جواب لرَوْمَا
من جوابات الرسول بولس
مقدمة
سُبْحان اللّه و الحمْدُ للّٰه، اللّه فتح درِب لكل الناس أشان يبْقوا صالِحين و يدْخُلوا في مجْده. و بإذِن اللّه، الرسول بُولُس دوّر يفسِّر الكلام دا للمُؤمِنين الفي مدينة رَوْمَا. في الوكت دا، رَوْمَا هي مدينة هنا ناس ما بعرْفوا اللّه. و في مسيحيّين أمْبَيْناتهم لاكن لِسّاع ما في نادم من رُسُل المسيح مشى للمدينة المُهِمّة دي.
و بُولُس كتب ليهم الجواب دا بقُدْرة الروح القُدّوس و فسّر ليهم بِشارة المسيح. هو وصّف ككيف المسيح ينجّي اليَهُود و الما يَهُود بنفْس الدرِب. و فسّر ليهم كدر كل الناس مُذْنِبين كن أوّل عِنْدُهم دين ولّا كن ما عِنْدُهم دين كل. و بُولُس فسّر كدر اللّه رسّل المسيح ليفْتح لينا كُلِّنا درِب واحِد البيه نبْقوا صالِحين. بواسِطة المسيح، الناس يلْقوا الغُفْران و قُدْرة الروح القُدّوس. المسيح فتح لينا كُلِّنا مجْد اللّه بدرِب الإيمان.
وكت الرسول بُولُس قاعد في حِلّة كُرُنْتُس، هو جهّز سفر لمدينة القدس. و هو عِرِف كدر الربّ يدَوْر هو يمْشي قِدّام لرَوْمَا. أشان دا، هو كتب الجواب دا للمسيحيّين الفي رَوْمَا و أوْراهم كدر هو عِنْده نيّة يمْشي ليهم. و هو رسّل الجواب بإيدَيْن مُؤمِنة واحِدة أُسُمها فِيبَة. و بعد دا، هو قمّ مشى مدينة القدس. و هِناك، هو لِقي تعب شديد و لاكن في الأخير، هو وِصِل في رَوْمَا. و الناس القروا جوابه كربوه عديل.
و جواب بُولُس للمسيحيّين الفي رَوْمَا يوصِّف بكلام واضِح كدر بركة المسيح ما هنا نفر واحِد و لا هنا قبيلة واحِدة. كل بني آدم مُذْنِبين. و بالمسيح، اللّه فتح درِب جديد أشان كل الأُمم يقْدروا يبْقوا بيه صالِحين. اللّه يبارِك أيِّ نادم اليقْري الكلام دا. آمين.