أعمال الرُسُل 23

بُولُس قِدّام المجْلس

١ وَ بُولُسْ قَاعِدْ يِشِيفْ نَاسْ الْمَجْلَسْ عَدِيلْ فِي عُيُونْهُمْ وَ قَالْ: «يَا الْأَخْوَانْ، كُلَّ حَيَاتِي أَنَا عِشْتَهَا بِنِيَّةْ مُخْلِصَةْ قِدَّامْ اللّٰهْ.» ٢ وَ حَنَانِيَّا كَبِيرْ رُجَالْ الدِّينْ أَمَرْ النَّاسْ الْوَاقْفِينْ جَنْب بُولُسْ أَشَانْ وَاحِدْ مِنْهُمْ يُدُقَّهْ فِي خَشْمَهْ. ٣ وَ بُولُسْ قَالْ لَيَّهْ: «اللّٰهْ يُدُقَّكْ إِنْتَ! إِنْتَ مِثِلْ دُرْدُرْ الطِّينَةْ الطَّلَسَوْه بِبُهْيَةْ بَيْضَةْ! كِكَّيْف تَقْطَعْ لَيِّ شَرِيعَةْ وَ تَامُرْ نَادُمْ أَشَانْ يُدُقِّنِي؟ أَمْرَكْ دَا مُخَالِفْ لِلشَّرِيعَةْ؟»

٤ وَ النَّاسْ الْقَاعِدِينْ جَنْبَهْ قَالَوْا: «هَايْ! تِعَيِّرْ النَّادُمْ الْاللّٰهْ خَطَّاهْ كَبِيرْ رُجَالْ الدِّينْ؟» ٥ وَ بُولُسْ رَدَّ لَيْهُمْ وَ قَالْ: «يَا الْأَخْوَانْ، أَنَا مَا عِرِفْت كَدَرْ هُو كَبِيرْ رُجَالْ الدِّينْ. أَشَانْ مَكْتُوبْ فِي الْكِتَابْ: ﴿مَا تُقُولْ كَلَامْ فَسِلْ فِي كَبِيرْ شَعَبَكْ.﴾»

٦ وَ وَكِتْ بُولُسْ قَاعِدْ يِشِيفْ نَاسْ الْمَجْلَسْ، هُو عِرِفْ وَاحِدِينْ مِنْهُمْ صَدُّوقِيِّينْ وَ وَاحِدِينْ مِنْهُمْ فَرِيزِيِّينْ. وَ حَجَّى بِحِسّ عَالِي وَ قَالْ: «يَا الْأَخْوَانْ، أَنَا فَرِيزِي وِلَيْد هَنَا فَرِيزِيِّينْ! يِدَوْرُوا يِشَارُعُونِي أَشَانْ أَنَا مُؤمِنْ بِالشَّيّءْ النَّرْجَوْه بِعَشَمْ. أَنَا مُؤمِنْ بِالْبُعَاثْ.»

٧ وَ وَكِتْ بُولُسْ قَالْ الْكَلَامْ دَا، نَاسْ الْمَجْلَسْ بَدَوْا يِلْغَالَطَوْا أَمْبَيْنَاتْهُمْ. الْفَرِيزِيِّينْ وَ الصَّدُّوقِيِّينْ أَنْخَلَفَوْا. ٨ الصَّدُّوقِيِّينْ مَا مُؤمِنِينْ بِالْبُعَاثْ وَ لَا بِالْمَلَائِكَةْ وَ لَا بِالْجُنُونْ وَ لَاكِنْ الْفَرِيزِيِّينْ مُؤمِنِينْ بَيْهُمْ كُلُّهُمْ. ٩ وَ الْخِلَافْ بِقِي شَدِيدْ. وَ عُلَمَاءْ وَاحِدِينْ مِنْ الْفَرِيزِيِّينْ قَمَّوْا عَارَضَوْا بِشِدَّةْ وَ قَالَوْا: «أَنِحْنَ مَا نَجْعَلَوْا النَّادُمْ دَا خَاطِي. أَكُونْ رُوحْ وَاحِدْ وَلَّا مَلَكْ وَاحِدْ كَلَّمْ لَيَّهْ.»

١٠ وَ الْكَلَامْ دَا جَابْ بَرْجَالْ لَحَدِّي الْقَايِدْ الرَّوْمَانِي خَافْ مِنْ النَّاسْ يِقَطُّعُوا بُولُسْ لَحَمَايْ لَحَمَايْ. وَ فِي الأَخِيرْ، هُو رَسَّلْ عَسْكَرَهْ أَشَانْ يَنْزُلُوا يَخْطُفُوهْ مِنْ أُسُطْهُمْ وَ يِقَبُّلُوا بَيَّهْ فِي الْقَصِرْ.

١١ وَ بِاللَّيْل، الرَّبّ عِيسَى بَانْ لِبُولُسْ وَ حَجَّى لَيَّهْ وَ قَالْ: «شِدّ حَيْلَكْ! إِنْتَ شَهَدْت لَيِّ فِي مَدِينَةْ الْقُدُسْ وَ وَاجِبْ تَشْهَدْ لَيِّ فِي مَدِينَةْ رَوْمَا كُلَ.»

المُؤآمرة ضِدّ بُولُس

١٢ وَ وَكِتْ الْوَطَاةْ أَصْبَحَتْ، يَهُودْ وَاحِدِينْ أَلآمَرَوْا فِي بُولُسْ وَ حَلَفَوْا مَا يَاكُلُوا وَ لَا يَشَرْبَوْا شَيّءْ إِلَّا كَنْ كَتَلَوْه. ١٣ وَ النَّاسْ الْأَشَّاوَرَوْا ضِدَّهْ دَوْل عَدَدْهُمْ زِيَادَةْ مِنْ أَرْبَعِينْ رَاجِلْ. ١٤ وَ مَشَوْا حَجَّوْا لِكُبَارَاتْ رُجَالْ الدِّينْ وَ لِلشُّيُوخْ وَ قَالَوْا: «حَلَفْنَا مَا نَاكُلُوا وَ لَا نَشَرْبَوْا إِلَّا كَنْ كَتَلْنَا بُولُسْ. ١٥ أَشَانْ دَا، رَسُّلُوا لِلْقَايِدْ الرَّوْمَانِي وَ قُولُوا لَيَّهْ إِنْتُو وَ نَاسْ الْمَجْلَسْ تِدَوْرُوا تِأَكُّدُوا مِنْ كَلَامْ بُولُسْ. وَ أَطُلْبُوا مِنْ الْقَايِدْ هُو يِوَدِّيهْ لَيْكُو. وَ أَنِحْنَ كَمَانْ، جَاهِزِينْ. نَكْتُلُوا بُولُسْ قُبَّالْ مَا يَجِي فِي بَكَانْ الْمَجْلَسْ.»

١٦ وَ لَاكِنْ وِلَيْد هَنَا أَخُتْ بُولُسْ سِمِعْ شَوْرِتْهُمْ وَ مَشَى فِي قَصِرْ الْعَسْكَرْ وَ أَوْرَى بُولُسْ. ١٧ وَ بُولُسْ نَادَى مَسْؤُولْ وَاحِدْ هَنَا الْعَسْكَرْ وَ قَالْ لَيَّهْ: «وَدِّي الصَّبِي دَا لِلْقَايِدْ أَشَانْ عِنْدَهْ كَلَامْ يِدَوْر يِأَوْرِيهْ.» ١٨ وَ الْمَسْؤُولْ وَدَّى الصَّبِي لِلْقَايِدْ وَ قَالْ: «بُولُسْ الْمَكْرُوبْ نَادَانِي وَ طَلَبْ مِنِّي أَشَانْ نِجِيبْ لَيْك الصَّبِي دَا. هُو عِنْدَهْ خَبَرْ يِدَوْر يِأَوْرِيهْ لَيْك.»

١٩ وَ الْقَايِدْ كَرَبْ الصَّبِي مِنْ إِيدَهْ وَ وَدَّاهْ طَرَفْ وَ سَأَلَهْ وَ قَالْ: «شُنُو الْخَبَرْ التِّدَوْر تِأَوْرِينِي بَيَّهْ؟» ٢٠ وَ الصَّبِي رَدَّ لَيَّهْ وَ قَالْ: «الْيَهُودْ أَلآمَرَوْا فِي بُولُسْ وَ أَمْبَاكِرْ يَطُلْبُوا مِنَّكْ تِقَدِّمَهْ لِلْمَجْلَسْ أَشَانْ يِأَكُّدُوا الْكَلَامْ الْخَطَّوْه فَوْقَهْ. ٢١ مَا تَسْمَعْ كَلَامْهُمْ. زِيَادَةْ مِنْ أَرْبَعِينْ رَاجِلْ يِدَوْرُوا يَكُرْسُوا لَيَّهْ. هُمَّنْ حَلَفَوْا مَا يَاكُلُوا وَ لَا يَشَرْبَوْا شَيّءْ إِلَّا كَنْ كَتَلَوْه. وَ هَسَّعْ هُمَّنْ جَاهِزِينْ وَ يَرْجَوْا لَحَدِّي تِقَصِّدْ بِطَلَبْهُمْ.» ٢٢ وَ الْقَايِدْ قَالْ لَيَّهْ: «مَا تُقُولْ لِأَيِّ نَادُمْ إِنْتَ أَوْرَيْتنِي بِالْكَلَامْ دَا.»

وَ خَلَّى الصَّبِي قَبَّلْ بَيْتَهْ. ٢٣ وَ بَعَدْ دَا، الْقَايِدْ نَادَى إِتْنَيْن مِنْ مَسَائِيلْ الْعَسْكَرْ. وَ أَنْطَاهُمْ أَمُرْ وَ قَالْ: «لِمُّوا مِيتَيْن عَسْكَرْ أَشَانْ يِجَهُّزُوا نُفُوسْهُمْ لِيَمْشُوا فِي قَيْصَرِيَّةْ السَّاعَةْ تِسْعَةْ بِاللَّيْل. وَ شِيلُوا مَعَاكُو 70 عَسْكَرْ سِيَادْ خَيْل وَ 200 عَسْكَرْ مُسَلَّحِينْ بِحُرَابْ. ٢٤ وَ شِيلُوا خَيْل أَشَانْ بُولُسْ كُلَ يَرْكَبْ مَعَاكُو وَ وَدُّوهْ بِالْعَافَيْ لِفِيلِكْس الْوَالِي.»

٢٥ وَ الْقَايِدْ كَتَبْ جَوَابْ لِلْوَالِي وَ قَالْ:

٢٦ جَوَابْ مِنْ كُلُودِي لِيسِيَاسْ لِلسَّيِّدْ الْوَالِي فِيلِكْس الْمُحْتَرَمْ، السَّلَامْ عَلَيْكُمْ.

٢٧ النَّادُمْ دَا، الْيَهُودْ كَرَبَوْه وَ دَوَّرَوْا يَكْتُلُوهْ. وَ أَنَا سِمِعْت هُو عِنْدَهْ جِنْسِيَّةْ رَوْمَانِيَةْ وَ مَشَيْت بِالْعَسْكَرْ وَ نَجَّيْتَهْ مِنْهُمْ. ٢٨ دَوَّرْت نَعَرِفْ سَبَبْ شَكْوِتْهُمْ فَوْقَهْ وَ وَدَّيْتَهْ لِمَجْلَسْ الْيَهُودْ. ٢٩ وَ وَكِتْ سِمِعْت كَلَامْهُمْ، أَنَا فِهِمْت تُهْمِتْهُمْ فَوْقَهْ مُشْكِلَةْ هَنَا قَوَانِينْ دِينْهُمْ بَسْ وَ هُو مَا سَوَّى شَيّءْ فَسِلْ أَشَانْ وَاجِبْ لَيَّهْ الْمَوْت وَ لَا السِّجِنْ. ٣٠ وَ نَادُمْ أَوْرَانِي كَدَرْ نَاسْ وَاحِدِينْ أَشَّاوَرَوْا أَشَانْ يَكْتُلُوهْ. وَ بَيْدَا، وَدَّيْتَهْ لَيْك طَوَّالِي. وَ أَنْطَيْت إِذِنْ لِلنَّاسْ التَّهَمَوْه أَشَانْ يِقَدُّمُوا شَكْوِتْهُمْ فِي بَكَانَكْ.

٣١ وَ الْعَسْكَرْ طَبَّقَوْا أَوَامِرْ الْقَايِدْ وَ بِلَيْل وَدَّوْا بُولُسْ فِي حِلَّةْ أَنْتِيبَاتْرِسْ. ٣٢ وَ بِفَجُرْ، الْعَسْكَرْ قَبَّلَوْا فِي بَكَانْهُمْ وَ خَلَّوْا سِيَادْ الْخَيْل وِحَيْدهُمْ يِوَدُّوا بُولُسْ لَحَدِّي قَيْصَرِيَّةْ. ٣٣ وَ وَكِتْ وِصْلَوْا فِي قَيْصَرِيَّةْ، الْعَسْكَرْ سَلَّمَوْا بُولُسْ وَ الْجَوَابْ لِلْوَالِي. ٣٤ وَ الْوَالِي قَرَى الْجَوَابْ وَ سَأَلْ بُولُسْ وَ قَالْ: «بَلَدَكْ وَيْن؟» وَ وَكِتْ سِمِعْ كَدَرْ بُولُسْ مِنْ كِلِكِيَّةْ، ٣٥ هُو قَالْ لَيَّهْ: «وَكِتْ النَّاسْ التَّهَمَوْك يَجُوا هِنِي، نَسْمَعْ شَكْوِتْهُمْ فَوْقَكْ.» وَ أَمَرْ عَسْكَرَهْ أَشَانْ يَحَرْسُوا بُولُسْ فِي الْقَصِرْ الزَّمَانْ هِرُودُسْ بَنَاهْ.