَكَتَوْا مَرَّةْ وَاحِدْ.

وَ بُولُسْ قَالْ: ٣ «أَنَا يَهُودِي وِلْدَوْنِي فِي حِلَّةْ طَرْسُوسْ فِي بَلَدْ كِلِكِيَّةْ وَ لَاكِنْ رَبَّوْنِي هِنِي فِي مَدِينَةْ الْقُدُسْ. وَ بِقِيتْ تِلْمِيذْ هَنَا سَيِّدْنَا قَمَلِيِيلْ وَ هُو عَلَّمَانِي كِكَّيْف نِتَابِعْ شُرُوطْ التَّوْرَاةْ هَنَا جُدُودْنَا عَدِيلْ وَ نِتَابِعْ كَلَامْ اللّٰهْ بِشِدَّةْ مِثِلْكُو إِنْتُو كُلُّكُو الْقَاعِدِينْ هِنِي الْيَوْم. ٤ وَ أَنَا عَذَّبْت نَاسْ الْيِتَابُعُوا دَرِبْ عِيسَى الْمَسِيحْ وَ دَوَّرْت نَكْتُلْهُمْ وَ رَبَطْ رُجَالْ وَ عَوِينْ وَ دَسَّيْتهُمْ فِي السِّجِنْ. ٥ وَ كَلَامِي دَا صَحِيحْ وَ كَنْ مَا تِصَدُّقُونِي، أَسْأَلَوْا كَبِيرْ رُجَالْ الدِّينْ وَ مَجْلَسْ الْكُبَارَاتْ. هُمَّنْ ذَاتْهُمْ أَنْطَوْنِي جَوَابَاتْ لِأَخْوَانْهُمْ فِي مَدِينَةْ دِمَشْق. وَ أَنَا مَشَيْت أَشَانْ نَكْرُبْ نَاسْ هَنَا عِيسَى الْقَاعِدِينْ هِنَاكْ وَ دَوَّرْت نَرْبُطْهُمْ وَ نِقَبِّلْ بَيْهُمْ فِي مَدِينَةْ الْقُدُسْ أَشَانْ يِعَاقُبُوهُمْ هِنِي.

٦ «وَ خَلَاصْ، مَشَيْت وَ وَكِتْ السَّاعَةْ بِقَتْ قَرِيبْ الضُّهُرْ، قَرَّبْت لِدِمَشْق. فَجْأَةً، نُورْ شَدِيدْ دَاوَى فَوْقِي مِنْ السَّمَاءْ. ٧ وَ أَنَا وَقَعْت فِي التُّرَابْ وَ سِمِعْت حِسّ هَنَا نَادُمْ قَاعِدْ يِحَجِّي لَيِّ وَ يُقُولْ: ‹يَا شَاوُولْ، يَا شَاوُولْ، مَالَكْ تِتَعِّبْنِي؟› ٨ وَ أَنَا رَدَّيْت لَيَّهْ وَ قُلْت: ‹يَا السَّيِّدْ، إِنْتَ يَاتُو؟› وَ هُو قَالْ: ‹أَنَا عِيسَى الْمِنْ النَّاصِرَةْ الْإِنْتَ قَاعِدْ تِتَعِّبَهْ.› ٩ وَ النَّاسْ الْمُسَافِرِينْ مَعَايِ شَافَوْا النُّورْ وَ لَاكِنْ مَا سِمْعَوْا حِسّ هَنَا النَّادُمْ الْيِحَجِّي لَيِّ. ١٠ وَ أَنَا سَأَلْتَهْ وَ قُلْت: ‹يَا الرَّبّ، تِدَوْر نِسَوِّي شُنُو؟› وَ الرَّبّ قَالْ: ‹قُمّ وَ أَمْشِي فِي دِمَشْق وَ تَلْقَى نَادُمْ وَاحِدْ الْيِأَوْرِيكْ كُلَّ شَيّءْ الْوَاجِبْ تِسَوِّيهْ.›

١١ «وَ بَعَدْ شِفْت النُّورْ الشَّدِيدْ دَا، مَا نَقْدَرْ نِشِيفْ وَ النَّاسْ الْمَعَايِ كَرَبَوْنِي مِنْ إِيدِي لَحَدِّي جَابَوْنِي فِي دِمَشْق. ١٢ وَ نَادُمْ وَاحِدْ قَاعِدْ فِي دِمَشْق أُسْمَهْ حَنَانِيَّا. هُو قَاعِدْ يِتَابِعْ التَّوْرَاةْ عَدِيلْ وَ كُلَّ الْيَهُودْ فِي دِمَشْق يَشْهَدَوْا لَيَّهْ كَدَرْ هُو نَادُمْ تَقِي. ١٣ وَ هُو جَاءْ لَيِّ وَ وَقَفْ جَنْبِي وَ قَالْ: ‹يَا أَخُونَا شَاوُولْ، شِيفْ!› وَ طَوَّالِي كَيْ عُيُونِي أَنْفَتَحَوْا وَ شِفْتَهْ.

١٤ «وَ هُو قَالْ: ‹اللّٰهْ رَبّ جُدُودْنَا عَزَلَكْ أَشَانْ تَعَرِفْ مُرَادْتَهْ وَ أَشَانْ تِشِيفْ عِيسَى، عَبْدَهْ الصَّالِحْ وَ تَسْمَعْ حِسَّهْ. ١٥ أَشَانْ إِنْتَ تَبْقَى لَيَّهْ شَاهِدْ وَ تِحَجِّي فِي شَانَهْ لِكُلَّ النَّاسْ وَ تِأَوْرِيهُمْ بِكُلَّ شَيّءْ الشِّفْتَهْ وَ السِّمِعْتَهْ. ١٦ وَ هَسَّعْ تَرْجَى شُنُو بَتَّانْ؟ قُمّ أَدْعِي بِأُسُمْ الرَّبّ وَ نِغَطُّسُوكْ وَ اللّٰهْ يَغْفِرْ لَيْك ذُنُوبَكْ.›

١٧ «وَ بَعَدْ دَا، قَبَّلْت فِي مَدِينَةْ الْقُدُسْ. يَوْم وَاحِدْ أَنَا قَاعِدْ نِصَلِّي فِي بَيْت اللّٰهْ وَ شَيّءْ مِثِلْ النَّوْم سَوَّانِي. ١٨ وَ شِفْت عِيسَى فِي رُؤْيَةْ وَ هُو حَجَّى لَيِّ وَ قَالْ: ‹قُمّ عَجَلَةْ. أَمْرُقْ مِنْ مَدِينَةْ الْقُدُسْ. النَّاسْ هِنِي يَابَوْا مَا يَسْمَعَوْا شَهَادْتَكْ لَيِّ.› ١٩ وَ قُلْت: ‹يَا رَبِّي، هُمَّنْ يَعَرْفُوا أَنَا قَمَّيْت مَشَيْت فِي كُلَّ بُيُوتْ الصَّلَاةْ وَ كَرَبْت فِي السِّجِنْ النَّاسْ الْمُؤمِنِينْ بَيْك وَ جَلَدْتُهُمْ. ٢٠ وَ وَكِتْ النَّاسْ قَاعِدِينْ يَكْتُلُوا إِسْتِفَانْ الشَّهَدْ لَيْك، أَنَا قَاعِدْ مَعَاهُمْ رَضْيَانْ بِكَتْلَهْ وَ أَنَا قَاعِدْ نَحْرِسْ خُلْقَانْ النَّاسْ الْقَاعِدِينْ يَكْتُلُوهْ.› ٢١ وَ لَاكِنْ هُو قَالْ لَيِّ: ‹أَمْشِي. أَنَا نِرَسِّلَكْ بَعِيدْ مِنْ هِنِي. نِرَسِّلَكْ لِلنَّاسْ الْمَا يَهُودْ.›»

٢٢ وَ النَّاسْ قَاعِدِينْ يَسْمَعَوْا كَلَامَهْ. لَاكِنْ وَكِتْ هُو حَجَّى بِالنَّاسْ الْمَا يَهُودْ، خَلَاصْ قَمَّوْا عَاطَوْا فَوْقَهْ وَ قَالَوْا: «أَكْتُلُوهْ لِلنَّادُمْ دَا! مَا تِخَلُّوهْ يِعِيشْ!» ٢٣ وَ قَمَّوْا عَاطَوْا وَ رَفَعَوْا خُلْقَانْهُمْ فَوْق وَ هَزَّوْهُمْ وَ شَالَوْا تُرَابْ وَ شَتَّتَوْه فَوْق فِي الْهَوَاءْ.

٢٤ وَ الْقَايِدْ أَمَرَاهُمْ لِعَسْكَرَهْ أَشَانْ يِجِيبُوا بُولُسْ دَاخَلْ فِي الْقَصِرْ الْعَسْكَرِي وَ يَجْلُدُوهْ لَحَدِّي يِأَوْرِيهُمْ مَالَا النَّاسْ يِعِيطُوا فَوْقَهْ. ٢٥ وَ وَكِتْ قَاعِدِينْ يَرْبُطُوا بُولُسْ أَشَانْ يَجْلُدُوهْ، عَسْكَرِي وَاحِدْ مَسْؤُولْ فِي 100 عَسْكَرِي وَاقِفْ جَنْبَهْ وَ بُولُسْ حَجَّى لَيَّهْ وَ قَالْ: «فِي الْقَانُونْ، يُجُوزْ لَيْكُو تَجْلُدُوا النَّادُمْ الْعِنْدَهْ جِنْسِيَّةْ رَوْمَانِيَةْ قُبَّالْ مَا تِشَارُعُوهْ وَلَّا؟»

٢٦ وَكِتْ الْمَسْؤُولْ سِمِعْ الْكَلَامْ دَا، هُو مَشَى حَجَّى لِلْقَايِدْ وَ قَالْ: «إِنْتَ دَوَّرْت تِسَوِّي شُنُو؟ النَّادُمْ دَا عِنْدَهْ جِنْسِيَّةْ رَوْمَانِيَةْ.»

٢٧ وَ الْقَايِدْ جَاءْ لِبُولُسْ وَ سَأَلَهْ وَ قَالْ: «صَحِيحْ إِنْتَ رَوْمَانِي وَلَّا؟» وَ بُولُسْ قَالْ لَيَّهْ: «أَيْوَى.» ٢٨ وَ الْقَايِدْ قَالْ: «أَنَا كَفَّيْت قُرُسْ كَتِيرْ حَتَّى لِقِيتْ الْجِنْسِيَّةْ الرَّوْمَانِيَةْ.» وَ بُولُسْ قَالْ: «أَنَا مَوْلُودْ رَوْمَانِي.» ٢٩ وَ طَوَّالِي كَيْ، كُلَّ الْعَسَاكِرْ الدَّوَّرَوْا يَجْبُرُوا بُولُسْ يِحَجِّي لَيْهُمْ، هُمَّنْ كَسَّوْا مِنَّهْ. وَ خَلَاصْ الْخَوْف كَرَبَهْ لِلْقَايِدْ أَشَانْ هُو رَبَطْ نَادُمْ رَوْمَانِي بِجَنَازِيرْ.

٣٠ وَ أَمْبَاكِرْ، الْقَايِدْ دَوَّرْ يِأَكِّدْ مِنْ الشَّيّءْ الْيَهُودْ تَهَمَوْا بَيَّهْ بُولُسْ. وَ حَلَّهْ مِنْ الْجَنَازِيرْ وَ نَادَى كُبَارَاتْ رُجَالْ الدِّينْ وَ كُلَّ نَاسْ هَنَا مَجْلَسْ الْيَهُودْ أَشَانْ يِلِمُّوا. وَ وَدَّى لَيْهُمْ بُولُسْ وَ وَقَّفَهْ قِدَّامْهُمْ.